scorecardresearch
Latest News

പൊന്നിയരിയും തേങ്ങയുമുണ്ടോ, എളുപ്പത്തിൽ നീർദോശ തയ്യാറാക്കാം

തലേദിവസം തന്നെ ദോശമാവ് തയ്യാറാക്കി വയ്ക്കേണ്ട ആവശ്യമില്ല, കർണാടകയിൽ ഏറെ പ്രചാരത്തിലുള്ള നീർദോശ ഉണ്ടാക്കാം വളരെ എളുപ്പത്തിൽ

പൊന്നിയരിയും തേങ്ങയുമുണ്ടോ, എളുപ്പത്തിൽ നീർദോശ തയ്യാറാക്കാം

ദോശ ചുട്ടെടുക്കാൻ എളുപ്പമാണെങ്കിലും ദോശയ്ക്കുള്ള മാവ് തയ്യാറാക്കുന്ന പരിപാടികളൊക്കെ സാധാരണ തലേദിവസമേ ചെയ്തുവയ്ക്കണം. എന്നാൽ അധികം മുന്നൊരുക്കങ്ങളൊന്നുമില്ലാതെ ഇൻസ്റ്റന്റായി തയ്യാറാക്കാവുന്ന ഒരു ദോശ റെസിപ്പി പരിചയപ്പെടാം. ഫുഡ് വ്ളോഗറായ അരുണ വിജയ് ആണ് ഈ റെസിപ്പി പരിചയപ്പെടുത്തുന്നത്.

കർണാടകയിൽ ഏറെ പ്രചാരത്തിലുള്ള ദോശ ഇനങ്ങളിൽ ഒന്നാണ് ഇത്, നീർദോശ. തുളുനാടിന്റെയും മംഗലാപുരത്തിന്റെയും രുചികരമായ ഒരു വിഭവമാണിത്. തുളു ഭാഷയിൽ നീർ എന്നാൽ വെള്ളമെന്നാണ് അർത്ഥം. മൂന്നേ മൂന്നു ചേരുവകളാണ് ഈ ദോശ തയ്യാറാക്കാൻ ആവശ്യമുള്ളത്.

ചേരുവകൾ

  • പൊന്നി അരി അല്ലെങ്കിൽ സോനാ മസൂരി റോ റൈസ് – 1 കപ്പ്
  • തേങ്ങ ചിരകിയത് – 1/4 കപ്പ്
  • ഉപ്പ് – 1/2 ടീസ്പൂൺ
  • വെള്ളം – 2 കപ്പ് (ഏകദേശം)

തയ്യാറാക്കുന്ന വിധം

  • അരി കഴുകി 4-5 മണിക്കൂർ കുതിർത്ത് വയ്ക്കുക.
  • കുതിർത്ത അരിയും തേങ്ങ ചിരകിയതും ചേർത്ത് അൽപ്പം വെള്ളം ചേർത്ത് നന്നായി അരച്ചെടുക്കുക.
  • ഇത് ഒരു പാത്രത്തിലേക്ക് മാറ്റി ഏകദേശം 1 കപ്പ് വെള്ളവും ആവശ്യത്തിന് ഉപ്പും ചേർത്തിളക്കുക. പാൽ പരുവമാണ് മാവിന്റെ പാകം.
  • ഒരു നോൺസ്റ്റിക് പാൻ ചൂടാക്കി എണ്ണ പുരട്ടുക. കൈ അൽപ്പം ഉയർത്തി ഉയരത്തിൽ നിന്നും വേണം പാനിലേക്ക് മാവ് ഒഴിക്കാൻ.
  • നേർത്ത തീയിൽ 30 സെക്കൻഡ് മൂടിവച്ച് വേവിക്കുക. ശേഷം പാത്രത്തിലേക്ക് മാറ്റാം.
  • ചട്ണി, സാമ്പാർ എന്നിവയ്‌ക്കൊപ്പം കഴിക്കാം.

ഈ നുറുങ്ങുകൾ കൂടി ശ്രദ്ധിക്കൂ

  • അരി കുറഞ്ഞത് 4 മണിക്കൂറെങ്കിലും കുതിർക്കുക
  • അരക്കുമ്പോൾ അധികം വെള്ളം ചേർക്കരുത് അല്ലെങ്കിൽ അരി നന്നായി പൊടിഞ്ഞുകിട്ടില്ല.
  • മാവിന്റെ സ്ഥിരത വളരെ പ്രധാനമാണ്, അത് പാലിന്റെ കട്ടിയിൽ മതി.

Stay updated with the latest news headlines and all the latest Food news download Indian Express Malayalam App.

Web Title: Instant dosa recipe neer dosa easy recipe