അടുക്കളയിലെ ഈച്ചകളെ തുരത്താൻ ഒരു സ്പൂൺ കുരുമുളക് മതി, ഇങ്ങനെ ഉപയോഗിച്ചു നോക്കൂ

അടുക്കളയിലെ ഒരു സ്ഥിരം തലവേദനയാണ് ഈച്ചകൾ. പഴങ്ങളും പച്ചക്കറികളും സൂക്ഷിക്കുന്നിടത്തും, സിങ്കിനടുത്തുമെല്ലാം ഇവ കൂട്ടമായി പറന്നു നടക്കുന്നത് കാണാം. ഇവയെ തുരത്താൻ രാസവസ്തുക്കൾ ഉപയോഗിക്കുന്നതിനു പകരം, നമ്മുടെ അടുക്കളയിലെ തന്നെ സുലഭമായ കുരുമുളക് ഉപയോഗിച്ച് അതിന് പ്രതിവിധി കാണാം.

കുരുമുളകിൻ്റെ ശക്തമായ ഗന്ധവും എരിവും ഈച്ചകളെ അകറ്റി നിർത്തും. കുരുമുളകിൽ അടങ്ങിയിരിക്കുന്ന ചില സംയുക്തങ്ങൾ പ്രാണികളെ അകറ്റാൻ സഹായിക്കും.

ചേരുവകൾ

പാൽ, കുരുമുളക്, പഞ്ചസാര

തയ്യാറാക്കുന്ന വിധം

ഒരു കപ്പ് പാലെടുക്കാം. ഇതിലേയ്ക്ക് ഒരു ടേബിൾസ്പൂൺ പഞ്ചസാരയും രണ്ട് ടേബിൾസ്പൂൺ കുരുമുളക് പൊടിയും ചേർത്ത് 10 മിനിറ്റ് തിളപ്പിക്കാം. ഇത് തണുത്തതിനു ശേഷം ഈച്ച ശല്യം അമിതമായ ഇടങ്ങളിൽ തുറന്നു വയ്ക്കാം. പാലിൻ്റെയും പഞ്ചസാരയുടെയും മധുരം ഈച്ചകളെ അകർഷിക്കുമ്പോൾ കുരുമുളകിൻ്റെ സാന്നിധ്യം അവയ്ക്ക് കെണിയായി മാറുന്നു.

മറ്റൊരു വിദ്യ

പഴങ്ങൾ സൂക്ഷിക്കുന്നതിന് അടുത്തോ, സിങ്കിന് അടുത്തോ അൽപം കുരുമുളക് പൊടി വിതറുന്നതും ഈച്ചകളെ അകറ്റാൻ സഹായിക്കും. കൂടാതെ, പഴകിത്തുടങ്ങിയ പഴങ്ങൾ, പ്രത്യേകിച്ച് മുന്തിരി, വാഴപ്പഴം എന്നിവയുടെ തൊലികൾ കൃത്യമായി നീക്കം ചെയ്യുന്നതും ഈച്ച ശല്യം കുറയ്ക്കാൻ സഹായിക്കും.