ദം വേണ്ട, രുചിയിൽ ഞെട്ടിക്കുന്ന ലക്ഷദ്വീപ് ബിരിയാണി ഇനി വീട്ടിലും പാകം ചെയ്യാം

കടൽക്കാറ്റും നീലക്കടലും പവിഴദ്വീപുകളും മനസ്സിൽ നിറയ്ക്കുന്ന ലക്ഷദ്വീപിന് തനതായ ഒരു ഭക്ഷണസംസ്കാരമുണ്ട്. ആ ദ്വീപുരുചികളിൽ ഏറ്റവും പ്രധാനപ്പെട്ട ഒന്നാണ് 'ഇട്ടു ബെന്തത്' എന്ന് വിളിക്കപ്പെടുന്ന ലക്ഷദ്വീപ് സ്പെഷ്യൽ ബിരിയാണി. സാധാരണ ബിരിയാണികളിൽ നിന്ന് വ്യത്യസ്തമായി, വളരെ ലളിതമായ ചേരുവകൾ കൊണ്ട് പെട്ടെന്ന് തയ്യാറാക്കാൻ സാധിക്കുമെന്നതാണ് ഇതിന്റെ പ്രത്യേകത.

Also Read: കൊച്ചിൻ സ്റ്റൈൽ മസാല ഫിഷ്; കണ്ടുനിൽക്കുന്നവർ പോലും കൊതിച്ചുപോകും

ലക്ഷദ്വീപിലെ വീടുകളിൽ നിത്യേനയെന്നോണം തയ്യാറാക്കുന്ന ഈ വിഭവം മീൻ, ചിക്കൻ, ബീഫ് എന്നിവയെല്ലാം ഉപയോഗിച്ച് നിർമ്മിക്കാറുണ്ട്. എങ്കിലും കടൽ വിഭവങ്ങൾക്ക് പ്രാധാന്യമുള്ള അവിടെ ചൂര മീൻ ഉപയോഗിച്ചുള്ള ബിരിയാണിക്കാണ് ആരാധകർ ഏറെയുള്ളത്. ക്ഷദ്വീപിലെ സുഗന്ധവ്യഞ്ജനങ്ങളുടെയും തേങ്ങാപ്പാലിന്റെയും മനോഹരമായ ചേരുവ ഈ ബിരിയാണിയെ കൂടുതൽ സ്വാദിഷ്ടമാക്കുന്നു. ഷാഗി തന്റെ ഇൻസ്റ്റഗ്രാം പേജിലൂടെയാണ് ഇത് തയ്യാറാക്കുന്ന വിധം പരിചയപ്പെടുത്തി തരുന്നത്. 

ചേരുവകൾ

• ചൂരമീൻ-1/2 കിലോ
• മഞ്ഞൾപ്പൊടി-1/4 ടീസ്പൂൺ
• മുളകുപൊടി-2 ടേബിൾസ്പൂൺ
• ഉപ്പ്-1/2 ടീസ്പൂൺ
• എണ്ണ-3 ടേബിൾസ്പൂൺ
• സവാള- 3
• തക്കാളി-2
• ഇഞ്ചി, വെളുത്തുളളി- 1 ടേബിൾസ്പൂൺ
• പച്ചമുളക്-6
• മുളക് പൊടി-1 ടീസ്പൂൺ
• ബിരിയാണി മസാല-1 ടീസ്പൂൺ
• ചിക്കൻ മസാല-1 ടീസ്പൂൺ
• ഉപ്പ്-1 ടീസ്പൂൺ
• തേങ്ങാപ്പാൽ- 4.5 കപ്പ്
• പൊന്നി അരി- 2 കപ്പ്
• നെയ്യ്-1 ടേബിൾസ്പൂൺ
• ചുവന്നുള്ളി-5
• കറിവേപ്പില

Also Read: ആരോഗ്യവും രുചിയും ഒരുപോലെ; ഈ 6 കൂൺ വിഭവങ്ങൾ ട്രൈ ചെയ്യൂ

View this post on Instagram

A post shared by Shagi Ushakumar (@easy_cooking_island)

Also Read: തനിനാടൻ രുചിയിൽ ക്രിസ്പിയായിട്ട് ചിക്കൻ വറുത്തെടുക്കാം, ഈ മസാലക്കൂട്ട് മതി

തയ്യാറാക്കുന്ന വിധം

• ആദ്യമായി കഴുകി വൃത്തിയാക്കിയ ചൂരമീനിൽ മുളകുപൊടി, മഞ്ഞൾപ്പൊടി, ഉപ്പ് എന്നിവ പുരട്ടി പാനിൽ കുറഞ്ഞ എണ്ണയിൽ വറുത്തെടുക്കാം. ഒരു വലിയ കടായിൽ എണ്ണ ചൂടാക്കി സവാള, തക്കാളി, ഇഞ്ചി-വെളുത്തുള്ളി പേസ്റ്റ്, പച്ചമുളക് എന്നിവ നന്നായി വഴറ്റാം.
• ഇതിലേക്ക് മുളകുപൊടി, ചിക്കൻ മസാല, ബിരിയാണി മസാല എന്നിവ ചേർത്ത് മൂപ്പിക്കാം. മസാല തയ്യാറായാൽ വറുത്തുവെച്ച മീൻ കഷ്ണങ്ങൾ ചേർത്ത് നന്നായി ഇളക്കാം.
• ഇതിലേക്ക് നാലര കപ്പ് തേങ്ങാപ്പാൽ ഒഴിക്കാം. ഇത് തിളച്ചു വരുമ്പോൾ കഴുകി വെച്ചിരിക്കുന്ന രണ്ട് കപ്പ് പൊന്നി അരി ചേർത്ത് നന്നായി ഇളക്കി പാത്രം മൂടി വെക്കാം.
• മീഡിയം ഫ്ലേമിൽ 15 മിനിറ്റ് വേവിക്കുകയോ അല്ലെങ്കിൽ അരി പാകമാകുന്നത് വരെ കാത്തിരിക്കുകയോ ചെയ്യാം.
• അവസാനം മറ്റൊരു പാനിൽ നെയ്യ് ചൂടാക്കി ചുവന്നുള്ളിയും കറിവേപ്പിലയും താളിച്ച് ബിരിയാണിയുടെ മുകളിലേക്ക് ഒഴിക്കാം. സ്വാദിഷ്ടമായ ലക്ഷദ്വീപ് സ്പെഷ്യൽ ചൂര മീൻ ബിരിയാണി തയ്യാർ!

Read More: മുട്ട പുഴുങ്ങി കഴിച്ച് മടുത്തോ? ഇനി ഇതിലൊരു റെസിപ്പി ട്രൈ ചെയ്തു നോക്കൂ