അടുക്കള ഇനി സുഗന്ധത്താൽ നിറയും, വെള്ളം തിളപ്പിക്കുമ്പോൾ ഇത് ചേർക്കൂ

നമ്മുടെ വീട്ടകങ്ങളിൽ പലപ്പോഴും ഉണ്ടാകുന്ന ദുർഗന്ധം മാറ്റാൻ സാധാരണയായി നമ്മൾ എയർ ഫ്രഷ്‌നറുകൾ ഉപയോഗിക്കാറുണ്ട്. എന്നാൽ കൃത്രിമ ഗന്ധങ്ങളുള്ള ഇത്തരം ഉത്പന്നങ്ങൾക്ക് പകരം വീട്ടിലെ അന്തരീക്ഷം സുഗന്ധമുള്ളതാക്കാൻ ഒരു ലളിതമായ പ്രകൃതിദത്ത വഴിയുണ്ട്, ഓറഞ്ച് തൊലി തിളപ്പിക്കുക! ഓറഞ്ച് കഴിച്ച് കഴിഞ്ഞാൽ നമ്മൾ വലിച്ചെറിയുന്ന തൊലികൾ, നമ്മുടെ വീടിന് മുഴുവൻ നവോന്മേഷം നൽകാൻ കഴിവുള്ള അത്ഭുത ചേരുവയാണ്.

Also Read: കറകൾ പറ്റിപ്പിടിച്ച അടുക്കള സിങ്ക് ഇനി തിളങ്ങും, ഈ വിദ്യകൾ പരീക്ഷിക്കൂ

ഓറഞ്ച് തൊലിയിൽ ഉയർന്ന അളവിൽ ഡി-ലിമോണീൻ പോലുള്ള പ്രകൃതിദത്ത സിട്രസ് ഓയിലുകൾ അടങ്ങിയിട്ടുണ്ട്. വെള്ളത്തിൽ ഓറഞ്ച് തൊലിയിട്ട് തിളപ്പിക്കുമ്പോൾ, ആവി വഴി ഈ എണ്ണകൾ ബാഷ്പീകരിക്കപ്പെട്ട് അന്തരീക്ഷത്തിലേക്ക് പടരും. ഈ ഓയിലുകൾ വെറും സുഗന്ധം നൽകുക മാത്രമല്ല ചെയ്യുന്നത്. കടുപ്പമേറിയ മത്സ്യത്തിന്റെയോ, ഉള്ളിയുടെയോ, മറ്റ് പാചക ഗന്ധങ്ങളുടെയോ തന്മാത്രകളുമായി പ്രതിപ്രവർത്തിച്ച് അവയുടെ രൂക്ഷത കുറയ്ക്കുകയും ദുർഗന്ധം ഇല്ലാതാക്കുകയും ചെയ്യുന്നു.

ഈ നീരാവി മുറിയിൽ നിറയുമ്പോൾ, വീടിന്റെ അന്തരീക്ഷത്തിന് പെട്ടെന്ന് ഒരു ഫ്രഷ്നസ് ലഭിക്കുന്നു. അടുക്കളയിലെ ദുർഗന്ധങ്ങൾ പെട്ടെന്ന് മാറാനും, വീട്ടിൽ ഒരു ശാന്തമായ സുഗന്ധം നിലനിർത്താനും ഇത് സഹായിക്കും.

Also Read: ഈ പൊടി ഒരു നുള്ള് മതി, ഇനി അടുക്കള ഫ്രഷായിരിക്കാൻ കടുപ്പമേറിയ രാസവസ്തുക്കൾ വേണ്ട

ഒരു പാത്രത്തിൽ വെള്ളമെടുത്ത് അതിൽ കുറച്ച് ഓറഞ്ച് തൊലികൾ ഇടുക. തീ കുറച്ച്, ഇത് ചെറുതായി തിളപ്പിക്കുക. ആവശ്യമെങ്കിൽ കറുവപ്പട്ട, ഗ്രാമ്പൂ, റോസ്മേരി എന്നിവ ചേർത്ത് സുഗന്ധം വർധിപ്പിക്കാം. വെള്ളം വറ്റാതെ ശ്രദ്ധിക്കുക. 30 മിനിറ്റിനുള്ളിൽ വീട് മുഴുവൻ സുഗന്ധപൂരിതമാകും.

Also Read: പൊട്ടിപ്പോകില്ല, മുട്ട പെർഫക്ടായി പുഴുങ്ങിയെടുക്കാൻ ഇങ്ങനെ ചെയ്തു നോക്കൂ

ഓറഞ്ച് തൊലി കൊണ്ട് റൂം ഫ്രഷ്നർ

ചേരുവകൾ

• ഓറഞ്ച് തൊലികൾ- 2 അല്ലെങ്കിൽ 3
• വെള്ളം- 1.5 കപ്പ് 
• വെള്ള വിനാഗിരി- 1/4 കപ്പ് 

തയ്യാറാക്കുന്ന വിധം

• ഒരു പാനിൽ വെള്ളം ഒഴിച്ചു തിളപ്പിക്കാം. അതിലേയ്ക്ക് ഓറഞ്ച് തൊലി ചേർത്ത് 10 മിനിറ്റ് നന്നായി തിളപ്പിക്കാം. 
• തീ അണച്ചതിനു ശേഷം മിശ്രിതം തണുക്കാൻ മാറ്റി വയ്ക്കാം. 
• തണുത്തതിനു ശേഷം ഓറഞ്ച് തൊലികൾ മാറ്റി വയ്ക്കാം. 
• ശേഷം മിശ്രിതം ഒരു സ്പ്രേ ബോട്ടിലിലേയ്ക്കു മാറ്റാം. ആവശ്യെങ്കിൽ കുറച്ച് വിനാഗിരി കൂടി ചേർത്തിളക്കി യോജിപ്പിക്കാം. 
• ഈ പ്രകൃതിദത്ത സ്പ്രേ മുറികളിലോ കർട്ടനുകളിലോ സ്പ്രേ ചെയ്ത് വീടിന് സുഗന്ധം നൽകാം.

Read More: തേയില 2 സ്പൂൺ മതി, ഇനി അടുക്കളയിൽ ഒളിഞ്ഞിരിക്കുന്ന പാറ്റകളെയും പല്ലികളെയും തുരത്താം