കൂടുതൽ പോഷകങ്ങൾ ലഭിക്കാൻ മുട്ട ഇനി ഇങ്ങനെ പാകം ചെയ്യൂ

പാചകം ചെയ്യുമ്പോൾ പോഷകങ്ങൾക്കുണ്ടാകുന്ന മാറ്റങ്ങളെക്കുറിച്ച് പി.എം.സി (PMC) പ്രസിദ്ധീകരിച്ച പഠനത്തിൽ താപനിലയും പാചക രീതിയും മുട്ടയിലെ പോഷകങ്ങളെ ശരീരം എത്രത്തോളം ആഗിരണം ചെയ്യുന്നതിനെ സ്വാധീനിക്കുന്നുവെന്ന് പറയുന്നുണ്ട്. വിറ്റാമിൻ ബി12 കൂടുതലായും കാണപ്പെടുന്നത് മുട്ടയുടെ മഞ്ഞക്കരുവിലാണ്, വെള്ളയിലല്ല. ഉയർന്ന താപനിലയിലുള്ള അമിതമായ പാചകം ഈ വിറ്റാമിന് ഇഷ്ടമല്ല. മഞ്ഞക്കരു കട്ടികൂടി ഡ്രൈ ആകുന്ന രീതിയിൽ മുട്ട പുഴുങ്ങിയാൽ അതിലെ വിറ്റാമിൻ അളവ് കുറയാൻ സാധ്യതയുണ്ട്.

മുട്ട പുഴുങ്ങാം

മുട്ട പുഴുങ്ങുന്നത് ലളിതമായ കാര്യമായി തോന്നാം, എന്നാൽ വെള്ളത്തിലിട്ട് ഒരുപാട് നേരം തിളപ്പിക്കാതിരിക്കുന്നതിലാണ് കാര്യം. ബി12 കൂടുതൽ ലഭിക്കാൻ വെള്ളം തിളച്ച ശേഷം മുട്ടകൾ പതുക്കെ അതിലേക്കിടുക. തീ കുറച്ച് വെച്ച് വെള്ളം പതുക്കെ തിളയ്ക്കുന്ന രീതിയിൽ വേവിക്കാം. ഏകദേശം 6 മിനിറ്റ് വേവിച്ചാൽ മൃദുവായ മഞ്ഞക്കരു ലഭിക്കും, 8 മുതൽ 9 മിനിറ്റ് വരെയായാൽ മീഡിയം പാകമാകും. 15 മിനിറ്റിൽ കൂടുതൽ വേവിച്ചാൽ മഞ്ഞക്കരു ഉണങ്ങിപ്പോകും. പാത്രത്തിൽ നിന്ന് എടുത്താലുടൻ തണുത്ത വെള്ളത്തിലിടുന്നത് അമിതമായി വേവുന്നത് തടയുകയും മഞ്ഞക്കരു ക്രീം പോലെ നിലനിർത്താൻ സഹായിക്കുകയും ചെയ്യും. മൃദുവായ മഞ്ഞക്കരു എന്നാൽ കൂടുതൽ പോഷകങ്ങൾ എന്നാണ് അർത്ഥം.

മുട്ട പോച്ച് ചെയ്യാം

മുട്ട പോച്ച് ചെയ്യുന്നത് തുടക്കക്കാർക്ക് അല്പം പേടിയുള്ള കാര്യമാണെങ്കിലും ശീലിച്ചാൽ ഇത് വളരെ എളുപ്പമാണ്. വെള്ളം ചെറുതായി തിളച്ചു തുടങ്ങുമ്പോൾ ഒരു കപ്പിൽ മുട്ട പൊട്ടിച്ച ശേഷം പതുക്കെ വെള്ളത്തിലേക്ക് ഒഴിക്കുക. വെള്ള ഭാഗം കട്ടിയായാലുടൻ അത് കോരിയെടുക്കാം. കുറഞ്ഞ സമയം മാത്രം വെള്ളത്തിൽ കഴിയുന്നതിനാൽ വിറ്റാമിനുകൾ നഷ്ടപ്പെടില്ല. എണ്ണമയമുള്ള ആഹാരം ഇഷ്ടപ്പെടാത്തവർക്ക് പോച്ച് ചെയ്ത മുട്ട മികച്ച ഓപ്ഷനാണ്.

വറുക്കാം

കൂടിയ ചൂടിൽ മുട്ട വറുക്കുന്നത് വിറ്റാമി​ൻ ബി12 നശിപ്പിക്കും. എന്നാൽ കുറഞ്ഞ ചൂടിൽ വറുക്കുന്നത് ഗുണകരമാണ്. പാൻ ചെറുതായി ചൂടാക്കി അല്പം എണ്ണയൊഴിച്ച് തീ കുറച്ച് മുട്ട പൊട്ടിച്ചൊഴിക്കാം. വെള്ള ഭാഗം സെറ്റ് ആകുമ്പോൾ തീ ഓഫ് ചെയ്യാം. ഒരു നിമിഷം പാൻ അടച്ചുവെച്ചാൽ ആവിയിൽ മഞ്ഞക്കരു പാകമാകും. ഇത് രുചിയും പോഷകവും ഒരുപോലെ നൽകുന്നു.

മുട്ട ആവിയിൽ വേവിക്കാം

ആവിയിൽ വേവിക്കുന്നത് മുട്ടയിലെ ഈർപ്പവും പോഷകങ്ങളും നിലനിർത്താനുള്ള ഏറ്റവും നല്ല മാർഗ്ഗമാണ്. ചൂട് പ്രതിരോധിക്കുന്ന കപ്പുകളിലോ പ്ലേറ്റിലോ മുട്ട ഒഴിച്ച് സ്റ്റീമറിൽ വെക്കാം. ഏഷ്യൻ വിഭവങ്ങളിൽ ഇത് ധാരാളമായി ഉപയോഗിക്കാറുണ്ട്. നേരിട്ടുള്ള ഉയർന്ന ചൂട് ഏൽക്കാത്തതിനാൽ പോഷകങ്ങൾ ഇതിൽ സുരക്ഷിതമായിരിക്കും.

DISCLAIMER

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.