കോളിഫ്ലവറിലെ പുഴുക്കളെയും അഴുക്കിനെയും പേടിക്കണ്ട; ഇതാ ചില എളുപ്പവഴികൾ

രുചികരമായ ഗോപി മഞ്ചൂരിയനോ ആവി പറക്കുന്ന ഗോപി പൊരിച്ചതോ ഒക്കെ കാണുമ്പോൾ ആർക്കാണ് കൊതി വരാത്തത്? എന്നാൽ കോളിഫ്ലവർ പാകം ചെയ്യാൻ എടുക്കുമ്പോൾ മിക്ക വീട്ടമ്മമാരെയും അലട്ടുന്ന പ്രധാന പ്രശ്നം അതിനുള്ളിലെ ഒളിച്ചിരിക്കുന്ന പുഴുക്കളും കീടനാശിനിയുടെ അംശവുമാണ്. എത്ര കഴുകിയാലും ഇവ പൂർണ്ണമായും പോകുമോ എന്ന ആശങ്ക പലർക്കുമുണ്ട്. കോളിഫ്ലവർ വൃത്തിയാക്കുമ്പോൾ ശ്രദ്ധിക്കേണ്ട ചില ലളിതമായ 'കിച്ചൺ ഹാക്കുകൾ' അറിഞ്ഞിരിക്കാം.

Also Read: ശരീരഭാരം കുറയ്ക്കണോ? ബ്രേക്ക്ഫാസ്റ്റിനൊപ്പം ഇത് കുടിക്കൂ

1. കഷ്ണങ്ങളാക്കാം 

കോളിഫ്ലവർ മുഴുവനായി കഴുകുന്നതിനേക്കാൾ നല്ലത് അത് ചെറിയ കഷ്ണങ്ങളായി മുറിച്ച ശേഷം കഴുകുന്നതാണ്. ഇതിലൂടെ ഉൾഭാഗങ്ങളിൽ ഒളിച്ചിരിക്കുന്ന പുഴുക്കളെയും അഴുക്കിനെയും എളുപ്പത്തിൽ കണ്ടെത്താൻ സാധിക്കും. എന്നാൽ കഷ്ണങ്ങൾ അധികം ചെറുതാവാതെ ശ്രദ്ധിക്കണം.

2. ഉപ്പും മഞ്ഞൾപ്പൊടിയും ചേർത്ത വെള്ളം

ഒരു വലിയ പാത്രത്തിൽ ചെറുചൂടുവെള്ളം എടുക്കുക (തിളച്ച വെള്ളം ആവരുത്). അതിലേക്ക് രണ്ട് ടീസ്പൂൺ ഉപ്പും അര ടീസ്പൂൺ മഞ്ഞൾപ്പൊടിയും ചേർക്കുക. ഉപ്പ് പുഴുക്കളെ പുറത്തു കൊണ്ടുവരാൻ സഹായിക്കുമ്പോൾ, മഞ്ഞൾപ്പൊടി ഒരു സ്വാഭാവിക അണുനാശിനിയായി പ്രവർത്തിക്കുന്നു.

Also Read: ഊർജ്ജവും ഉന്മേഷവും നേടാൻ മധുരക്കിഴങ്ങ്, ഇവയിൽ ഒരു റെസിപ്പി ട്രൈ ചെയ്യൂ

3. വിനാഗിരിയുടെ ഗുണം

നിങ്ങൾ വാങ്ങിയ കോളിഫ്ലവർ കൂടുതൽ അഴുക്കുള്ളതാണെന്ന് തോന്നുന്നുണ്ടെങ്കിൽ വെള്ളത്തിൽ ഒരു ടേബിൾ സ്പൂൺ വിനാഗിരി കൂടി ചേർക്കാവുന്നതാണ്. ഇത് കീടനാശിനികളുടെ അംശം കുറയ്ക്കാൻ ഏറെ ഫലപ്രദമാണ്.

4. കുതിർത്തു വെക്കാം

തയ്യാറാക്കി വെച്ചിരിക്കുന്ന ഈ ലായനിയിൽ കോളിഫ്ലവർ കഷ്ണങ്ങൾ ഏകദേശം 15-20 മിനിറ്റ് മുക്കി വെക്കുക. കുറച്ചു സമയം കഴിയുമ്പോൾ പുഴുക്കളും മറ്റും മുകളിലേക്ക് പൊങ്ങി വരുന്നത് കാണാം. ശേഷം ഈ വെള്ളം കളഞ്ഞ് നല്ല തണുത്ത വെള്ളത്തിൽ ഒന്നുകൂടി കഴുകിയെടുക്കാം.

Also Read:സൗന്ദര്യത്തിനും ആരോഗ്യത്തിനും ഒരുപോലെ മികച്ചത്, ഇനി പാലിനു പകരം ഇത് കുടിച്ച് ദിവസം തുടങ്ങൂ

5. ഉണക്കിയ ശേഷം പാകം ചെയ്യാം

കഴുകിയെടുത്ത കോളിഫ്ലവർ ഒരു കോട്ടൺ തുണിയിലോ ടിഷ്യൂ പേപ്പറിലോ നിരത്തി വെച്ച് വെള്ളം പൂർണ്ണമായും കളയുക. വെള്ളം ഉണ്ടെങ്കിൽ വറുക്കുമ്പോഴോ മറ്റോ കോളിഫ്ലവർ അധികം കുഴഞ്ഞു പോകാൻ സാധ്യതയുണ്ട്.

Read More: കേടാകില്ല പൂപ്പൽ പിടിക്കില്ല, നാരങ്ങ അച്ചാർ രുചികരമാക്കാനുള്ള രഹസ്യക്കൂട്ട് ഇതാ