മുട്ട എത്ര സമയം വേവിക്കണം?

പോഷകസമൃദ്ധമായ മുട്ട നിത്യജീവിതത്തിന്റെ ഭാഗമാണ്. പ്രോട്ടീന്‍ ഉള്‍പ്പടെയുള്ള നിരവധി അവശ്യപോഷകങ്ങൾ മുട്ടയില്‍ അടങ്ങിയിട്ടുണ്ട്. കറിവെക്കാനും ഓംലെറ്റ് ആക്കാനും പുഴുങ്ങി കഴിക്കാനുമെല്ലാം നല്ലതാണ് ഈ സൂപ്പർഫുഡ്.

എന്നാല്‍, മുട്ട പുഴുങ്ങുമ്പോള്‍ എത്ര സമയം വേവിക്കണം എന്ന കാര്യത്തിൽ പലർക്കും സംശയം കാണും. ചിലപ്പോൾ വേവ് കൂടിപ്പോവാം, അല്ലെങ്കിൽ വേണ്ടത്ര വെന്തുകാണില്ല.

കൃത്യമായി മുട്ട പുഴുങ്ങുന്നത് എങ്ങനെ? പ്രമുഖ ഷെഫായ പങ്കജ് ബദൗരിയ്യ പങ്കുവയ്ക്കുന്ന ഈ ടിപ്സ് പരിചയപ്പെടൂ.

മുട്ട പുഴുങ്ങുന്ന വെള്ളം ചെറുതായി ചൂടാവുമ്പോൾ ഇതിലേക്ക് അൽപ്പം ഉപ്പിടുക. മുട്ട പുഴുങ്ങാനുള്ള വെള്ളത്തിലേക്ക് ഉപ്പിനു പകരം വിനാഗിരി ഒഴിച്ചാലും മുട്ട പൊട്ടാതെ കിട്ടും. ശേഷം വേണം മുട്ടയിടാൻ. മുട്ട നേരിട്ട് വെള്ളത്തിലേക്ക് ഇടാതെ, സ്പൂൺ ഉപയോഗിച്ച് പതിയെ ഇറക്കിവയ്ക്കുന്നതാണ് നല്ലത്.

വെള്ളം നന്നായി തിളച്ചശേഷം തീ കുറച്ച് വെച്ച് വേവിക്കുക. മൃദുവായി പുഴുങ്ങിയെടുത്താൽ മതിയെങ്കിൽ ആറ് മിനിറ്റ് വേവിച്ചാൽ മതിയാവും.

അതല്ല മുട്ടയുടെ മഞ്ഞക്കരു അൽപ്പം കൂടി ഉറക്കണമെന്നുണ്ടെങ്കിൽ 9 മിനിറ്റ് ചെറുതീയില്‍ പുഴുങ്ങിയെടുക്കുക.

മുട്ട എത്ര സമയം വേവിക്കുന്നുവോ അതിനു അനുസരിച്ച് മുട്ടയുടെ മഞ്ഞക്കരുവിന് സംഭവിക്കുന്ന മാറ്റങ്ങൾ ഈ ചിത്രത്തിൽ നിന്നും മനസ്സിലാവാം.

എന്തായാലും, മിനിമം 7 മിനിറ്റെങ്കിലും മുട്ട വേവിക്കുന്നതാണ് ഉചിതം.