തേയില 2 സ്പൂൺ മതി, ഇനി അടുക്കളയിൽ ഒളിഞ്ഞിരിക്കുന്ന പാറ്റകളെയും പല്ലികളെയും തുരത്താം

നമ്മുടെ വീടിന്റെ, പ്രത്യേകിച്ച് അടുക്കളയുടെ ശുചിത്വം എന്നത് വളരെ പ്രധാനപ്പെട്ട കാര്യമാണ്. എന്നാൽ, വൃത്തിയായി സൂക്ഷിച്ചിട്ടും ചില അനാവശ്യ അതിഥികൾ അടുക്കളയിൽ ശല്യക്കാരായി വരാറുണ്ട്. പല്ലികളും പാറ്റകളുമാണ് അതിൽ പ്രധാനം. പാചകം ചെയ്യുന്ന സ്ഥലത്തും, പാത്രങ്ങൾക്കിടയിലും, ഭക്ഷണസാധനങ്ങളുടെ അടുത്തും ഇവയുടെ സാന്നിധ്യം ഉണ്ടാകുന്നത് നമ്മുടെ ആരോഗ്യത്തിന് വലിയ വെല്ലുവിളിയാണ്.

രാത്രികാലങ്ങളിൽ പാറ്റകൾ പുറത്തിറങ്ങുന്നതും, ഭിത്തിയിൽ ഓടിനടക്കുന്ന പല്ലികളും ഭൂരിഭാഗം ആളുകൾക്കും അരോചകമായ കാഴ്ചയാണ്. ഇവയെ തുരത്താൻ വേണ്ടി വിപണിയിൽ ലഭ്യമായ കെമിക്കൽ ഉൽപന്നങ്ങൾ ഉപയോഗിക്കുന്നത് നമ്മുടെ ആരോഗ്യത്തെ വീണ്ടും ദോഷകരമായി ബാധിച്ചേക്കാം. അടുക്കള വൃത്തിയാക്കുന്നതോടൊപ്പം ഇവയുടെ ശല്യം ഒഴിവാക്കാൻ ഒരു മിശ്രിതം കൂടി തയ്യാറാക്കി സൂക്ഷിച്ചോളൂ.

ചേരുവകൾ

തേയിലപ്പൊടി- 2 ടീസ്പൂൺ, ടൂത്ത്പേസ്റ്റ്- 1 സ്പൂൺ, ബേക്കിംഗ് സോഡ- 1 സ്പൂൺ, ബേക്കിംഗ് പൗഡർ- 1 സ്പൂൺ

തയ്യാറാക്കുന്ന വിധം

ഒരു പാത്രത്തിൽ രണ്ട് ടീസ്പൂൺ തേയിലപ്പൊടിയെടുക്കാം. അതിലേയ്ക്ക് ഒരു സ്പൂൺ ടൂത്ത് പേസ്റ്റ്, ഒരു സ്പൂൺ ബേക്കിംഗ് സോഡ, ഒരു സ്പൂൺ ബേക്കിംഗ് പൗഡർ എന്നിവ ചേർത്തിളക്കി യോജിപ്പിക്കാം. ഈ മിശ്രിതം ചെറിയ ഉരുളകളാക്കാം. ഇതിൻ്റെ മണം പല്ലികളെയും പാറ്റകളെയും ആകർഷിക്കും. എന്നാൽ അവയുടെ ദഹനവാളത്തെ നശിപ്പിക്കാൻ ഈ മിശ്രിതത്തിന് കഴിയും.

ഉപയോഗിക്കേണ്ട വിധം

ചെറിയ ഉരുളകൾ അടുക്കളയിലെ ക്യാമ്പിനുകളിൽ വയ്ക്കാം. പാറ്റയും പല്ലിയും അമിതമായുള്ളിടത്തു വയ്ക്കാം. ഈ ചെറിയ ഉരുളകൾ തയ്യാറാക്കാൻ സമയമില്ലെങ്കിൽ തേയില വെള്ളം തിളപ്പിച്ച് അതിലേയ്ക്ക് ബേക്കിംഗ് സോഡയും ബേക്കിംഗ് പൗഡറും ചേർത്ത് യോജിപ്പിച്ച് അരിച്ചെടുക്കാം. ഈ മിശ്രിതം ഒരു സ്പ്രേ കുപ്പിയിലേയ്ക്കു മാറ്റി ഉപയോഗിക്കാവുന്നതാണ്. ഈ മിശ്രിതം പല്ലിയുടെയും പാറ്റയുടെയും ശല്യം അമിതമായുള്ളിടത്ത് സ്പ്രേ ചെയ്യാം.