എരിവില്ലാതെ കൊതിയോടെ കഴിക്കാം ഈ പച്ചമുളക് ചമ്മന്തി

ചോറും ചമ്മന്തിയും കേരളീയരുടെ തനത് ഭക്ഷണരീതിയുടെ ഭാഗമാണ്.  തേങ്ങയും, പച്ചമാങ്ങയും, ചുവന്നുള്ളിയും ഉൾപ്പെടെ ചമ്മന്തി തന്നെ പലവിധമുണ്ട്. എന്നാൽ പച്ചമുളക് ചമ്മന്തിയെക്കുറിച്ച് കേട്ടിട്ടുണ്ടോ?.

പച്ചമുളകെന്നു കേൾക്കുമ്പോൾ എരിവാണ് സാധാരണ ഓർമ്മ വരാറുള്ളത്. ഇതുപയോഗിച്ച്  ചമ്മന്തി ആകുമ്പോൾ ചിന്തിക്കുകയേ വേണ്ട എന്നു കരുതാൻ വരട്ടെ. എരിവില്ലാതെ നാവിൽ കൊതിയൂറുന്ന രുചിയിൽ ചമ്മന്തി തയ്യാറാക്കിയെടുക്കാം.

ഒരു പാൻ അടുപ്പിൽ വെച്ച്  രണ്ട് ടേബിൾസ്പൂൺ എണ്ണയൊഴിച്ചു ചൂടാക്കി എരിവ് അധികമില്ലാത്ത പച്ചമുളക് ചേർത്ത് ഇളക്കുക.

ഇതിലേയ്ക്ക് പത്ത് ചുവന്നുള്ളി, എട്ട് വെളുത്തുള്ളി അല്ലി, ചെറുനാരങ്ങ വലിപ്പത്തിലുള്ള വാളംപുളി, അൽപ്പം കറിവേപ്പില എന്നിവ ചേർത്തു വഴറ്റുക.

ആവശ്യത്തിന് ഉപ്പ് കൂടി ചേർത്തിളക്കി അടുപ്പിൽ നിന്നും മാറ്റി ചൂടാറിയതിനു ശേഷം അരച്ചെടുക്കുക. പച്ചമുളക് ചമ്മന്തി തയ്യാർ.