ഒരു മുറി നാരങ്ങ മതി, അടുക്കള സിങ്ക് ക്ലീൻ ചെയ്യാം ദുർഗന്ധം അകറ്റം

അടുക്കളയിലെ സിങ്ക് അടഞ്ഞുപോകുന്നത് അലോസരപ്പെടുത്തുന്ന പ്രധാന പ്രശ്നങ്ങളിലൊന്നാണ്. പാത്രം കഴുകുമ്പോൾ അവശേഷിക്കുന്ന ഭക്ഷണാവശിഷ്ടങ്ങളും, എണ്ണമയവും, കൊഴുപ്പും സിങ്കിന്റെ പൈപ്പുകളിൽ അടിഞ്ഞുകൂടുന്നത് മൂലമാണ് സാധാരണയായി ഇത്തരം തടസ്സങ്ങൾ ഉണ്ടാകുന്നത്. ഇത് വെള്ളം ഒഴുകിപ്പോകുന്നത് തടയുക മാത്രമല്ല, അടുക്കളയിലാകെ അസഹനീയമായ ദുർഗന്ധം പരത്താനും കാരണമാകുന്നു.

പലപ്പോഴും ഈ പ്രശ്നം പരിഹരിക്കാൻ ഒരു പ്ലംബറെ വിളിക്കുന്നതാണ് പതിവ്. എന്നാൽ തിരക്കുള്ള സമയങ്ങളിൽ പ്ലംബറെ കാത്തിരിക്കുന്നതും വലിയൊരു തുക ഇതിനായി ചെലവാക്കുന്നതും പ്രായോഗികമല്ല. വിപണിയിൽ ലഭിക്കുന്ന വീര്യം കൂടിയ രാസവസ്തുക്കൾ ഉപയോഗിച്ച് ക്ലീൻ ചെയ്യുന്നത് പൈപ്പുകൾക്ക് കേടുപാടുകൾ വരുത്താനും സാധ്യതയുണ്ട്. എന്നാൽ അധികം പണച്ചെലവില്ലാതെ നമ്മുടെ വീട്ടിലുള്ള ചില സാധനങ്ങൾ ഉപയോഗിച്ച് തന്നെ ഈ പ്രശ്നം പരിഹരിക്കാവുന്നതാണ്.

ചേരുവകൾ

നാരങ്ങ- 1, ബേക്കിംഗ് സോഡ- 2 ടേബിൾസ്പൂൺ, ഷാംപൂ, ചൂടുവെള്ളം

ഉപയോഗിക്കേണ്ട വിധം

അടുക്കള സിങ്കിലേയ്ക്ക് ബേക്കിംഗ് സോഡ വിതറാം. പിന്നീട് ഇതിലേയ്ക്ക് നാരങ്ങ നീര് പിഴിഞ്ഞൊഴിക്കാം. അൽപം ഷാംപൂ ഇതിലേയ്ക്ക് ഒഴിക്കാം. ഒരു മിനിറ്റിനു ശേഷം അൽപം ചൂടുവെള്ളം ഇതിലേയ്ക്ക് ഒഴിച്ചു കൊടുക്കാം.

ഗുണങ്ങൾ

ഇത് സ്വാഭാവികമായും സിങ്ക് അടഞ്ഞു പോകുന്നതു തടയുന്നു. ഒപ്പം ദുർഗന്ധം നീക്കം ചെയ്ത് സിങ്ക് പുതിയതു പോലെ തിളക്കമുള്ളതാക്കും. കഠിനമായ രാസവസ്തുക്കൾ ഇല്ലാത്തതിനാൽ സിങ്കിന് കേടുപാടുകൾ സംഭവിക്കില്ല. ആഴ്ചയിൽ ഒരിക്കൽ ഇത് ഉപയോഗിക്കാം.