മലയാളികൾക്ക് ഏറെയിഷ്ടമായ ബ്രേക്ക്ഫാസ്റ്റുകളിൽ ഒന്നാണ് പുട്ട്. നല്ല
ആവി പറക്കുന്ന പുട്ടും കറിയും പപ്പടവും കഴിക്കാൻ ഇഷ്ടമില്ലാത്തവർ വിരളമായിരിക്കും. അൽപ്പം വ്യത്യസ്തമായൊരു പുട്ട് തയ്യാറാക്കി നോക്കിയാലോ? ജിബിനാസ് പരിചയപ്പെടുത്തുന്ന ഈ അയലപ്പുട്ട് ഒന്നു പരീക്ഷിച്ചു നോക്കൂ.
ചേരുവകൾ
- അരിപ്പൊടി- ആവശ്യത്തിന്
- അയല- 3 എണ്ണം
- മഞ്ഞൾപൊടി- ആവശ്യത്തിന്
- ഉപ്പ്- ആവശ്യത്തിന്
- വാളൻപ്പുളി- ഒരു ചെറിയ ഉരുള
- തേങ്ങ- അരമുറി
- ഇഞ്ചി- ഒരു ചെറിയ കഷ്ണം
- വെളുത്തുള്ളി- 6 അല്ലി
- ചുവന്ന മുളക്- 4
- ഉലുവ- അര ടീസ്പൂൺ
- കറിവേപ്പില – ആവശ്യത്തിന്
- ജീരകം – അര ടീസ്പൂൺ
- പച്ചമുളക്- 1
- കുരുമുളക് പൊടി- കാൽ ടീസ്പൂൺ
- ചെറിയ ഉള്ളി- 150 ഗ്രാം
തയ്യാറാക്കുന്ന വിധം
- നന്നായി കഴുകി വൃത്തിയാക്കിയ അയലയിലേക്ക് അൽപ്പം വെള്ളം ഒഴിച്ച്, മഞ്ഞൾപൊടി, ഉപ്പ്, പുളി വെള്ളം എന്നിവ ചേർത്ത് വേവിച്ചെടുക്കുക. വെന്തു കഴിയുമ്പോൾ, മുള്ളില്ലാതെ അയലയുടെ മാംസം മാത്രം അടർത്തിയെടുക്കുക.
- ഒരു മിക്സി ജാറിൽ തേങ്ങ, ഇഞ്ചി, വെളുത്തുള്ളി, പച്ചമുളക്, ജീരകം എന്നിവ അരച്ചെടുക്കുക.
- ഒരു പാനിൽ എണ്ണയൊഴിച്ച് ഉലുവ പൊട്ടിച്ച് അതിലേക്ക് ചുവന്ന മുളക് ചേർക്കുക. അതിലേക്ക് ചെറിയ ഉള്ളിയും കറിവേപ്പിലയും ചേർത്ത് വഴറ്റുക. ഇതിലേക്ക് വേവിച്ചു വച്ച അയല ചേർക്കുക. കുരുമുളകുപൊടിയും അരച്ചുവച്ച തേങ്ങയും മഞ്ഞൾപൊടിയും ഉപ്പും ചേർത്ത് ഒന്ന് വേവിച്ചെടുക്കുക.
- ഇനി പുട്ടുകുറ്റിയെടുത്ത് പുട്ടുപൊടി നിറയ്ക്കുക. പീരയ്ക്ക് പകരം തയ്യാറാക്കി വച്ച അയല മസാലയിടാം. ശേഷം ആവിയിൽ വേവിച്ചെടുക്കുക.
Read more: എളുപ്പത്തിൽ തയ്യാറാക്കാം മുരിങ്ങയില മുട്ട തോരൻ
