FIFA World Cup : ഫിഫ ലോകകപ്പിലെ ഗ്രൂപ്പ് ജി മത്സരത്തില്‍ പനാമാക്കുമേല്‍ ഇംഗ്ലണ്ടിന്റെ . ഒന്നിനെതിരെ ആറ് ഗോളുകള്‍ക്കാണ് ഇംഗ്ലണ്ടിന്റെ വിജയം. നായകന്‍ ഹാരി കേന്‍ ഹാട്രിക് നേടിയ മത്സരത്തില്‍ സെന്റര്‍ ബാക്ക് സ്റ്റോണ്‍സ് രണ്ടും ലിങ്കാര്‍ഡ് ഒരു ഗോളും നേടി. ബലോയ് ആണ് പനാമയ്ക്ക് വേണ്ടി ആശ്വാസ ഗോള്‍ നേടിയത്.

തുടക്കം മുതല്‍ ഇംഗ്ലീഷ് പട സര്‍വാധിപത്യം പുലര്‍ത്തിയ മത്സരത്തില്‍ സൗത്ത് ഗേറ്റിന്റെ പട അക്രമ ഫുട്ബോളാണ് പുറത്തെടുത്തത്. എട്ടാം മിനുട്ടില്‍ കോര്‍ണര്‍ കിക്കിലൂടെ മാഞ്ചസ്റ്റര്‍ സിറ്റി താരം സ്റ്റോണ്‍സ് ഹെഡ്ഡര്‍ ഗോള്‍ കണ്ടെത്തി. ഇരുപത്തിരണ്ടാം മിനുട്ടില്‍ ലിങ്കാര്‍ഡിനെ പെനാല്‍റ്റി ബോക്സില്‍ ഫൗള്‍ ചെയ്തതിനെ തുടര്‍ന്ന് ലഭിച്ച പെനാല്‍റ്റി കിക്കിലാണ് ഹാരി കേന്‍ തന്റെ ആദ്യ ഗോള്‍ കണ്ടെത്തിയത്. മുപ്പത്തിയാറാം മിനുട്ടില്‍ ലിങ്കാര്‍ഡ് ലോകകപ്പിലെ തന്റെ ആദ്യ ഗോള്‍ കണ്ടെത്തി.

നാല്‍പതാം മിനുട്ടില്‍ മറ്റൊരു പന്ത് പനാമാ പോസ്റ്റിലേക്ക് ഹെഡ് ചെയ്ത് കൊണ്ട് ഇംഗ്ലീഷ് സെന്റര്‍ ബാക്ക് തന്റെ രണ്ടാം ഗോള്‍ നേടി. ആദ്യപകുതിയുടെ അധികസമയത്തില്‍ ആദ്യ പെനാല്‍റ്റിയുടെ ആവര്‍ത്തനമായി ഹാരി കേനിന്റെ മറ്റൊരു ഗോള്‍.

ആദ്യ പകുതിയില്‍ തന്നെ അഞ്ച് ഗോള്‍ പിറന്ന മത്സരത്തില്‍ യാതൊരു സമ്മര്‍ദവുമില്ലാതെയാണ് ഇംഗ്ലണ്ട് രണ്ടാം പകുതിയിലേക്ക് ഇറങ്ങിയത്. അറുപത്തിരണ്ടാം മിനുട്ടില്‍ തന്റെ ഹാട്രിക് പൂര്‍ത്തിയാക്കിക്കൊണ്ട് റഷ്യന്‍ ലോകകപ്പിലെ ടോപ്‌സ്കോററായി ഹാരി കേന്‍. പോര്‍ച്ചുഗലിന്റെ ക്രിസ്ത്യാനോ റൊണാള്‍ഡോയേയും ബെല്‍ജിയത്തിന്റെ ലുക്കാകുവിനെയും കടത്തിവെട്ടിയാണ് ഹാരി കേന്‍ റഷ്യയിലെ ടോപ്‌സ്കോററായത്.

രണ്ടാം പകുതിയില്‍ ഒരു പരിധിവരെ ഇംഗ്ലീഷ് പ്രതിരോധത്തെ തടഞ്ഞു നിര്‍ത്തുന്ന പ്രകടനമായിരുന്നു പനാമ പുറത്തെടുത്തത്. എഴുപത്തിയെട്ടാം മിനുട്ടില്‍ പകരക്കാരനായിവന്ന ബലോയ് പനാമയ്ക്ക് വേണ്ടി ആദ്യ ഗോളും നേടി.

Get all the Latest Malayalam News and Kerala News at Indian Express Malayalam. You can also catch all the Latest News in Malayalam by following us on Twitter and Facebook