അഫ്ഗാൻ അഭയാർത്ഥികളെ സ്വീകരിക്കുന്നത് ഏതെല്ലാം രാജ്യങ്ങൾ

ആഗസ്റ്റ് 15 ന് കാബൂൾ താലിബാൻ ഏറ്റെടുത്തതോടെ ഇസ്ലാമിക സായുധ സംഘടനയുടെ ആസന്നമായ ഭരണത്തിൽ നിന്ന് രക്ഷപ്പെടാനുള്ള ശ്രമത്തിൽ നൂറുകണക്കിന് അഫ്ഗാനികളാണ് ഹമീദ് കർസായി അന്താരാഷ്ട്ര വിമാനത്താവളത്തിലേക്ക് കുതിച്ചത്. എയർപോർട്ടിൽ വിമാനത്തിൽ കയറിപ്പറ്റാനായി ശ്രമിക്കുന്ന നൂറുകണക്കിന് പേരുടെ ദൃശ്യങ്ങൾ പുറത്തുവന്നു. കാബൂളിൽ നിന്ന് പുറപ്പെടുന്ന ഒരു വിമാനത്തിന്റെ ചക്രങ്ങളുടെ ഭാഗത്തുകൂടെ പിടിച്ചു കയറിയെങ്കിലും പുറത്ത് കടക്കാനും പലരും ശ്രമിച്ചു.

ഈ സാഹചര്യം അഫ്ഗാൻ പൗരന്മാരുടെ ഭാവിയിൽ അനിശ്ചിതത്വത്തിന്റെ നിഴൽ വീഴ്ത്തുകയും ചില രാജ്യങ്ങൾ അഫ്ഗാൻ അഭയാർത്ഥികളെ സ്വീകരിക്കുന്നതിനുള്ള നയം പ്രഖ്യാപിക്കുകയും ചെയ്തു. ഈ നയങ്ങളിൽ ചിലത് എന്താണെന്ന് പരിശോധിക്കാം.

ലോകത്താകെയുള്ള അഭയാർത്ഥികൾ

2020 ലെ കണക്കനുസരിച്ച്, ഏകദേശം 2.8 ദശലക്ഷം അഫ്ഗാൻ അഭയാർത്ഥികൾ വിവിധ വിദേശ രാജ്യങ്ങളിലുണ്ട്. യുഎൻഎച്ച്‌സി‌ആർ അനുസരിച്ച്, ലോകത്ത് ഏറ്റവും കൂടുതൽ അഭയാർത്ഥികൾ സിറിയയിൽ നിന്നുള്ളവരാണ്. 6.8 ദശലക്ഷം വരും സിറിയയിൽ നിന്ന് വിവിധ വിദേശ രാജ്യങ്ങളിലെത്തിയ അഭയാർത്ഥികളുടെ എണ്ണം.

"പീഡനം, യുദ്ധം അല്ലെങ്കിൽ അക്രമം കാരണം സ്വന്തം രാജ്യം വിട്ട് പോകാൻ നിർബന്ധിതനായ വ്യക്തി" എന്നാണ് ഒരു അഭയാർത്ഥിയെ നിർവചിച്ചിരിക്കുന്നത് . "ഒരു അഭയാർത്ഥിക്ക് വംശം, മതം, ദേശീയത, രാഷ്ട്രീയ അഭിപ്രായം അല്ലെങ്കിൽ ഒരു പ്രത്യേക സാമൂഹിക ഗ്രൂപ്പിലെ അംഗത്വം എന്നിവയുടെ കാരണങ്ങളാൽ പീഡനത്തെക്കുറിച്ചുള്ള നല്ലൊരു ഭയം ഉണ്ടാവും. മിക്കവാറും, അവർക്ക് നാട്ടിലേക്ക് മടങ്ങാൻ കഴിയില്ല. അല്ലെങ്കിൽ അങ്ങനെ ചെയ്യാൻ ഭയപ്പെടുന്നു. യുദ്ധവും വംശീയവും ഗോത്രപരവും മതപരവുമായ അക്രമങ്ങളാണ് അഭയാർത്ഥികൾ തങ്ങളുടെ രാജ്യങ്ങളിൽ നിന്ന് പലായനം ചെയ്യുന്നതിന്റെ പ്രധാന കാരണങ്ങൾ, ”യുഎൻഎച്ച്‌സി‌ആർ പറയുന്നു.

ലോകത്താകെയുള്ള അഭയാർത്ഥികളിൽ 68 ശതമാനം ആളുകളും സിറിയ, വെനിസ്വേല, അഫ്ഗാനിസ്ഥാൻ, ദക്ഷിണ സുഡാൻ, മ്യാൻമർ എന്നീ അഞ്ച് രാജ്യങ്ങളിൽ നിന്നുള്ളവരാണ്.

2020 അവസാനത്തോടെ, പീഡനം, സംഘർഷം, അക്രമം, മനുഷ്യാവകാശ ലംഘനങ്ങൾ എന്നിവ കാരണം ലോകമെമ്പാടും ആകെ 82.4 ദശലക്ഷം ആളുകളെ മാറ്റിപ്പാർപ്പിച്ചു. തുർക്കി ആണ് ഏറ്റവും കൂടുതൽ അഭയാർത്ഥികൾക്ക് ആതിഥേയത്വം വഹിക്കുന്നത്, നാല് ദശലക്ഷത്തിലധികം (കൂടുതലും സിറിയയിൽ നിന്നുള്ളവർ).

ഏതൊക്കെ രാജ്യങ്ങളാണ് അഫ്ഗാൻ അഭയാർത്ഥികളെ സ്വീകരിക്കുന്നത്?

യുഎസ്: ഓഗസ്റ്റ് 2 ന്, യുഎസ് സ്റ്റേറ്റ് ഡിപ്പാർട്ട്മെന്റ് അഫ്ഗാനിസ്താൻ അഭയാർത്ഥികൾക്കായി പ്രയോരിറ്റി 2 (പി -2) പദവി പ്രഖ്യാപിച്ചു. ഇത് യുഎസ് അഭയാർത്ഥി പ്രവേശന പരിപാടി (യുഎസ്ആർഎപി) പ്രകാരം ചില അഫ്ഗാൻ പൗരന്മാർക്കും അവരുടെ യോഗ്യതയുള്ള കുടുംബാംഗങ്ങൾക്കും പ്രവേശനം നൽകുന്നു.

“യുഎസിന്റെ ലക്ഷ്യം സമാധാനപരവും സുരക്ഷിതവുമായ അഫ്ഗാനിസ്ഥാൻ എന്നത് തന്നെയായി തുടരുന്നു. എന്നിരുന്നാലും, താലിബാൻ അക്രമങ്ങൾ വർദ്ധിക്കുന്നതിന്റെ പശ്ചാത്തലത്തിൽ, അമേരിക്കയോടൊപ്പം പ്രവർത്തിച്ചവർ ഉൾപ്പെടെയുള്ള ചില അഫ്ഗാനികൾക്ക് അമേരിക്കയിലേക്ക് അഭയാർഥി പുനരധിവാസത്തിനുള്ള അവസരം നൽകാൻ യുഎസ് സർക്കാർ ശ്രമിക്കുന്നു, ”സ്റ്റേറ്റ് ഡിപ്പാർട്ട്മെന്റ് പ്രസ്താവനയിൽ പറഞ്ഞു.

റിപ്പോർട്ടുകൾ പ്രകാരം, പതിനായിരത്തിലധികം അഫ്ഗാൻ പൗരന്മാരെ യുഎസ് സ്വീകരിക്കുമെന്ന് പ്രതീക്ഷിക്കുന്നു, അതിൽ കൂടുതലും സർക്കാരിനെ സഹായിച്ച ആളുകളെ ഉൾപ്പെടുത്തും.

യുകെ: താലിബാൻ അധികാരം നേടിയതിനെത്തുടർന്ന് അഫ്ഗാനിസ്താനിൽ നിന്ന് പലായനം ചെയ്യപ്പെടുകയോ പീഡന ഭീഷണി നേരിടുകയോ ചെയ്യുന്നവർക്ക് യുകെയിൽ സ്ഥിരമായി താമസിക്കാനുള്ള മാർഗം വാഗ്ദാനം ചെയ്യുമെന്ന് ഓഗസ്റ്റ് 18 -ന് യുകെ സർക്കാർ പ്രഖ്യാപിച്ചു. സ്ത്രീകൾക്കും പെൺകുട്ടികൾക്കും മതന്യൂനപക്ഷങ്ങൾക്കും മുൻഗണന നൽകുന്ന പുനരധിവാസ പദ്ധതിയുടെ ആദ്യ വർഷത്തിൽ നിലവിലെ പ്രതിസന്ധി മൂലം അപകടസാധ്യതയുള്ള 5,000 അഫ്ഗാൻ പൗരന്മാരെ സർക്കാർ പുനരധിവസിപ്പിക്കും. മൊത്തത്തിൽ, ഈ പദ്ധതിയിലൂടെ 20,000 അഫ്ഗാൻ പൗരന്മാരെ പുനരധിവസിപ്പിക്കാൻ യുകെ ലക്ഷ്യമിടുന്നു.

കാനഡ: 20,000 അഫ്ഗാൻ പൗരന്മാരെ സ്വീകരിക്കുമെന്ന് കാനഡയും വാഗ്ദാനം ചെയ്തിട്ടുണ്ട്.

യൂറോപ്പ്: 2015 ലെ കുടിയേറ്റ പ്രതിസന്ധി ആവർത്തിക്കുമെന്ന് ഭയന്ന് മിക്ക യൂറോപ്യൻ രാജ്യങ്ങളും അഫ്ഗാൻ അഭയാർഥികളെ ഏറ്റെടുക്കുന്നതിൽ ജാഗ്രത പുലർത്തുന്നു. 2015 ലെ കുടിയേറ്റ പ്രതിസന്ധിയുടെ കാലത്ത് യൂറോപ്പിലേക്ക് കടൽമാർഗം സഞ്ചരിക്കാൻ ശ്രമിച്ച നിരവധി പേർ അപകടത്തിൽ മരണപ്പെട്ടിരുന്നു.

2015 ൽ ഒമ്പത് ലക്ഷത്തിലധികം അഭയാർഥികളും കുടിയേറ്റക്കാരും യൂറോപ്യൻ തീരങ്ങളിൽ എത്തിയതായി യുഎൻഎച്ച്‌സി‌ആർ കണക്കാക്കുന്നു. അന്ന് 3,500 പേർക്ക് യാത്രയിൽ ജീവൻ നഷ്ടപ്പെട്ടു. അന്നത്തെ അഭയാർത്ഥികളിൽ 75 ശതമാനം ആളുകളും സിറിയ, അഫ്ഗാനിസ്ഥാൻ, ഇറാഖ് എന്നിവയുൾപ്പെടെയുള്ള രാജ്യങ്ങളിലെ സംഘർഷം അല്ലെങ്കിൽ പീഡനത്തിൽ നിന്ന് രക്ഷതേടി പലായനം ചെയ്യുകയായിരുന്നു.

സ്റ്റാറ്റിസ്റ്റയുടെ അഭിപ്രായത്തിൽ, ഓസ്ട്രിയ, ഫ്രാൻസ്, സ്വീഡൻ എന്നിവയാണ് യൂറോപ്പിലെ അഫ്ഗാൻ അഭയാർത്ഥികളുടെ പ്രധാന ലക്ഷ്യസ്ഥാനങ്ങൾ. ഒരു യൂറോപ്യൻ യൂണിയൻ റിപ്പോർട്ട് അനുസരിച്ച്, 2021 -ന്റെ ആദ്യ പാദത്തിൽ ഏകദേശം 7,000 അഫ്ഗാൻ പൗരന്മാർക്ക് യൂറോപ്യൻ യൂണിയനിൽ സ്ഥിരമോ താൽക്കാലികമോ ആയ നിയമപരമായ പദവി നൽകി. ഇതിൽ കുറഞ്ഞത് 2,200 പേർ ഗ്രീസിലും 1,800 പേർ ഫ്രാൻസിലും 1,000 ജർമ്മനിയിലും ചുറ്റുമുള്ള പ്രദേശങ്ങളിലും 700 പേർ ഇറ്റലിയിലുമായിരുന്നു.

"മൊത്തത്തിൽ, അഫ്ഗാൻ അഭയാർഥികൾക്ക് യൂറോപ്യൻ യൂണിയനിൽ അംഗീകാരം നേടാൻ 62 ശതമാനം അവസരമുണ്ടായിരുന്നു, പലർക്കും നിലനിൽക്കാനുള്ള താൽക്കാലിക അവകാശം മാത്രമേ അനുവദിച്ചിട്ടുള്ളൂ," സ്റ്റാറ്റിസ്റ്റ പറയുന്നു.

ഇന്ത്യ: ഇന്ത്യക്ക് അഭയാർത്ഥികൾക്കായി പ്രത്യേക നിയമമില്ല. ഇതുവരെ അഭയാർത്ഥികളെ ഓരോരോ പ്രത്യേക സാഹചര്യങ്ങളായി പരിഗണിക്കുകയായിരുന്നു.

1951 ലെ അഭയാർഥി കൺവെൻഷനിലോ 1967 ലെ അഭയാർത്ഥികളുടെ നിലയുമായി ബന്ധപ്പെട്ട പ്രോട്ടോക്കോളിലോ ഇന്ത്യ ഒപ്പുവച്ചിട്ടില്ല. 2011 ൽ, കേന്ദ്ര സർക്കാർ എല്ലാ സംസ്ഥാനങ്ങളിലും കേന്ദ്രഭരണ പ്രദേശങ്ങളിലും അഭയാർഥികളാണെന്ന് അവകാശപ്പെടുന്ന വിദേശ പൗരന്മാരെ കൈകാര്യം ചെയ്യുന്നതിനുള്ള ഒരു ഏകീകൃത നടപടി ക്രമം പ്രചരിപ്പിച്ചിരുന്നു.

അഫ്ഗാനിസ്ഥാനിലെ നിലവിലെ സാഹചര്യം പരിഗണിച്ച്, അഫ്ഗാൻ പൗരന്മാർക്ക് രാജ്യത്തേക്ക് പ്രവേശിക്കുന്നതിനുള്ള അപേക്ഷകൾ വേഗത്തിൽ നടപ്പാക്കാൻ ഇന്ത്യ ഒരു പുതിയ ഇ-വിസ അവതരിപ്പിച്ചു. ഈ വിസകൾ ആറുമാസത്തേക്ക് മാത്രമേ സാധുതയുള്ളൂ. ഈ കാലയളവ് കഴിഞ്ഞാൽ എന്ത് സംഭവിക്കുമെന്ന് വ്യക്തമല്ല.