പുതിയ തൊഴിൽ നിയമം; ജീവനക്കാർക്ക് അനുകൂലമോ? പ്രതികൂലമോ? എന്തൊക്കെ മാറ്റങ്ങൾ, അറിയാം വിശദമായി

New Labour Codes: സുപ്രധാന മാറ്റങ്ങളോടെ രാജ്യത്ത് പുതിയ തൊഴിൽ നിയമം പ്രാബല്യത്തിൽ വന്നിരിക്കുകയാണ്. ഇന്ത്യയുടെ ലേബർ ഗവേണൻസ് ശക്തിപ്പെടുത്തുക എന്ന ലക്ഷ്യത്തോടെയാണ് നാല് ലേബർ കോഡുകൾ അവതരിപ്പിച്ചിരിക്കുന്നതെന്നാണ് കേന്ദ്ര സർക്കാരിന്റെ വാദം. മുൻപ് പ്രാബല്യത്തിൽ ഉണ്ടായിരുന്ന 29 നിയമങ്ങൾ റദ്ദാക്കുകയും പുതുക്കിയുമാണ് പുതിയ ലേബർ കോഡുകൾ കേന്ദ്രം പുറത്തിറക്കിയിരിക്കുന്നത്.

Also Read:അമേരിക്കൻ പഠനം ആശങ്കയിലോ? പ്രവേശനം പരിമിതപ്പെടുത്താൻ സർവകലാശാലകൾക്ക് നിർദേശം

വേതനം സംബന്ധിയായ കോഡ് (കോഡ് ഓൺ വേയ്ജസ്, 2019,) വ്യാവസായിക കോഡ് (ഇൻഡസ്ട്രിയൽ റിലേഷൻസ് കോഡ്, 2020), സാമൂഹിക സുരക്ഷാ കോഡ്(കോഡ് ഓൺ സോഷ്യൽ സെക്യൂരിറ്റി, 2020) ഒക്യുപ്പേഷണൽ സേഫ്റ്റി, ഹെൽത്ത് & വർക്കിങ് കണ്ടീഷൻസ് കോഡ് (ഒഎസ്എച്ച്ഡബ്ല്യിയുസി, 2020) എന്നിവയാണ് 2025 നവംബർ 21 മുതൽ പ്രാബല്യത്തിൽ വന്നത്. പുതിയ തൊഴിൽ നിയമത്തിലെ സുപ്രധാന മാറ്റങ്ങൾ പരിശോധിക്കാം. 

തൊഴിൽ നിയമത്തിന്റെ ലക്ഷ്യം

തൊഴിൽ നിയന്ത്രണങ്ങൾ നവീകരിക്കുക, തൊഴിലാളികളുടെ ക്ഷേമം വർധിപ്പിക്കുക, തൊഴിൽ മേഖലയെ പുറംലോകവുമായി ബന്ധിപ്പിക്കുക, ആത്മനിർഭർ ഭാരത് പ്രാവർത്തികമാക്കുക, പുതിയ വ്യവസായങ്ങൾക്ക് അടിത്തറ പാകുക എന്നിവയാണ് ലേബർ കോഡുകളുടെ ലക്ഷ്യമെന്ന് കേന്ദ്രം പറയുന്നു.

Also Read:സിത്താരെ സമീൻ പർ യുട്യൂബിൽ ഇറക്കിയത് എന്തിന്? ആമിർ ഖാന്റെ ബിസിനസ് ബുദ്ധി

സ്വാതന്ത്ര്യത്തിനു മുമ്പും സ്വാതന്ത്ര്യാനന്തര കാലത്തുമാണ് ഇന്ത്യയിലെ പല തൊഴിൽ നിയമങ്ങളും രൂപപ്പെട്ടത്. സമീപ ദശകങ്ങളിൽ ചില തൊഴിൽ മേഖലകൾ പുരോഗതി നേടുകയും നിയമങ്ങൾ ഏകീകരിക്കുകയും ചെയ്തിരുന്നു. പക്ഷേ, 29 കേന്ദ്ര തൊഴിൽ നിയമങ്ങളിലായി കാലഹരണപ്പെട്ട ചില തൊഴിൽ വ്യവസ്ഥകൾ ഇന്ത്യയിലുണ്ടായിരുന്നു. കൊളോണിയൽ കാലഘട്ടത്തിലെ ഘടനകൾക്കപ്പുറത്തേക്ക് നീങ്ങാനും ആധുനിക പ്രവണതകളുമായി പൊരുത്തപ്പെടാനുമുള്ള ദീർഘകാല ആവശ്യങ്ങളാണ് നാല് തൊഴിൽ കോഡുകളിലായി നടപ്പിലാക്കുന്നത്. തൊഴിലാളികളെയും ചെറുകിട സംരംഭങ്ങളെയും ഇത് ശാക്തീകരിക്കുന്നു.

സുപ്രധാന മാറ്റങ്ങൾ

അഞ്ച് വർഷം തുടർച്ചയായി തൊഴിൽ എടുക്കുന്നവർക്കാണ് മുൻപ് ഗ്രാറ്റുവിറ്റിക്ക് അർഹതയുണ്ടായിരുന്നത്. ഇപ്പോൾ സ്ഥിരകാല ജീവനക്കാർക്ക് ഒരു വർഷത്തെ തുടർച്ചയായ ജോലിക്ക് ശേഷം ഗ്രാറ്റുവിറ്റിക്ക് അർഹതയുണ്ടാകും. പെൻഷൻ, സാമൂഹിക സുരക്ഷാ ആനുകൂല്യങ്ങൾ എന്നിവ കണക്കാക്കുന്നതിൽ സ്ഥിരത ഉറപ്പാക്കും. മൊത്തം പ്രതിഫലത്തിന്റെ 50 ശതമാനം വേതനം കണക്കാക്കി നൽകും.പുതിയ തൊഴിൽ നിയമത്തിലെ സുപ്രധാനമായ മാറ്റങ്ങളിലൊന്ന് ഇതാണ്. 

ഓവർടൈമിന് ഇരട്ടി വേതനം

ഒരു ദിവസം എട്ട് മുതൽ 12 മണിക്കൂർ വരെ തൊഴിലെടുക്കാം. ആഴ്ചയിൽ 48 മണിക്കൂറിൽ കൂടുതൽ പ്രവർത്തിക്കാൻ പാടില്ല. ഷിഫ്റ്റുകൾ ഒൻപത് മണിക്കൂറായി പരിമിതപ്പെടുത്തി. തൊഴിലാളിയുടെ സമ്മതത്തോടെ ഓവർടൈം ചെയ്യുകയാണെങ്കിൽ വേതന നിരക്കിന്റെ ഇരട്ടി കമ്പനി നൽകണം. കരാർ തൊഴിലാളികൾക്ക് ഇപ്പോൾ അഞ്ച് വർഷത്തേക്ക് ഒരൊറ്റ ലൈസൻസ് ലഭ്യമാകും.

പിരിച്ചുവിടലുകൾക്കുള്ള പരിഷ്‌കരിച്ച നിയമങ്ങൾ

ട്രേഡ് യൂണിയനുകളുമായി ബന്ധപ്പെട്ട നിയമങ്ങൾ, വ്യാവസായിക സ്ഥാപനങ്ങളിലെ തൊഴിൽ വ്യവസ്ഥകൾ എന്നിവ ലളിതമാക്കുന്ന കോഡ് 2 - ദി ഇൻഡസ്ട്രിയൽ റിലേഷൻസ് കോഡ്, 2020 - ൽ ഈ പ്രത്യേക നിയമം പരാമർശിച്ചിരിക്കുന്നു. പിരിച്ചുവിടലിന് പരിധി 100 തൊഴിലാളികളിൽ നിന്ന് 300 ആയി ഉയർത്തി.

പുതിയ ലേബർ കോഡുകൾ പ്രകാരം തൊഴിലാളികളുടെ പരിധി 100 ൽ നിന്ന് 300 ആയി ഉയരുന്നതിനാൽ, 299 ജീവനക്കാരുള്ള കമ്പനികൾക്ക് ഇപ്പോൾ സർക്കാർ അനുമതിയില്ലാതെ ജീവനക്കാരെ പിരിച്ചുവിടാൻ കഴിയും എന്നാണ് ഇതിനർത്ഥം. മുൻപ് 100 അല്ലെങ്കിൽ അതിൽ കൂടുതൽ ജീവനക്കാരുള്ള കമ്പനികൾക്ക് സർക്കാർ അംഗീകരിച്ച തൊഴിൽ വ്യവസ്ഥകൾ ആവശ്യമായിരുന്നു.

കരാർ തൊഴിലാളികൾക്കുള്ള ആനുകൂല്യങ്ങൾ

കരാർ തൊഴിലാളികൾക്കുള്ള പദ്ധതികൾക്ക് ധനസഹായം നൽകുന്നതിന് ലേബർ കോഡ് ഒരു ഫണ്ട് ഉറപ്പാക്കുന്നു. ആരോഗ്യം, വാർധക്യ ആനുകൂല്യങ്ങൾ എന്നിവ ഉൾക്കൊള്ളുന്നു. കൂടാതെ കൊവിഡ് -19 പാൻഡെമിക് സമയത്ത് വീട്ടിൽ നിന്ന് ജോലി ചെയ്യാനുള്ള സംവിധാനം പോലെ ഇപ്പോൾ പല കമ്പനികളിലും ഉൾപ്പെടുത്തുന്നു.

സംഘടിത, അസംഘടിത മേഖലകൾക്ക് മിനിമം വേതനം

പുതിയ ലേബർ നിയമപ്രകാരം സംഘടിത മേഖലയിലെയും അസംഘടിത മേഖലയിലെയും എല്ലാ തൊഴിലാളികൾക്കും സർക്കാർ നിശ്ചയിച്ചിട്ടുള്ള മിനിമം വേതനത്തിന് അർഹതയുണ്ടായിരിക്കും. മിനിമം ജീവിത നിലവാരത്തെ അടിസ്ഥാനമാക്കി സർക്കാർ ഒരു നിയമപരമായ വേതനം നിശ്ചയിക്കും. കൂടാതെ, പ്രതിമാസ ശമ്പളം പരിഗണിക്കാതെ, സമയബന്ധിതമായി പണം നൽകുന്നതിനും അനധികൃത കിഴിവുകൾ തടയുന്നതിനുമുള്ള വ്യവസ്ഥകൾ സർക്കാർ അവതരിപ്പിച്ചിട്ടുണ്ട്. അടിസ്ഥാന ശമ്പളം, ക്ഷാമബത്ത, നിലനിർത്തൽ അലവൻസ് എന്നിവ ഉൾപ്പെടുന്നു.

Also Read:രണ്ട് സഹോദരന്മാർക്ക് ഒരു വധു; ബഹുഭർതൃത്വം അനുവദനീയമാണോ? നിയമം പറയുന്നത് ഇങ്ങനെ

സുരക്ഷാ നടപടികളോടെ സ്ത്രീകൾക്ക് ഇപ്പോൾ രാത്രി ഷിഫ്റ്റുകളിൽ ജോലി ചെയ്യാൻ കഴിയും. അസംഘടിത മേഖലകളിലെ എല്ലാ സ്ത്രീ തൊഴിലാളികൾക്കും 26 ആഴ്ച ശമ്പളത്തോടുകൂടിയ അവധി ഉൾപ്പെടെയുള്ള പ്രസവാനുകൂല്യങ്ങൾ ഈ ലേബർ നിയമം നൽകുന്നു.

2020 ലെ സാമൂഹിക സുരക്ഷാ കോഡ്, അസംഘടിത, കരാർ, പ്ലാറ്റ്ഫോം തൊഴിലാളികൾ ഉൾപ്പെടെ എല്ലാ തൊഴിലാളികൾക്കും സാമൂഹിക സുരക്ഷാ ആനുകൂല്യങ്ങൾ നൽകുന്നു. ആനുകൂല്യങ്ങൾ ലൈഫ്, ആരോഗ്യം, പ്രസവാവധി, പ്രൊവിഡന്റ് ഫണ്ട് ആനുകൂല്യങ്ങൾ എന്നിവ ഉൾക്കൊള്ളുന്നു.

ആനുകൂല്യങ്ങൾ

അതിഥി തൊഴിലാളികൾ നേരിട്ട് ജോലി ചെയ്യുന്നതോ കോൺട്രാക്ടർമാർ വഴി ജോലി ചെയ്യുന്നതോ ആയവർക്കും ആനുകൂല്യം ലഭിക്കുന്നു. 12 മാസത്തിലൊരിക്കൽ ജന്മനാട്ടിലേക്കുള്ള വാർഷിക യാത്രാ അലവൻസും സാമൂഹിക സുരക്ഷാ ആനുകൂല്യങ്ങളും ലഭ്യമാകും.

സ്ത്രീകൾക്ക് രാത്രി ഷിഫ്റ്റുകളിലും എല്ലാത്തരം ജോലികളിലും (ഭൂഗർഭ ഖനനം, ഹെവി മെഷിനറി എന്നിവയുൾപ്പെടെ) അനുവാദം നൽകി. പരാതി പരിഹാര കമ്മിറ്റികളിൽ സ്ത്രീ പ്രാതിനിധ്യം നിർബന്ധമാക്കി. കുടുംബത്തിൽ ഭാര്യാപിതാക്കളെ ചേർക്കുന്നതിനുള്ള വ്യവസ്ഥ ഉണ്ടാക്കി. യുവാക്കൾക്ക് ഉൾപ്പെടെ എല്ലാ തൊഴിലാളികൾക്കും മിനിമം വേതനം ഉറപ്പാക്കുന്നു. എല്ലാ തൊഴിലാളികൾക്കും നിയമന കത്തുകൾ ലഭിക്കണം. സാമൂഹിക സുരക്ഷയും ഉറപ്പാക്കുന്നു. തൊഴിലുടമകൾ തൊഴിലാളിയെ ചൂഷണം ചെയ്യുന്നത് നിരോധിച്ചു. അവധിക്കാല വേതനം നിർബന്ധമാക്കി.

Read More:സ്വർണ വില കുതിക്കുന്നതിന്റെ കാരണങ്ങൾ എന്താണ്? വെള്ളിയും തൊട്ടാൽ പൊള്ളുന്നത് എന്തുകൊണ്ട്?