പിരിയുന്നതിനു മുൻപ് സുധി ഒരു ആഗ്രഹം പറഞ്ഞു; അവസാന സെൽഫിയുമായി ടിനി ടോം

തിങ്കളാഴ്ച്ച പുലർച്ചെ 4.30 ന് തൃശൂർ കയ്പമംഗലം പനമ്പിക്കുന്നിൽ വച്ച് നടന്ന വാഹനാപകടത്തിലാണ് സുധി മരണപ്പെട്ടത്. നടൻ സഞ്ചരിച്ച കാർ എതിരെ വന്ന പിക്കപ്പുമായി കൂട്ടിയിടിച്ചായിരുന്നു അപകടം. ഗുരുതരമായി പരുക്കേറ്റ സുധിയെ കൊടുങ്ങല്ലൂർ എ.ആർ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സുധിയുടെ പെട്ടെന്നുള്ള വിയോഗത്തിന്റെ ഞെട്ടലിലാണ് കലാലോകം. സുധിയെ ഓർമിച്ചു കൊണ്ടുള്ള കുറിപ്പുകൾ പ്രിയപ്പെട്ടവർ സോഷ്യൽ മീഡിയയിൽ പങ്കുവച്ചിട്ടുണ്ട്.

സുധിയുടെ അടുത്ത സുഹൃത്തും നടനുമായ ടിനി ടോം പങ്കുവച്ച ഒരു ചിത്രമാണ് ഇപ്പോൾ ശ്രദ്ധ നേടുന്നത്. ഇന്നലെ കോഴിക്കോട് വച്ചു നടന്ന ഷോയിൽ പങ്കെടുക്കാൻ ടിനി ടോമുമുണ്ടായിരുന്നു. പരിപാടി കഴിഞ്ഞ് മടങ്ങുന്നതിനു മുൻപ് ഒരു സെൽഫിയെടുക്കണമെന്ന് സുധി ആവശ്യപ്പെട്ടന്നും പിന്നീട് അത് തനിക്ക് അയച്ചു തന്നെന്നും പറയുകയാണ് ടിനി ടോം. ആദരാഞ്ജലികൾ അർപ്പിച്ചു കൊണ്ട് പോസ്റ്റ് ചെയ്യാനാണോ ചിത്രം അയച്ചു തന്നതെന്നും ടിനി ചോദിക്കുന്നുണ്ട്.

"ദൈവമേ വിശ്വസിക്കാൻ ആകുന്നില്ല ഇന്നലെ ഒരുമിച്ചായിരുന്നു വേദിയിൽ രണ്ട്‌ വണ്ടികളിൽ ആയിരിന്നു ഞങ്ങള് തിരിച്ചത് ,പിരിയുന്നതിനു മുൻപ് സുധി ഒരു ആഗ്രഹം പറഞ്ഞു ഒരുമിച്ചു ഒരു ഫോട്ടോ എടുക്കണം എന്നിട്ടു ഈ ഫോട്ടോ എനിക്ക് അയച്ചും തന്നു …ഇങ്ങനെ ഇടാൻ വേണ്ടിയാണോ ഈ ചിത്രം എനിക്ക് അയച്ചത് …മോനെ ഇനി നീ ഇല്ലേ … ആദരാഞ്ജലികൾ മുത്തേ," ടിനി കുറിച്ചു. സെൽഫി ചിത്രത്തിൽ താരങ്ങളായ ബിനു അടിമാലി, പ്രജോദ് എന്നിവരെയും കാണാം.

ടിനിയുടെ പോസ്റ്റിനു താഴെ അനവധി ആരാധകരും ആദരാഞ്ജലി അർപ്പിച്ചിട്ടുണ്ട്. മലയാളികളെ ചിരിപ്പിച്ച ഇപ്പോൾ കരയിപ്പിക്കുന്ന സുധിചേട്ടന് ആദരാഞ്ജലികൾ, വാർത്ത കണ്ടപ്പോൾ വിശ്വസിക്കാനായില്ല തുടങ്ങിയ കമന്റുകളാണ് നിറയുന്നത്.

മിമിക്രി ലോകത്തു നിന്ന് സിനിമയിലെത്തിയ കലാകാരന്മാരിൽ മുൻ നിരയിൽ തന്നെയുണ്ടാകും കൊല്ലം സുധി. കോമഡി സ്റ്റാർ, കോമഡി ഫെസ്റ്റിവൽ തുടങ്ങിയ ഷോകളിലൂടെയാണ് കൊല്ലം സുധി മലയാളി പ്രേക്ഷകർക്ക് സുപരിചിതനാകുന്നത്. പിന്നീട് അനവധി സിനിമകളും സ്റ്റാർ മാജിക്ക് എന്ന ഷോയും കൊല്ലം സുധി എന്ന കലാകാരന്റെ സാന്നിധ്യം അറിയിച്ചുകൊണ്ടേയിരുന്നു.

ടെലിവിഷന്‍ പരിപാടികളിലൂടെയാണ് സുധി സിനിമാ രംഗത്തേക്ക് എത്തിയത്. 2015 ല്‍ പുറത്തിറങ്ങിയ ‘കാന്താരി’ ആയിരുന്നു ആദ്യ സിനിമ. കട്ടപ്പനയിലെ ഋത്വിക് റോഷന്‍, കുട്ടനാടന്‍ മാര്‍പാപ്പ, തീറ്റ റപ്പായി, വകതിരിവ്, ആന്‍ ഇന്റര്‍നാഷ്ണല്‍ ലോക്കല്‍ സ്‌റ്റോറി, കേശു ഈ വീടിന്റെ നാഥന്‍, എസ്‌കേപ്പ്, സ്വര്‍ഗത്തിലെ കട്ടുറുമ്പ് തുടങ്ങിയ ചിത്രങ്ങളില്‍ അഭിനയിച്ചിട്ടുണ്ട്.