സുരേഷ് ഗോപിയെ കാണാൻ 'ഹരിഹർ നഗറി'ലെത്തിയ ഈ പയ്യനെ മനസ്സിലായോ?

പഴകുംതോറും തിളക്കമേറുന്ന, കൗതുകം സമ്മാനിക്കുന്ന ചില ചിത്രങ്ങളുണ്ട്. അത്തരമൊരു ചിത്രമാണിത്. ചിത്രത്തിൽ രണ്ടു കുട്ടികൾക്കൊപ്പം ചിരിയോടെ ഫോട്ടോയ്ക്ക് പോസ് ചെയ്യുന്ന സുരേഷ് ഗോപിയെ കാണാം. സൂക്ഷിച്ചുനോക്കിയാൽ ആ കുട്ടികളിൽ ഒരാളെയും നിങ്ങളറിയും? സഹസംവിധായകനായി തുടക്കം കുറിച്ച്, ചെറിയ റോളുകളിലൂടെ അഭിനയരംഗത്ത് എത്തുകയും ഇന്ന് മലയാളസിനിമയിലെ ശ്രദ്ധേയ സാന്നിധ്യമാവുകയും ചെയ്ത സൗബിൻ ഷാഹിർ ആണ് ആ കുട്ടി. വർഷങ്ങൾക്കു മുൻപു 'ഇൻ ഹരിഹർനഗർ' സിനിമയുടെ ലൊക്കേഷനിൽ വെച്ചെടുത്ത ചിത്രമാണിത്.

മണിചിത്രത്താഴ്, ഗോഡ് ഫാദർ, ഇൻ ഹരിഹർ നഗർ തുടങ്ങിയ ചിത്രങ്ങളുടെ അസിസ്റ്റന്റ് ഡയറക്ടറും പ്രൊഡക്ഷൻ കൺട്രോളറുമായ ബാബു ഷാഹിറിന്റെ മകനാണ് സൗബിൻ. ഫാസിലിന്റെയും സിദ്ദിഖ്-ലാൽമാരുടെയുമെല്ലാം ആദ്യകാല ഹിറ്റ് ചിത്രങ്ങളുടെ ലൊക്കേഷനിലെ സ്ഥിരം സാന്നിധ്യമായിരുന്നു ബാബു ഷാഹിർ. മണിച്ചിത്രത്താഴ്, ഗോഡ് ഫാദർ, ഇൻ ഹരിഹർനഗർ തുടങ്ങിയ ചിത്രങ്ങളുടെയെല്ലാം അണിയറയിൽ ബാബു ഷാഹിറും ഉണ്ടായിരുന്നു. ഉപ്പയുടെ ലൊക്കേഷനിൽ സൗബിൻ കാഴ്ചക്കാരനായി എത്തിയപ്പോൾ പകർത്തിയ ചിത്രമാണിത്.

ബാബു ഷാഹിറിന്റെ വഴിയെ ആണ് സൗബിനും സിനിമയിലേക്ക് എത്തിയത്. 2003ൽ സിദ്ദിഖിന്റെ ക്രോണിക് ബാച്ച്‌ലർ എന്ന ചിത്രത്തിൽ അസിസ്റ്റന്റ് ഡയറക്ടറായി പ്രവർത്തിച്ചുകൊണ്ടാണ് സൗബിന്റെ തുടക്കം. പിന്നീട് ഫാസിൽ, റാഫി മെക്കാർട്ടിൻ, പി സുകുമാർ, സന്തോഷ് ശിവൻ, രാജീവ് രവി, അമൽ നീരദ് തുടങ്ങിയ സംവിധായകർക്കൊപ്പമൊക്കെ അസിസ്റ്റന്റ് ഡയറക്ടറായി പ്രവർത്തിച്ചു.

ഫാസിലിന്റെ കയ്യെത്തും ദൂരത്ത്, പാണ്ഡിപ്പട, ഉറുമി, ഡാ തടിയാ എന്നീ ചിത്രങ്ങളിലും ചെറിയ വേഷങ്ങളിൽ സൗബിൻ സ്ക്രീനിൽ മിന്നിമറിഞ്ഞു പോവുന്നുണ്ട്. അന്നയും റസൂലും എന്ന ചിത്രത്തിലാണ് സൗബിൻ ആദ്യമായി ഒരു കഥാപാത്രത്തെ അവതരിപ്പിക്കുന്നത്. എന്നാൽ നടനെന്ന രീതിയിൽ സൗബിന് ശ്രദ്ധ നേടി കൊടുത്തത് പ്രേമത്തിലെ പി ടി അധ്യാപകന്റെ വേഷമാണ്. ചാർലി, മഹേഷിന്റെ പ്രതികാരം, കലി, ഡാർവിന്റെ പരിണാമം, ഹലോ നമസ്തേ, റാണി പത്മിനി, കമ്മട്ടിപ്പാടം, അനുരാഗകരിക്കിൻ വെള്ളം, മായാനദി, കുമ്പളങ്ങി നൈറ്റ്സ്, ഒരു യമണ്ടൻ പ്രേമകഥ, വൈറസ്, വികൃതി, ആൻഡ്രോയിഡ് കുഞ്ഞപ്പൻ, ട്രാൻസ്, ഇരുൾ, ഭീഷ്മപർവ്വം, സിബിഐ 5 തുടങ്ങി ഒരുപിടി നല്ല ചിത്രങ്ങളുടെ ഭാഗമാവാൻ സൗബിനു സാധിച്ചു.

സുഡാനി ഫ്രം നൈജീരിയ എന്ന ചിത്രമാണ് സൗബിൻ ആദ്യമായി നായകനായി അഭിനയിച്ച ചിത്രം. അമ്പിളി, മ്യാവൂ, കള്ളൻ ഡിസൂസ എന്നിവയും സൗബിൻ നായകവേഷത്തിലെത്തിയ ചിത്രമാണ്. ഈ ചിത്രത്തിലെ അഭിനയത്തിന് സൗബിന് മികച്ച നടനുള്ള സംസ്ഥാന പുരസ്കാരം ലഭിച്ചു. ‘മഹേഷിന്റെ പ്രതികാരം’, ‘സുഡാനി ഫ്രം നൈജീരിയ’, ‘കുമ്പളങ്ങി നൈറ്റ്സ്’ തുടങ്ങി ഹിറ്റ് ചിത്രങ്ങളിലൂടെ താരമൂല്യമുള്ള നടനായി സൗബിൻ ഉയരുകയായിരുന്നു. 2017ൽ പറവ എന്ന ചിത്രം സംവിധാനം ചെയ്തുകൊണ്ട് സൗബിൻ സ്വതന്ത്രസംവിധായകനായി.