സൂപ്പർസ്റ്റാറുകൾക്കു പോലും കയ്യെത്തി തൊടാനാവാത്ത റെക്കോർഡ് സ്വന്തമാക്കിയ നായിക; ആളെ മനസ്സിലായോ?

ഇന്ന് തെന്നിന്ത്യയ്ക്ക് ഒന്നാകെ സുപരിചിതയായ ഒരു നായികയുടെ കുട്ടിക്കാലചിത്രമാണിത്. അടുത്തിടെ 300 കോടി ക്ലബ്ബിൽ ഇടം നേടിയ ഒരു ചിത്രത്തിലെ നായിക. ആളെ മനസ്സിലായോ?

മറ്റാരുമല്ല, മലയാളത്തിലെ യുവനടിമാർക്കിടയിൽ ഏറ്റവും ശ്രദ്ധേയ മുഖമായ കല്യാണി പ്രിയദർശൻ്റെ കുട്ടിക്കാല ചിത്രമാണിത്. സംവിധായകൻ പ്രിയദര്‍ശന്റെയും മുന്‍കാല നായിക ലിസിയുടെയും മകളായ കല്യാണിയ്ക്ക് മലയാളത്തിൽ കൈനിറയെ ചിത്രങ്ങളാണിപ്പോൾ.

ഈ ഓണത്തിനു പോലും രണ്ടു ചിത്രങ്ങളാണ് കല്യാണിയുടേതായി തിയേറ്ററുകളിലെത്തിയത്. ലോക ചാപ്റ്റർ 1 ചന്ദ്രയും ഓടും കുതിരയും ചാടും കുതിരയും. കഴിഞ്ഞ ദിവസം ലോക 300 കോടി ക്ലബ്ബിലും ചിത്രം ഇടം നേടിയിരുന്നു.

കല്യാണിയുടെ ആദ്യചിത്രം 2017ൽ റിലീസിനെത്തിയ 'ഹലോ' ആയിരുന്നു. ആര്‍ക്കിടെക്ച്ചര്‍ ഡിസൈനിങ് പഠിച്ച കല്യാണി അഭിനയത്തില്‍ എത്തുന്നതിനു മുന്‍പ് തന്നെ സിനിമയുടെ അണിയറയില്‍ പ്രവര്‍ത്തിച്ചിരുന്നു. വിക്രത്തിന്റെ 'ഇരുമുഗന്‍', ഹൃതിക് റോഷന്റെ 'കൃഷ്‌ 3' എന്നീ സിനിമകളിലെ കലാ സംവിധാന സഹായിയായിരുന്നു കല്യാണി.

വരനെ ആവശ്യമുണ്ട്' എന്ന ചിത്രത്തിലൂടെയായിരുന്നു കല്യാണിയുടെ മലയാള സിനിമയിലേക്കുള്ള അരങ്ങേറ്റം. മരക്കാർ അറബിക്കടലിന്റെ സിംഹം, ബ്രോ ഡാഡി, ഹൃദയം, തല്ലുമാല, ശേഷം മൈക്കിൽ ഫാത്തിമ എന്നിവയാണ് കല്യാണിയുടെ ശ്രദ്ധേയമായ മലയാളചിത്രങ്ങൾ.

അച്ഛനും അമ്മയും മാത്രമല്ല, കല്യാണിയുടെ സഹോദരൻ സിദ്ധാർത്ഥും സിനിമയിൽ തന്റെ വരവ് അറിയിച്ചു കഴിഞ്ഞു. മരക്കാർ: അറബിക്കടലിന്റെ സിംഹം എന്ന ചിത്രത്തിൽ വിഎഫ്എക്സ് ഒരുക്കിയതിന് ദേശീയ പുരസ്കാരവും കേരള സ്റ്റേറ്റ് ഫിലിം അവാർഡിൽ പ്രത്യേക ജൂറി പരാമർശവും സിദ്ധാർത്ഥിന് ലഭിച്ചിരുന്നു

അമ്മയുടെ പാരമ്പര്യം കാത്തുകൊണ്ട് അഭിനയത്തിലേക്ക് എത്തിയ കല്യാണി ഇന്ന് മലയാളസിനിമയിലെ മിന്നും താരമായി മാറിയിരിക്കുകയാണ്.