സ്ഥലത്തെ പ്രധാന കുട്ടി ചട്ടമ്പി, വലിയ പൊക്കക്കാരി; ഈ സൂപ്പർസ്റ്റാറിനെ മനസ്സിലായോ?

ബോളിവുഡിലെ ഏറ്റവും താരമൂല്യമുള്ള നായികമാരിൽ ഒരാളാണ് ദീപിക പദുകോൺ. നായകനടന്മാർ അരങ്ങുവാഴുന്ന ബോളിവുഡ് സിനിമാലോകത്ത് ദീപികയ്ക്കായി മാത്രം സിനിമകൾ ഉണ്ടാവുന്നു എന്നതു തന്നെ വലിയൊരു കാര്യമാണ്. ബോളിവുഡിൽ ഏറ്റവുമധികം പ്രതിഫലം കൈപ്പറ്റുന്ന നായികമാരിൽ ഒരാളും ദീപിക തന്നെ. 15 മുതൽ 20 കോടി വരെയാണ് ഒരു സിനിമയ്ക്കു വേണ്ടി ദീപിക കൈപ്പറ്റുന്ന പ്രതിഫലം.

ദീപികയുടെ കുട്ടിക്കാലചിത്രമാണിത്. "ഇന്ദിരാനഗറിലെ പ്രധാന ഗുണ്ടയായിരുന്നു ഞാൻ," എന്ന രസകരമായ കാപ്ഷനോടെ ദീപിക തന്നെ പങ്കുവച്ചതാണ് ചിത്രം. ദീപികയുടെ അമ്മ ഉജ്ജലയാണ് ഈ ചിത്രം പകർത്തിയിരിക്കുന്നത്.

ഇന്ത്യൻ ബാഡ്മിന്റൺ ഇതിഹാസതാരം പ്രകാശ് പദുകോണിന്റെയും ഉജ്ജലയുടെയും മൂത്ത മകളാണ് ദീപിക. അനിഷ എന്നൊരു സഹോദരി കൂടി ദീപികയ്ക്കുണ്ട്. പപ്പയാണ് തന്റെ എക്കാലത്തെയും ഹീറോ എന്ന് അഭിമുഖങ്ങളിൽ ദീപിക ആവർത്തിച്ച് പറയാറുണ്ട്.

"എനിക്ക് ലഭിക്കാവുന്നതിൽ വച്ച് ലഭിച്ച ഏറ്റവും വലിയ ഓഫ്-സ്ക്രീൻ ഹീറോയ്ക്ക്. ഒരാൾ യഥാർഥ ചാമ്പ്യനാകുന്നത് തൊഴിൽപരമായ നേട്ടങ്ങൾ കൊണ്ട് മാത്രമല്ല, ഒരു നല്ല മനുഷ്യനാകുമ്പോൾ കൂടിയാണെന്ന് കാണിച്ച് തന്നതിന് നന്ദി" പ്രകാശ് പദുകോണിന്റെ 65-ാം ജന്മദിനത്തിൽ ആശംസകൾ നേർന്ന് ദീപിക പങ്കുവച്ച കുറിപ്പും ഹൃദയസ്പർശിയായിരുന്നു.

ദീപിക പദുകോൺ ഇന്നൊരു അഭിനേത്രി മാത്രമല്ല, ആഗോളതലത്തിൽ തന്നെ ഒരു ഫാഷൻ ഐക്കൺ എന്ന നിലയിൽ തന്റെ സ്ഥാനം ഉറപ്പിച്ച വ്യക്തിത്വമാണ്.

ഷാരൂഖ് ഖാനൊപ്പം ഓം ശാന്തി ഓം എന്ന ചിത്രത്തിലൂടെയായിരുന്നു ദീപികയുടെ ഗംഭീരമായ അരങ്ങേറ്റം. എന്നാൽ പിന്നീടങ്ങോട് മികവാർന്ന പ്രകടനങ്ങളുടെ ഒരു പരമ്പരയാണ് ദീപികയിൽ കണ്ടത്, ബോളിവുഡ് ഭരിച്ച ഖാൻമാർക്കും അക്ഷയ് കുമാറിനും ഒപ്പത്തിനൊപ്പമെന്ന രീതിയിൽ ദീപിക ഉയർന്നുവന്നു. ദീപികയ്ക്കായി നായികാപ്രാധാന്യമുള്ള ചിത്രങ്ങളുണ്ടായി.

സഞ്ജയ് ലീല ബൻസാലിയുടെ 'ഗോലിയോൻ കി രാസ്‌ലീല രാം ലീല' എന്ന ചിത്രത്തിൽ അഭിനയിച്ചതോടെ ദീപികയുടെ ചിത്രങ്ങൾ വാണിജ്യപരമായി മുന്നേറി തുടങ്ങി. ഇന്ന് ബോളിവുഡിലെ സൂപ്പർസ്റ്റാർ പദവിയിലുള്ള നായികയാണ് ദീപിക.

രൺവീർ സിങ് ആണ് ദീപികയുടെ ജീവിതപങ്കാളി. ദമ്പതികൾക്ക് ദുആ പദുകോണ്‍ സിങ് എന്നൊരു മകളാണ് ഉള്ളത്.