അന്ന് കാജോളിന്റെ ഒക്കത്തിരുന്ന കുട്ടി ഇന്ന് തോളപ്പം വളർന്നു; 300 കോടി ക്ലബ്ബിലെ താരം

Throwback: ബാലതാരങ്ങളായി അഭിനയം കുറിച്ച് പിൽക്കാലത്ത് സൂപ്പർ സ്റ്റാറുകളായി മാറിയ നിരവധി പേരുണ്ട്. ഈ ചിത്രത്തിൽ കാജോൾ ഒക്കത്തെടുത്തിരിക്കുന്ന പിങ്ക് ഫ്രോക്കിട്ട ഈ കൊച്ചു പെൺകുട്ടി ഇന്ന് ഇന്ത്യൻ സിനിമയിലെ തന്നെ അറിയപ്പെടുന്ന നായികയാണ്.

മറ്റാരുമല്ല, ഫാത്തിമ സന ഷെയ്ഖ് ആണ് ചിത്രത്തിലെ കുട്ടി. കാജോളിന്റെയും ഫാത്തിമ സനയുടെയും പുതിയ ചിത്രമാണ് ശ്രദ്ധ നേടുന്നത്.

1997-ൽ പുറത്തിറങ്ങിയ സൂപ്പർഹിറ്റ് ചിത്രം 'ഇഷ്ക്' എന്ന സിനിമയിലാണ് ഫാത്തിമ സന കാജോളിനൊപ്പം അഭിനയിച്ചത്. അജയ് ദേവ്ഗൺ, കാജോൾ, ആമിർ ഖാൻ, ജൂഹി ചൗള എന്നിവർ തകർത്തഭിനയിച്ച ഈ ചിത്രത്തിലൂടെയായിരുന്നു ഫാത്തിമ വെള്ളിത്തിരയിൽ അരങ്ങേറ്റം കുറിച്ചത്.

പിന്നീട് കമൽഹാസൻ ചിത്രം 'ചാച്ചി 420'-ലും ഫാത്തിമ ശ്രദ്ധേയമായ വേഷം ചെയ്തു. ഷാരൂഖ് ഖാൻ ചിത്രം 'വൺ ടൂ കാ ഫോറിലും' ഫാത്തിമ ബാലതാരമായി അഭിനയിച്ചിട്ടുണ്ട്.

ബാലതാരമായി പല സിനിമകൾ ചെയ്തെങ്കിലും ഫാത്തിമയുടെ ജീവിതം മാറ്റിമറിച്ചത് 2016-ൽ പുറത്തിറങ്ങിയ 'ദംഗൽ' ആണ്. ഗുസ്തി താരം ഗീത ഫോഗട്ടിന്റെ ജീവിതം ആസ്പദമാക്കി ഒരുക്കിയ ഈ ചിത്രത്തിൽ ആമിർ ഖാന്റെ മകളായാണ് ഫാത്തിമ എത്തിയത്. വെറും 70 കോടി ബജറ്റിൽ ഒരുക്കിയ ചിത്രം ഇന്ത്യയിൽ മാത്രം 387 കോടിയും ആഗോളതലത്തിൽ 2000 കോടിയിലധികവുമാണ് വാരിക്കൂട്ടിയത്. ഈ ഒറ്റ സിനിമയോടെ ഫാത്തിമ ഇന്ത്യയൊട്ടാകെ പ്രശസ്തയായി.

ദംഗലിന് ശേഷം അമിതാഭ് ബച്ചൻ, ആമിർ ഖാൻ, കത്രീന കൈഫ് എന്നിവർക്കൊപ്പം 'തഗ്‌സ് ഓഫ് ഹിന്ദോസ്ഥാൻ' എന്ന ബിഗ് ബജറ്റ് ചിത്രത്തിൽ ഫാത്തിമയ്ക്ക് അവസരം ലഭിച്ചു. എന്നാൽ ചിത്രം ബോക്സ് ഓഫീസിൽ വൻ പരാജയമായി.

ആ പരാജയത്തിന് ശേഷം തന്നെ രണ്ട് സിനിമകളിൽ നിന്ന് ഒഴിവാക്കിയതായും തന്റെ അഭിനയ പാടവത്തെക്കുറിച്ച് തനിക്ക് തന്നെ സംശയങ്ങൾ തോന്നിയിരുന്നതായും ഫാത്തിമ തുറന്നു പറഞ്ഞിട്ടുണ്ട്. എന്നാൽ സംവിധായകൻ അനുരാഗ് ബസു തന്റെ 'ലുഡോ' (Ludo) എന്ന ചിത്രത്തിലേക്ക് കാസ്റ്റ് ചെയ്തതോടെയാണ് ഫാത്തിമയ്ക്ക് ആത്മവിശ്വാസം തിരിച്ചുകിട്ടിയത്.

പിന്നീട് 'ധക് ധക്', വിക്കി കൗശലിനൊപ്പമുള്ള 'സാം ബഹദൂർ' എന്നീ ചിത്രങ്ങളിലെ പ്രകടനം ഏറെ പ്രശംസിക്കപ്പെട്ടു. അനുരാഗ് ബസുവിന്റെ തന്നെ 'മെട്രോ... ഇൻ ദിനോ' ആണ് ഒടുവിൽ തിയേറ്ററുകളിലെത്തിയ ചിത്രം.