48-ാം വയസ്സിൽ അപ്രതീക്ഷിതമരണം, നൊമ്പരമായി മനോജ് ഭാരതിരാജ;  മരിച്ചത് നടി നന്ദനയുടെ ഭർത്താവ്

പ്രശസ്ത തമിഴ് സംവിധായകന്‍ ഭാരതിരാജയുടെ മകനും നടനുമായ മനോജ് ഭാരതിരാജ ചൊവ്വാഴ്ചയാണ് അന്തരിച്ചത്. ഹൃദയാഘാതത്തെ തുടർന്നായിരുന്നു മരണം. കഴിഞ്ഞ ആഴ്ച ബൈപാസ് ശസ്ത്രക്രിയയ്ക്ക് വിധേയനായിരുന്നു. 48 വയസ്സുകാരനായ മനോജ് ഭാരതിരാജയുടെ അപ്രതീക്ഷിതമായ മരണത്തിന്റെ ആഘാതത്തിലാണ് സിനിമാലോകവും കുടുംബവും.

മനോജിനു കേരളവുമായിട്ടുമുണ്ട് ബന്ധം. മനോജ് വിവാഹം ചെയ്തിരിക്കുന്നത് നടിയും കോഴിക്കോട് സ്വദേശിയുമായ നന്ദനയെ (അശ്വതി) ആണ്. 2006ൽ ആയിരുന്നു ഇരുവരുടെയും വിവാഹം.

അർഷിത, മതിവതാനി എന്നിങ്ങനെ രണ്ടു മക്കളാണ് ദമ്പതികൾക്കുള്ളത്.

സ്നേഹിതൻ, സ്വപ്നം കൊണ്ട് തുലാഭാരം, സേതുരാമയ്യർ സിബിഐ, ചതിക്കാത്ത ചന്തു തുടങ്ങിയ ചിത്രങ്ങളിലൂടെ ശ്രദ്ധ നേടിയ നടിയാണ് നന്ദന. നാലോളം തമിഴ് ചിത്രങ്ങളിലും നന്ദന അഭിനയിച്ചിട്ടുണ്ട്. വിവാഹശേഷം അഭിനയത്തോട് വിട പറയുകയായിരുന്നു.

ഭാരതിരാജയുടെ സംവിധാനത്തിൽ 1999ൽ പുറത്തിറങ്ങിയ 'താജ് മഹല്‍' എന്ന ചിത്രത്തിലൂടെയായിരുന്നു മനോജിന്റെ അരങ്ങേറ്റം. സമുദ്രം, കടല്‍ പൂക്കള്‍, അല്ലി അര്‍ജുന, വര്‍ഷമെല്ലാം വസന്തം, പല്ലവന്‍, ഈറ നിലം, മഹാ നടികന്‍, അന്നക്കൊടി, മാനാട് തുടങ്ങി പതിനെട്ടോളം സിനിമകളിൽ അഭിനയിച്ചിട്ടുണ്ട്. 2022ൽ പുറത്തിറങ്ങിയ വിരുമന്‍ എന്ന ചിത്രത്തിലാണ് അവസാനമായി അഭിനയിച്ചത്.

മണിരത്‌നത്തിനൊപ്പം ബോംബൈ എന്ന ചിത്രത്തിലും ഷങ്കറിനൊപ്പം എന്തിരന്‍ എന്ന ചിത്രത്തിലും മനോജ് സഹസംവിധായകനായി പ്രവര്‍ത്തിച്ചിട്ടുണ്ട്. 2023ൽ പുറത്തിറങ്ങിയ 'മാര്‍കഴി തിങ്കള്‍' എന്ന ചിത്രത്തിലൂടെ സിനിമ സംവിധായകനുമായി. പിതാവ് ഭാരതിരാജയായിരുന്നു ഈ ചിത്രം നിര്‍മ്മിച്ചത്

അച്ഛനായ ഭാരതിരാജയ്ക്ക് ഒപ്പം മനോജ്.