അന്ന് മമ്മൂട്ടിയുടെയും കമൽഹാസൻ്റെയും നായിക; ഇന്ന് കോടികൾ ആസ്തിയുള്ള വ്യവസായി, ഓർമയുണ്ടോ ഈ നടിയെ?

പഞ്ചാബി കുടുംബത്തിൽ ജനിച്ച് ചെന്നൈയിൽ വളർന്ന മഞ്ചരി ധോടി, ഒരു ഷോപ്പിംഗ് മാളിൽ വെച്ച് സംവിധായകൻ ദാസരി നാരായണ റാവുവിന്റെ കണ്ണിൽപ്പെട്ടതോടെയാണ് സിനിമയിലേക്കുള്ള വഴിതുറന്നത്.

തന്റെ ആദ്യ സിനിമയുടെ പേരായ 'സ്വപ്ന' എന്നത് തന്നെ നായികയ്ക്കും ദാസരി നാരായണ റാവു നൽകുകയായിരുന്നു. പിന്നീട് തെന്നിന്ത്യൻ സിനിമകളിൽ അവർ ആ പേരിൽ അറിയപ്പെട്ടു.

മമ്മൂട്ടി നായകനായി അഭിനയിച്ച ആദ്യ ചിത്രങ്ങളിലൊന്നായ ‘തൃഷ്ണ’യിലെ നായിക സ്വപ്നയായിരുന്നു.

അന്നത്തെ മുൻനിര സംവിധായകനായിരുന്ന ഐ.വി. ശശിയുടെ അഹിംസ, ഉയരങ്ങളിൽ, അങ്ങാടിക്കപ്പുറത്ത് തുടങ്ങി നിരവധി ചിത്രങ്ങളിൽ സ്വപ്ന പ്രധാന വേഷങ്ങൾ കൈകാര്യം ചെയ്തു.

ഒരേ സിനിമയിൽ തന്നെ പ്രേംനസീറിന്റെയും മമ്മൂട്ടിയുടെയും നായികയായി സ്വപ്ന അഭിനയിച്ചു( (ഒരു തിര പിന്നെയും തിര). അച്ഛനായ പ്രേംനസീറിന്റെയും മകനായ ഷാനവാസിന്റെയും നായികയായി ഒരേ വർഷം അഭിനയിച്ച നടിയെന്ന അപൂർവ്വതയും സ്വപ്നയ്ക്ക് സ്വന്തം.

പ്രേംനസീർ, മമ്മൂട്ടി, മോഹൻലാൽ, കമൽഹാസൻ, വിഷ്ണുവർദ്ധൻ തുടങ്ങി തെന്നിന്ത്യയിലെ സൂപ്പർതാരങ്ങളുടെയെല്ലാം നായികയായി സ്വപ്ന തിളങ്ങി.

സ്വപ്നയുടെ കരിയറിലെ വലിയൊരു കൗതുകം, ഏകദേശം എട്ടോളം സിനിമകളിൽ അവരുടെ കഥാപാത്രത്തിന്റെ പേരും 'സ്വപ്ന' എന്ന് തന്നെയായിരുന്നു എന്നതാണ്.

കരിയറിന്റെ ഉച്ചസ്ഥായിയിൽ നിൽക്കുമ്പോൾ ഹിന്ദി സിനിമയിൽ ശ്രദ്ധിക്കപ്പെടാനായി മലയാളം വിട്ടുപോയെങ്കിലും ബോളിവുഡിൽ അവർക്ക് വലിയ ചലനം സൃഷ്ടിക്കാൻ കഴിഞ്ഞില്ല.

1990-ൽ പുറത്തിറങ്ങിയ 'കടത്തനാടൻ അമ്പാടി'യാണ് സ്വപ്നയുടെ അവസാന മലയാള ചിത്രം. 1993-ൽ വിവാഹിതയായതോടെ അവർ പൂർണ്ണമായും വെള്ളിത്തിരയിൽ നിന്ന് മറഞ്ഞു.

നിലവിൽ ഭർത്താവ് രാമൻ ഖന്നയ്ക്കൊപ്പം മുംബൈയിൽ ബിസിനസ് രംഗത്ത് സജീവമാണ് സ്വപ്ന. 'സംഗിണി എന്റർടൈൻമെന്റ്' എന്ന ഇവന്റ് മാനേജ്‌മെന്റ് കമ്പനിയും റിസോർട്ടും അവർ നടത്തിവരുന്നു. വിദേശത്ത് ഇന്ത്യന്‍ ക്ലാസിക്കല്‍ നൃത്ത പരിപാടികള്‍ സംഘടിപ്പിക്കുന്ന കമ്പനിയാണ് സംഗിണി എന്റര്‍ടൈന്‍മെന്റ്.

മുംബൈയിലെ കര്‍ജാത്തില്‍ ദ് ബ്രുക്ക് അറ്റ് ഖന്നാസ് എന്ന റിസോര്‍ട്ട് ബിസിനസും ഈ ദമ്പതികള്‍ക്കുണ്ട്.