മരുമകനെ ആളുകൾ ട്രോളുന്നതാണ് എനിക്കേറെ വിഷമം: സുനിൽ ഷെട്ടി

2023 ക്രിക്കറ്റ് ലോകകപ്പിൽ നേരിടേണ്ടി വന്ന തോൽവിക്ക് ശേഷം ഇന്ത്യൻ താരങ്ങൾക്ക്  സോഷ്യൽ മീഡിയയിൽ ഏറെ ട്രോളുകളും ഏറ്റുവാങ്ങേണ്ടി വന്നിരുന്നു. തന്റെ മരുമകനും ഇന്ത്യൻ താരവുമായ കെഎൽ രാഹുലിന് ലോകകപ്പ് തോൽവിക്ക് ശേഷം ഏറ്റുവാങ്ങേണ്ടിവന്ന ട്രോളുകളെപ്പറ്റി  ബോളിവുഡ് താരം സുനിൽ ഷെട്ടി പറഞ്ഞ വാക്കുകളാണ് ഇപ്പോൾ ശ്രദ്ധ നേടുന്നത്. മകൾ ആതിയയും രാഹുലും ട്രോളുകളോട് പ്രതികരിക്കുന്നില്ലെങ്കിലും പരിഹാസങ്ങൾ തന്നെ വേദനിപ്പിക്കുന്നുണ്ടെന്നാണ് സുനിൽ ഷെട്ടി പറയുന്നത്.

എഎൻഐയ്ക്ക് നൽകിയ അഭിമുഖത്തിൽ, ലോകകപ്പിലെ ഇന്ത്യയുടെ തോൽവി വേദനയുണ്ടാക്കിയോ എന്ന ചോദ്യത്തിന് മറുപടി പറയുകയായിരുന്നു സുനിൽ ഷെട്ടി.  "വളരെ വേദനിപ്പിച്ചു, രാഹുലിനെക്കാൾ കൂടുതൽ എന്നെയാണ് അത് വേദനിപ്പിച്ചത്. എന്നെ ആരെങ്കിലും കളിയാക്കുന്നതിലേറെ വിഷമം തോന്നി. നിങ്ങൾക്കറിയാമോ ആ കുട്ടികൾ ഇപ്പോൾ എങ്ങനെയാണെന്ന്, അവർ ഒന്നിനെക്കുറിച്ചും സംസാരിക്കാറില്ല. എന്റെ ബാറ്റ് സംസാരിച്ചോളും എന്ന് മാത്രമാണ് ഇതേക്കുറിച്ച് സംസാരിക്കുമ്പോൾ പറയാറുള്ളത്. അതുകൊണ്ട് ഞങ്ങൾ ഇതുവരെ ഒന്നും പറഞ്ഞിട്ടില്ല. ആ ട്രോളുകൾ  രാഹുലിനെയും അതിയയേക്കാളും മറ്റാരെക്കാളും പത്തിരട്ടി, നൂറിരട്ടി എന്നെ വേദനിപ്പിക്കുന്നു. മാതാപിതാക്കൾ എന്ന നിലയിൽ, രാഹുലിന്റെ മാതാപിതാക്കളും ഞങ്ങളും മാത്രമാണ് കുട്ടികൾ കടന്നുപോകുന്നതിനേക്കാൾ കൂടുതൽ വേദന അനുഭവിക്കുന്നത്," സുനിൽ ഷെട്ടി മനസ്സ് തുറന്നു.

View this post on Instagram

A post shared by Suniel Shetty (@suniel.shetty)

"ഞാൻ അദ്ദേഹത്തിന്റെ (കെഎൽ രാഹുലിന്റെ) ആരാധകനാണ്. അന്നും ഇന്നും ഞാൻ രാഹുലിന്റെ ക്രിക്കറ്റിന്റെ ആരാധകനാണ്. അവൻ എന്റെ മകനായിരിക്കാം, പക്ഷേ ഞാൻ അവന്റെ ആരാധകനാണ്. അവർ ഫൈനലിൽ തോറ്റിരിക്കാം, പക്ഷേ അവർ ഈ രാജ്യത്തെ എല്ലാവരുടെയും ഹൃദയം കീഴടക്കി. ഞാൻ ആളുകളെ കാണുമ്പോൾ, അവർ പറയും, 'വാട്ട് എ ടീം യാർ.' നേരത്തെ അത് ജയവും തോൽവിയും മാത്രമായിരുന്നു,” അദ്ദേഹം കൂട്ടിച്ചേർത്തു.

ലോകകപ്പ് ഫൈനലിലെ ഇന്ത്യയുടെ തോൽവി അപ്രതീക്ഷിതമായിരുന്നുവെന്നും, തനിക്കും കുടുംബത്തിനും ഞെട്ടലുണ്ടാക്കിയെന്നും സുനിൽ ഷെട്ടി പറഞ്ഞു. “അവർ തോൽക്കുമെന്ന് അവർ പോലും കരുതിക്കാണില്ല. ടീം സ്പിരിറ്റിൽ അവർ ഒരു മാസ്റ്റർ ക്ലാസ് ആയിരുന്നു, അവിശ്വസനീയമായിരുന്നു, അതാണ് ഈ ടീമിന്റെ സൗന്ദര്യം, എല്ലാത്തിനുമുപരിയായി നമ്മുടെ രാജ്യം. അതുകൊണ്ടാണ് ബഹുമാനം. അതുകൊണ്ടാണ് നിങ്ങൾ കാണുന്ന സ്നേഹവും വാത്സല്യവും." സുനിൽ ഷെട്ടി പറഞ്ഞു.