രണ്ടു തവണ ക്ഷയരോഗം വന്നു, ശരീരഭാരം 75ൽ നിന്നും 35ൽ എത്തി; അതിജീവനകഥ പങ്കുവച്ച് സുഹാസിനി

നടി, സംവിധായിക എന്നീ നിലകളിലൊക്കെ ഏറെ പ്രശസ്തയാണ് സുഹാസിനി മണിരത്നം. മലയാളികൾ സ്വന്തം വീട്ടിലെ ഒരംഗത്തെ പോലെ സ്നേഹവായ്പയോടെ ചേർത്തുവയ്ക്കുന്ന നടി കൂടിയാണ് സുഹാസിനി.

അടുത്തിടെ ഒരു അഭിമുഖത്തിൽ, താൻ രണ്ടുതവണ ക്ഷയരോഗ ബാധിതയായിരുന്നു എന്നാണ് സുഹാസിനി വെളിപ്പെടുത്തിയത്. രോഗത്തെ അതിജീവിച്ച അനുഭവങ്ങളും സുഹാസിനി പങ്കുവച്ചു.

ആരോടെങ്കിലും ഇക്കാര്യം പറയാനുള്ള മടി കൊണ്ട്, ആദ്യം ഞാൻ എന്റെ രോഗനിർണയം രഹസ്യമാക്കി വച്ചെന്നാണ് ദി ബെറ്റർ ഇന്ത്യയ്ക്ക് നൽകിയ അഭിമുഖത്തിൽ സുഹാസിനി പറഞ്ഞത്.

ആറുമാസത്തേക്ക് മരുന്ന് കഴിച്ചു, രോഗവിമുക്തി നേടി. ക്ഷയരോഗത്തെ കുറിച്ച് ബോധവത്കരണം ആവശ്യമാണ് എന്ന തിരിച്ചറിവാണ് സമൂഹത്തിനുവേണ്ടി പ്രവർത്തിക്കാനും ടിബിയെക്കുറിച്ച് അവബോധം സൃഷ്ടിക്കാനും പ്രേരിപ്പിച്ചത് എന്നും സുഹാസിനി കൂട്ടിച്ചേർത്തു.

6 വയസ്സിലും 36 വയസ്സിലുമാണ് സുഹാസിനിയ്ക്ക് ക്ഷയരോഗം ബാധിച്ചത്. ക്ഷയരോഗം മൂലം ശരീരഭാരം ഗണ്യമായി കുറയുകയും കേൾവിശക്തി തകരാറിലാവുകയും ചെയ്തു. രോഗ സമയത്ത് ശരീരഭാരം 75 കിലോയിൽ നിന്നും 35 ആയി കുറയുകയായിരുന്നു.

ക്ഷയരോഗ പ്രതിരോധ പ്രവർത്തനങ്ങളിൽ ഏറെ സജീവമാണ് സുഹാസിനി ഇപ്പോൾ. ക്ഷയരോഗികൾക്ക് ആശ്വാസം പകരുന്ന റിച്ച് ഇന്ത്യ എന്ന സംഘടനയുടെ പ്രവർത്തകയാണ് സുഹാസിനി ഇന്ന്.