'സുഡാനി'യിലെ ഉമ്മമാര്‍ വീണ്ടും എത്തുന്നു; മാസ് ലുക്കില്‍ 'ഡാകിനി'

'സുഡാനി ഫ്രം നൈജീരിയ' എന്ന ചിത്രം കണ്ടിറങ്ങിയവരെല്ലാം കൂടെക്കൂട്ടിയ രണ്ടു കഥാപാത്രങ്ങളായിരുന്നു അതിലെ ഉമ്മമാര്‍. സരസ ബാലുശ്ശേരിയും സാവിത്രി ശ്രീധരനും വീണ്ടും എത്തുകയാണ് 'ഡാകിനി' എന്ന ചിത്രത്തിലൂടെ. ചിത്രത്തിന്റെ ഫസ്റ്റ് ലുക്ക് പുറത്തിറങ്ങി.

'ഒറ്റമുറി വെളിച്ചം' എന്ന ചിത്രത്തിലൂടെ മികച്ച ചിത്രത്തിനുള്ള സംസ്ഥാന പുരസ്‌കാരം നേടിയ രാഹുല്‍ റിജി നായരാണ് 'ഡാകിനി' ഒരുക്കുന്നത്. സുരാജ് വെഞ്ഞാറമൂട്, ചെമ്പന്‍ വിനോദ് ജോസ്, അലന്‍സിയര്‍, ഇന്ദ്രന്‍സ്, പൗളി വിത്സണ്‍, സേതുലക്ഷ്മി തുടങ്ങിയവരും ചിത്രത്തിലുണ്ട്.

'പുള്ളിക്കാരന്‍ സ്റ്റാറാ' എന്ന ചിത്രത്തിനു ശേഷം യൂണിവേഴ്സല്‍ സിനിമയുടെ ബാനറില്‍ ബി.രാകേഷും 'തൊണ്ടിമുതലും ദൃക്‌സാക്ഷി'ക്കും ശേഷം ഉര്‍വശി തിയേറ്റേഴ്സിന്റെ ബാനറില്‍ സന്ദീപ് സേനനും അനീഷ് എം.തോമസും ചേര്‍ന്ന് നിര്‍മ്മിക്കുന്ന ചിത്രം വിതരണത്തിന് എത്തിക്കുന്നത് വിജയ് ബാബുവിന്റെ ഫ്രൈഡേ ഫിലിം ഹൗസ് ആണ്.

രാഹുല്‍ റിജി നായര്‍ തന്നെയാണ് ചിത്രത്തിന്റെ കഥയും തിരക്കഥയും ഒരുക്കിയിരിക്കുന്നത്. ഛായാഗ്രഹണം അലക്‌സ് പുളിക്കല്‍, എഡിറ്റിങ് അപ്പു ഭട്ടതിരി എന്നിവര്‍ നിര്‍വ്വഹിക്കുന്നു. സംഗീതം ഒരുക്കുന്നത് രാഹുല്‍ രാജാണ്. ഈ വര്‍ഷം അവസാനത്തോടെ ചിത്രം തിയേറ്ററുകളില്‍ എത്തുമെന്നാണ് പ്രതീക്ഷിക്കുന്നത്.