"അദ്ദേഹം വികാരാധീനനായി എന്നെ ഏറെനേരം കെട്ടിപ്പിടിച്ചു": ശ്രീനിവാസൻ​ രജനീകാന്തിനെ കരയിച്ചപ്പോൾ

മലയാള സിനിമയിൽ ഏറ്റവും വിജയകരമായി നടൻ തിരക്കഥാകൃത്ത് എന്നീ നിലകളിൽ ശ്രദ്ധേയനായ അതുല്യപ്രതിഭയാണ് ശ്രീനിവാസൻ. ചെന്നൈയിലെ അഡയാർ ഫിലിം ഇൻസ്റ്റിറ്റ്യൂട്ടിൽ (ഇന്നത്തെ എം.ജി.ആർ ഗവൺമെന്റ് ഫിലിം ആൻഡ് ടെലിവിഷൻ ട്രെയിനിംഗ് ഇൻസ്റ്റിറ്റ്യൂട്ട്) ശ്രീനിവാസന്റെ സീനിയറായിരുന്നു തമിഴ് സൂപ്പർതാരം രജനികാന്ത്. സൂപ്പർസ്റ്റാർ ആകുന്നതിനും മുൻപേ തുടങ്ങിയ ഈ സൗഹൃദത്തെക്കുറിച്ചും ഒരിക്കൽ താൻ രജനികാന്തിനെ കരയിച്ചതിനെക്കുറിച്ചും ശ്രീനിവാസൻ പങ്കുവെച്ച ഓർമ്മകൾ കൗതുകകരമാണ്.

2000-കളിൽ ശ്രീനിവാസൻ തിരക്കഥയെഴുതി അഭിനയിച്ച 'കഥ പറയുമ്പോൾ' എന്ന സിനിമയുടെ വിജയത്തിനു ശേഷമാണ് ഈ സംഭവം നടക്കുന്നത്. ചിത്രം കണ്ട പ്രശസ്ത തമിഴ് സംവിധായകൻ പി. വാസു അത് കാണാൻ രജനികാന്തിനോട് നിർദ്ദേശിച്ചു.

Also Read: സിനിമയുടെ ശ്രീനി, കേരളത്തിന്റേയും

2008-ൽ നൽകിയ ഒരു അഭിമുഖത്തിൽ ശ്രീനിവാസൻ ആ നിമിഷം ഓർത്തെടുത്തു, "ഞാൻ അന്ന് മുംബൈയിലായിരുന്നു. തിയേറ്ററിൽ എത്തിയപ്പോൾ സിനിമ അവസാനിക്കാറായിരുന്നു. സിനിമ കഴിഞ്ഞ് രജനികാന്ത് പുറത്തിറങ്ങുന്നത് കണ്ടു. അദ്ദേഹത്തിന്റെ കണ്ണുകൾ നിറഞ്ഞിരുന്നു. വികാരാധീനനായ അദ്ദേഹം എന്നെ നോക്കി വരികയും ഏറെ നേരം കെട്ടിപ്പിടിക്കുകയും ചെയ്തു. ശേഷം അദ്ദേഹം പറഞ്ഞു, 'നീ എന്നെ കരയിപ്പിച്ചു കളഞ്ഞു'."

സിനിമയുടെ കഥ അശോക് രാജ് എന്ന സൂപ്പർതാരത്തെയും ബാലൻ എന്ന ബാർബറെയും കുറിച്ചായിരുന്നു. ഇൻസ്റ്റിറ്റ്യൂട്ടിൽ പഠിക്കുമ്പോൾ ശിവാജി റാവു എന്ന പഴയ സുഹൃത്ത് പിന്നീട് രജനികാന്ത് എന്ന മഹാനടനായി മാറുമെന്ന് താൻ അന്ന് കരുതിയിരുന്നില്ലെന്ന് ശ്രീനിവാസൻ പറയുന്നു. "രണ്ടാം ദിവസം അദ്ദേഹം എന്നോട് സിനിമയിലെ സൂക്ഷ്മമായ സീനുകളെക്കുറിച്ച് ചോദിച്ചു. സിനിമയേക്കാൾ കൂടുതൽ എന്നെക്കുറിച്ച് അറിയാനായിരുന്നു അദ്ദേഹത്തിന് താല്പര്യം," ശ്രീനിവാസൻ കൂട്ടിച്ചേർത്തു.

Also Read: വെള്ളിത്തിരയിലെ 'സാധാരണക്കാരൻ'; ശ്രീനിവാസൻ എന്ന വിസ്മയം

താൻ 'റോബോട്ട്' (എന്തിരൻ) സിനിമയ്ക്ക് ഒപ്പിട്ടുപോയെന്നും ഈ സിനിമ കമൽഹാസൻ ചെയ്താൽ എങ്ങനെയുണ്ടാകുമെന്നും രജനികാന്ത് ആദ്യം ചോദിച്ചിരുന്നു. എന്നാൽ ഒടുവിൽ രജനികാന്ത് തന്നെ തമിഴിലും ('കുസേലൻ'), തെലുങ്കിലും ('കഥാനായകുഡു') അഭിനയിക്കാൻ തീരുമാനിച്ചു. മമ്മൂട്ടി മലയാളത്തിൽ ചെയ്ത സൂപ്പർതാരത്തിന്റെ വേഷം രജനികാന്ത് അവതരിപ്പിച്ചു. പശുപതിയായിരുന്നു തമിഴിൽ ബാലന്റെ വേഷം ചെയ്തത്.

Also Read: ചിരിയും ചിന്തയും പകർന്ന ഇതിഹാസം: മലയാളത്തിന്റെ പ്രിയ 'ശ്രീനിയേട്ടന്' വിട

തമിഴ്, തെലുങ്ക് പതിപ്പുകൾക്ക് മലയാളം സിനിമയുടെ അത്ര വിജയം നേടാൻ സാധിച്ചില്ലെങ്കിലും രജനികാന്ത് എന്ന മനുഷ്യസ്നേഹിയെക്കുറിച്ച് ശ്രീനിവാസന് നൂറുനാവാണ്. "അദ്ദേഹം വലിയ ഹൃദയമുള്ള മനുഷ്യനാണ്. ഇൻസ്റ്റിറ്റ്യൂട്ടിൽ കൂടെയുണ്ടായിരുന്നവരെ സാമ്പത്തികമായി സഹായിക്കുന്നതിനേക്കാൾ അവർക്ക് സിനിമകളിൽ അവസരം നൽകി സഹായിക്കാനാണ് അദ്ദേഹം ശ്രമിക്കാറുള്ളത്," ശ്രീനിവാസൻ പറഞ്ഞു.

പിന്നീട് ഷാരൂഖ് ഖാനും ഇർഫാൻ ഖാനും പ്രധാന വേഷങ്ങളിൽ അഭിനയിച്ച 'ബില്ലു' എന്ന പേരിൽ ഈ ചിത്രം ഹിന്ദിയിലും പുനർനിർമ്മിക്കപ്പെട്ടിരുന്നു.

Read More: 48 വർഷം നീണ്ട സിനിമാ ജീവിതത്തിന് വിരാമം; ശ്രീനിവാസൻ ഇനി ഓർമ്മ