ഇത് നിങ്ങൾ ഉറപ്പായും അനുഭവിച്ചറിയണം; വയനാട്ടിൽ അവധി ആഘോഷിച്ച് ശ്രിയ

2001 ല്‍ ഇറങ്ങിയ ‘ഇഷ്ടം’ എന്ന തെലുങ്ക് ചിത്രത്തിലൂടെയാണ് ശ്രിയ​ അഭിനയരംഗത്തെത്തുന്നത്. 2003ല്‍ റിതേഷ് ദേശ്മുഖിനും ജനീലിയ ഡിസൂസയ്ക്കുമൊപ്പം ‘തുജേ മേരീ കസ’ത്തിലൂടെ ബോളിവുഡിലേക്കും എത്തി.

തമിഴ്, തെലുങ്ക്, ഹിന്ദികളിലാണ് കൂടുതലും അഭിനയിച്ചതെങ്കിലും മലയാളികൾക്കും പ്രിയങ്കരിയായ നടിയാണ് ശ്രിയ ശരൺ. മലയാളത്തിൽ പൃഥ്വിരാജിന്റെ നായികയായി ‘പോക്കിരിരാജ’യിലും ശ്രദ്ധേയ അഭിനയമാണ് ശ്രിയ കാഴ്ച വച്ചത്.

ഭർത്താവ് ആൻഡ്രേയ് കൊഷ്ചീവിനൊപ്പം ബാഴ്സലോണയിലാണ് ശ്രിയ ഇപ്പോൾ. ഏറെ നാളത്തെ പ്രണയത്തിനുശേഷം 2018ലാണ് ശ്രിയ റഷ്യക്കാരനായ ആൻഡ്രേയ് കൊഷ്ചീവിനെ വിവാഹം ചെയ്തത്. വിവാഹ ജീവിതത്തിൽ സ്വകാര്യത ഇഷ്ടപ്പെടുന്ന ശ്രിയ മാധ്യമശ്രദ്ധയിൽനിന്നും അകന്നു കഴിയുകയാണ്.

എന്നാൽ ഇപ്പോഴിതാ കേരളത്തിൽ അവധി ആഘോഷിക്കാനെത്തിയ ശ്രിയയുടെ ചിത്രങ്ങളാണ് സോഷ്യൽ മീഡിയയിൽ ശ്രദ്ധേയമാകുന്നത്. മകൾക്കൊപ്പം വയനാട്ടിലെ തേയിലത്തോട്ടത്തിനു നടുവിൽ മകൾക്കൊപ്പം നിൽക്കുന്ന ചിത്രങ്ങൾ ശ്രിയ തൻ്റെ ഇൻസ്റ്റഗ്രാം പേജിലൂടെയാണ് പങ്കുവച്ചിരിക്കുന്നത്.

"സമയം മന്ദഗതിയിലാകുന്ന ഇടമാണിത്. തേയിലത്തോട്ടത്തിലൂടെയും കാപ്പിത്തോട്ടത്തിലൂടെയും നടക്കുക. പ്രകൃതിയോടൊപ്പം നടന്ന് ഓർമ്മകൾ സൃഷ്ടിക്കുന്നു. നിങ്ങൾക്ക് ഇത് തീർച്ചയായും ആവശ്യമാണ്" എന്ന കുറിപ്പും ചിത്രങ്ങൾക്കൊപ്പമുണ്ട്.