ഒരു കാലത്ത് മലയാളത്തിന്റെ പ്രിയ താരജോഡികളായിരുന്നു ശോഭനയും മമ്മൂട്ടിയും. വർഷങ്ങൾക്കു ശേഷമിതാ മമ്മൂട്ടിയുടെ മകനും മലയാളത്തിന്റെ യങ് സൂപ്പർസ്റ്റാറുമായ ദുൽഖർ നായകനാകുന്ന സിനിമയിൽ ഒരു പ്രധാനവേഷത്തിൽ ശോഭന എത്തുന്നു. ദുൽഖറിനൊപ്പം നിൽക്കുന്ന സെൽഫി സോഷ്യൽ മീഡിയയിൽ പങ്കുവച്ചുകൊണ്ട് ശോഭന ചോദിക്കുന്നത് സല്ലുവെന്ന് വിളിക്കണോ സ്റ്റൈലിഷ് ഡിക്യുവെന്ന് വിളിക്കണോ എന്നാണ്.

സത്യൻ അന്തിക്കാടിന്റെ മകൻ അനൂപ് സത്യൻ ആദ്യമായി സംവിധാനം ചെയ്യുന്ന ചിത്രത്തിലൂടെ ആറു വർഷങ്ങൾക്ക് ശേഷം ശോഭന വീണ്ടും മലയാളത്തിലേക്ക് തിരിച്ചുവരവ് നടത്തുകയാണ്. കൂടെ സുരേഷ് ഗോപി, കല്യാണി പ്രിയദർശൻ, ദുൽഖർ സൽമാൻ എന്നിവരുമുണ്ട്. തലമുറകളുടെ ഒരു അപൂർവ്വ സംഗമം കൂടിയാണിത്. ചെന്നൈയിൽ ഷൂട്ടിങ് പുരോഗമിക്കുന്ന ചിത്രത്തിന്റെ നിർമാതാവും ദുൽഖർ സൽമാനാണ്.

2016 ൽ വിനീത് ശ്രീനിവാസൻ സംവിധാനം ചെയ്ത ‘തിര’ സിനിമയിലാണ് ശോഭന ഏറ്റവും ഒടുവിലായി അഭിനയിച്ചത്. 2005 ൽ പുറത്തിറങ്ങിയ ‘മകൾക്ക്’ എന്ന സിനിമയിലാണ് സുരേഷ് ഗോപി-ശോഭന എന്നിവര്‍ ഏറ്റവുമൊടുവില്‍ ഒരുമിച്ചെത്തിയത്. ‘മണിച്ചിത്രത്താഴ്’, ‘സിന്ദൂരരേഖ’, ‘ഇന്നലെ’, ‘കമ്മീഷണർ’ തുടങ്ങി നിരവധി സിനിമകളിൽ ഇരുവരും ഒന്നിച്ചിട്ടുണ്ട്.

Read More: ‘യമുനൈ ആട്രിലെ’ കേട്ട് ശോഭന ചിരിച്ചു, എന്നിലെ ആരാധകന്റെ മനസ്സ് നിറഞ്ഞു

“ശോഭനയും കല്യാണിയും അമ്മയും മകളുമായാണ് സിനിമയിൽ അഭിനയിക്കുന്നത്. അവരുടെ ജീവിതത്തിലേക്ക് കടന്നു വരുന്ന രണ്ടു കഥാപാത്രങ്ങളാണ് ദുൽഖറും സുരേഷ് ഗോപിയും അവതരിപ്പിക്കുന്നത്,” അനൂപ് സത്യൻ പറഞ്ഞു.

അനൂപ് സത്യൻ സംവിധായകനായി അരങ്ങേറ്റം കുറിക്കുന്ന ചിത്രത്തിന് പേരിട്ടിട്ടില്ല. വേഫെയറര്‍ ഫിലിംസും എം സ്റ്റാര്‍ കമ്മ്യൂണിക്കേഷന്‍സുമായി ചേര്‍ന്ന് ദുല്‍ഖര്‍ സല്‍മാനാണ് ചിത്രം നിര്‍മിക്കുന്നത്. വസ്ത്രാലങ്കാരം: ഉത്തര മേനോന്‍, ചമയം: റോണെക്‌സ്, ലൈന്‍ പ്രോഡ്യൂസര്‍: ഹാരിസ് ദേശം.

‘കുറുപ്പ്’ എന്ന സിനിമയിലാണ് ദുൽഖർ ഇപ്പോൾ അഭിനയിക്കുന്നത്. ഇതിന്റെ ചിത്രീകരണം പൂർത്തിയായാലുടൻ അനൂപ് സത്യന്റെ സിനിമയിലേക്കെത്തും.

Get all the Latest Malayalam News and Kerala News at Indian Express Malayalam. You can also catch all the Entertainment News in Malayalam by following us on Twitter and Facebook