എക്കോയിലെ കുര്യച്ചൻ; ജീവിതത്തിൽ ദുൽഖർ സൽമാൻ്റെയും രൺബീറിന്റെയും ഗുരു

തിയേറ്ററുകളിൽ വിജയകരമായി പ്രദർശനം തുടരുകയാണ് ദിൻജിത്ത് അയ്യത്താൻ സംവിധാനം ചെയ്ത 'എക്കോ: ഇൻഫിനിറ്റ് ക്രോണിക്കിൾസ് ഓഫ് കുര്യച്ചൻ' എന്ന ചിത്രം.

എക്കോ കണ്ട ആരും തന്നെ കുര്യച്ചൻ എന്ന കഥാപാത്രത്തെ അവതരിപ്പിച്ച സൗരഭ് സച്ച്ദേവ എന്ന നടനെ മറക്കില്ല. സ്ക്രീൻ പ്രസൻസ് കൊണ്ടും കഥാപാത്രത്തിന്റെ നിഗൂഢതകൾ കൊണ്ടും അഭിനയം കൊണ്ടും പ്രേക്ഷകരുടെ കയ്യടി നേടുകയായിരുന്നു സൗരഭ്.

'അനിമൽ', 'പുഷ്പ 2', 'സേക്രഡ് ഗെയിംസ്', 'മാലിക്' എന്നീ ചിത്രങ്ങളിലൂടെ ശ്രദ്ധേയനാണ് സൗരഭ്. പുഷ്പയിലെ ഹമീദ് എന്ന കഥാപാത്രവും രൺബീർ ചിത്രം അനിമലിലെ ആബിദ് ഹക്ക് എന്ന കഥാപാത്രമായും സൗരഭ് തിളങ്ങി.

നടൻ മാത്രമല്ല, നിരവധി നടന്മാരുടെ ഗുരു കൂടിയാണ് സൗരഭ്. മലയാളത്തിന്റെ പ്രിയതാരം ദുൽഖർ സൽമാൻ, ബോളിവുഡ് താരം രൺബീർ കപൂർ, റാണ ദഗ്ഗുബാട്ടി എന്നിങ്ങനെ നിരവധി അഭിനേതാക്കളെ പരിശീലിപ്പിച്ചെടുത്തത് ആക്ടിംഗ് കോച്ച് കൂടിയായ സൗരഭ് ആണ്.

വരുൺ ധവാൻ, രാഘവ് ജുയാൽ, ഹർഷവർദ്ധൻ റാണെ , ഫ്രീഡ പിൻ്റോ , അനുഷ്ക ശർമ്മ , ബോബി ഡിയോൾ , ജോൺ എബ്രഹാം , വരുൺ ധവാൻ , കുബ്ബ്ര സെയ്ത് , റിച്ചാ ഛദ്ദ, അർജുൻ കപൂർ, ജാക്വലിൻ ഫെർണാൻഡീസ്,ആശ നെഗി, ശക്തി മോഹൻ, രീതിഖ് ധനാജ്ഞാനി, അഭിഷേക് ചാഹാൻ, മന്ദന കരിമി തുടങ്ങിയ അഭിനേതാക്കളെയും അഭിനയം പഠിപ്പിച്ചത് സൗരഭ് ആണ്.

1978 സെപ്റ്റംബർ 24-ന് ഇന്ത്യയിലെ ഉത്തരാഖണ്ഡിലെ ഹൽദ്വാനിയിലാണ് അദ്ദേഹം ജനിച്ചത്. ഡൽഹിയിലെ മോഡൽ സീനിയർ സെക്കൻഡറി സ്കൂൾ സാകേതിൽ വിദ്യാഭ്യാസം പൂർത്തിയാക്കിയ ശേഷം, ബാരി ജോൺ്സ് ഇമാഗോ ആക്ടിംഗ് സ്കൂളിൽ (ഇപ്പോൾ ബാരി ജോൺ ആക്ടിംഗ് സ്റ്റുഡിയോ) അഭിനയ പരിശീലനം നേടി.

2002-ൽ ഇമാഗോ ആക്ടിംഗ് സ്കൂളിൽ അധ്യാപകനായി ജോലിയിൽ പ്രവേശിച്ചതോടെയാണ് അഭിനയ പരിശീലന ലോകത്തേക്കുള്ള സൗരഭിൻ്റെ യാത്ര ആരംഭിക്കുന്നത്. അക്കാലത്ത് തെരുവ് നാടകങ്ങളിലും സജീവമായിരുന്നു. അഭിനയ പരിശീലനത്തോടുള്ള ഈ അഭിനിവേശവും പ്രതിബദ്ധതയും കാരണം മുംബൈയിലെ ബാരി ജോൺ ആക്ടിംഗ് സ്കൂളിൽ 11 വർഷം സൗരഭ് സേവനം അനുഷ്ഠിച്ചു.

2017-ൽ സൗരഭ് സ്വന്തമായി 'ദി ആക്ടേഴ്സ് ട്രൂത്ത്' എന്ന പേരിൽ ഒരു അഭിനയ പരിശീലന വിദ്യാലയം സ്ഥാപിച്ചു. അഭിനയത്തിലെ തൻ്റെ മികവിന് പുറമെ, അഭിനയ മോഹികളായ കലാകാരന്മാരുടെ കഴിവുകൾ വളർത്തുന്നതിലും രൂപപ്പെടുത്തുന്നതിലും സൗരഭ് സച്ച്ദേവ വഹിച്ച പങ്ക് വലുതാണ്.

അഭിനയത്തിനൊപ്പം തന്നെ ഹിന്ദി സിനിമകൾക്കും വെബ് സീരീസുകൾക്കുമായി സൗരഭ് സച്ച്ദേവ അഭിനയ വർക്ക്‌ഷോപ്പുകളും സംഘടിപ്പിച്ചുവരുന്നു.