മഹാബലി രാജാവെങ്കിൽ റാണിയാര്; റിമയുടെ ചിത്രങ്ങൾ വൈറൽ

ശ്യാമപ്രസാദിന്റെ ഋതു എന്ന ചിത്രത്തിലൂടെ എത്തി മലയാള സിനിമയില്‍ തന്റെതായ ഒരു ഇടം കണ്ടെത്തിയ നടിയാണ് റിമ കല്ലിങ്കല്‍. വ്യത്യസ്ത ഫോട്ടോഷൂട്ടുകള്‍ നടത്താറുള്ള താരത്തിന്റെ ബാന്തിനി സാരിയിലുള്ള ചിത്രങ്ങളും ശ്രദ്ധ നേടിയിരുന്നു.

ഇപ്പോൾ ഓണത്തിന്റെ പുതിയൊരു കൺസെപ്റ്റ് ഫൊട്ടോഷൂട്ടുമായിട്ടാണ് റിമ എത്തിയിരിക്കുന്നത്. മഹാബലിയാണ് നമ്മുടെ രാജാവെങ്കിൽ ആരാണ് നമ്മുടെ റാണി എന്ന ചോദ്യത്തോടെയാണ് വീഡിയോ തുടങ്ങുന്നത്.

വിന്ധ്യാവലി രാജ്ഞി: മഹാബലിയുടെ പത്നി. സ്വന്തം ആളുകൾക്കിടയിൽ വിരളമായി സംസാരിക്കപ്പെടുന്ന പേര്. അവളുടെ പറയാത്ത കഥ അനാവരണം ചെയ്യാനും ഈ അവ്യക്തമായ രൂപത്തെ ചുറ്റിപ്പറ്റിയുള്ള നിഗൂഢതകൾ കണ്ടെത്താനുമുള്ള അന്വേഷണം ആരംഭിക്കുക എന്നാണ് അടിക്കുറിപ്പ് നൽകിയിരിക്കുന്നത്. ചിത്രങ്ങളിൽ കറുപ്പും സ്വർണ നിറത്തിലുള്ള വസ്ത്രങ്ങളിലാണ് റിമ പ്രത്യക്ഷപ്പെടുന്നത്.

റാണിയുടെ പ്രൗഡിയോടെ റിമയെ ചിത്രങ്ങളിൽ കാണാം. ഈ കോൺസെപ്റ്റിൽ ഒരു നൃത്തം ആസൂത്രണം ചെയ്യാനും ആരാധകർ കമന്റുകളിലൂടെ ആവശ്യപ്പെടുന്നുണ്ട്. പുതിയൊരു അറിവാണിതെന്നും ചിലർ കമന്റ് ചെയ്യുന്നു. അഭിനേത്രി, നര്‍ത്തകി, നിര്‍മ്മാതാവ് എന്ന നിലകളിലും തന്റെ പേര് അടയാളപ്പെടുത്താൻ റിമയ്ക്ക് കഴിഞ്ഞിട്ടുണ്ട്. ആഷിഖ് അബുവിന്റെ നീലവെളിച്ചം എന്ന ചിത്രമാണ് റിമയുടെ അവസാനമിറങ്ങിയ ചിത്രം.