സ്റ്റൈലിൽ കോംപ്രമൈസില്ല; യൂത്തിനെയും വെല്ലും ആറ്റിറ്റ്യൂഡുമായി രേഖ, ചിത്രങ്ങൾ

ബോളിവുഡിലെ ഇതിഹാസനായികമാരിൽ ഒരാളാണ് രേഖ. പ്രേക്ഷകലക്ഷങ്ങളുടെ ഉംറാവു ജാൻ. ഇപ്പോൾ സിനിമയിൽ സജീവമല്ലെങ്കിലും ബോളിവുഡിലെ പ്രധാന ഇവന്റുകളിലെല്ലാം സജീവസാന്നിധ്യമാണ് രേഖ. വിലകൂടിയ കാഞ്ചീപുരം സാരികളും ആഭരണങ്ങളും അണിഞ്ഞ് എലഗന്റ് ലുക്കിൽ വന്നെത്തുന്ന രേഖ ഓരോ ആൾക്കൂട്ടത്തിന്റെയും ശ്രദ്ധ കവരുന്നു.

ഡിസൈനറായ മനീഷ് മൽഹോത്ര പങ്കുവച്ച ചിത്രങ്ങളാണ് ഇപ്പോൾ ശ്രദ്ധ നേടുന്നത്. കിടിലൻ ആറ്റിറ്റ്യൂഡുമായി മനീഷിനൊപ്പം ചിത്രങ്ങൾക്ക് പോസ് ചെയ്യുന്ന രേഖയെ ആണ് ചിത്രങ്ങളിൽ കാണാനാവുക.

കൈത്തറിയിൽ നെയ്ത ഐവറി കളർ സാരിയും ബീജ് ടെക്സ്ചർ ചെയ്ത ചൂരി സ്ലീവ് ബ്ലൗസുമാണ് രേഖയുടെ വേഷം. ദീപാവലി ആഘോഷത്തിൽ നിന്നുള്ളതാണ് ചിത്രങ്ങൾ.

സിനിമകളിൽ അത്ര സജീവമല്ലെങ്കിലും റാണിയെ പോലെ ലക്ഷ്വറി ജീവിതമാണ് രേഖ നയിക്കുന്നത്. നിരവധി സ്രോതസ്സുകളില്‍ നിന്നും ധാരാളം പണം സമ്പാദിക്കുന്നുണ്ട് നടി എന്നാണ് റിപ്പോർട്ടുകൾ. സ്വകാര്യ ചടങ്ങുകളിൽ പങ്കെടുക്കാന്‍ ലക്ഷക്കണക്കിന് രൂപയാണ് നടി വാങ്ങിക്കുന്നതെന്നും റിപ്പോർട്ടുകളുണ്ട്. കൂടാതെ, സ്‌റ്റേജ് പ്രോഗ്രാമുകള്‍ക്കും അവാര്‍ഡ് ഷോയിലും റിയാലിറ്റി ഷോയിലുമൊക്കെ അതിഥിയായി എത്താനും വലിയ തുക തന്നെ താരം ഈടാക്കുന്നു. ജീവിതത്തിൽ സാമ്പത്തിക ആസൂത്രണത്തിനു വലിയ പ്രാധാന്യം നൽകുന്ന നടി സിനിമയിൽ സജീവമായ കാലത്തു തന്നെ നാളേക്കായി മികച്ച നിക്ഷേപങ്ങൾ നടത്തിയിരുന്നു. നിരവധി ഫിക്സഡ് ഡെപ്പോസിറ്റുകളും നടിയുടെ പേരിലുണ്ട്.