സൂപ്പർസ്റ്റാറിനും കുടുംബത്തിനുമൊപ്പം ഒരു വൈകുന്നേരം; ചിത്രങ്ങളുമായി രാധിക

സോഷ്യൽ മീഡിയയിൽ വളരെയധികം സജീവമാണ് മലയാളികളുടെ പ്രിയപ്പെട്ട താരം രാധിക ശരത്കുമാർ. സുഹൃത്തുകൾക്കും കുടുംബത്തിനുമൊപ്പമുള്ള ചിത്രങ്ങൾ രാധിക ഇടയ്ക്ക് പങ്കുവയ്ക്കാറുണ്ട്. ഇപ്പോഴിതാ മോഹൻലാലിനും കുടുംബത്തിനുമൊപ്പമുള്ള ചിത്രങ്ങളാണ് താരം ഷെയർ ചെയ്തിരിക്കുന്നത്.

'മോഹൻലാലിനും കുടുംബത്തിനുമൊപ്പം ചെലവഴിച്ച ഒരു വൈകുന്നേരം' എന്ന അടികുറിപ്പോടെയാണ് രാധിക ചിത്രങ്ങൾ ഷെർ ചെയ്തത്. മോഹൻലാലിന്റെ ഭാര്യ സുചിത്രയെയും ചിത്രങ്ങളിൽ കാണാം. ധാരാളം ആരാധക കമന്റുകളും പോസ്റ്റിനു താഴെ നിറയുന്നുണ്ട്.

'ഇട്ടിമാണി മെയ്ഡ് ഇൻ ചൈന' എന്ന ചിത്രത്തിലാണ് മോഹൻലാലും രാധികയും സ്ക്രീനിൽ അവസാനമായി ഒന്നിച്ചെത്തിയത്. 'നിങ്ങളില്ലെങ്കിൽ ഈ സിനിമ ചെയ്യില്ലെന്ന' മോഹൻലാലിന്റെ വാക്കുകൾ തനിക്കേറെ സന്തോഷവും അഭിമാനവും നൽകിയെന്ന് രാധിക പറഞ്ഞിരുന്നു.

1985 ൽ പുറത്തിറങ്ങിയ 'കൂടുംതേടി' എന്ന ചിത്രത്തിലെ രാധിക- മോഹൻലാൽ ജോഡികളും 'വാചാലമെൻ മൗനവും' എന്നു തുടങ്ങുന്ന ഗാനവും ഏറെ ശ്രദ്ധിക്കപ്പെട്ടിരുന്നു. നീണ്ട ഒരിടവേളയ്ക്കു ശേഷമാണ് ഇരുവരും ഒന്നിച്ചഭിനയിച്ചത്.

കഴിഞ്ഞ ദിവസം ഉറ്റ സുഹൃത്തും നടിയുമായ ശ്രീപ്രിയയ്‌ക്കൊപ്പമുള്ള രസകരമായ വീഡിയോ രാധിക പങ്കുവച്ചിരുന്നു. എൺപതുകളിലെ തിരക്കുള്ള നായികമാർ ആയിരുന്നു രാധികയും ശ്രീപ്രിയയും. മലയാളം ഉൾപ്പടെയുള്ള തെന്നിന്ത്യൻ ഭാഷകളിൽ ഇരുവരും ശ്രദ്ധേയമായ വേഷങ്ങൾ ചെയ്തിട്ടുണ്ട്. 'കൂടും തേടി,' 'മകൻ എന്റെ മകൻ,' 'രാമലീല,'' ഇട്ടിമാണി മെയ്ഡ് ഇൻ ചൈന' എന്നിവയുൾപ്പെടെ പത്തിലധികം മലയാള ചിത്രങ്ങളിൽ രാധിക അഭിനയിച്ചിട്ടുണ്ട്. 'കരിയിലക്കാറ്റു പോലെ,' 'പ്രേമാഭിഷേകം,' 'അന്തർദാഹം' തുടങ്ങിയവയാണ് ശ്രീപ്രിയ മലയാളത്തിൽ ചെയ്ത പ്രധാന സിനിമകൾ.