സുപ്രിയയ്ക്ക് അല്ലിയുടെയും ദാദയുടെയും സമ്മാനം

തിങ്കളാഴ്ചയായിരുന്നു നിർമാതാവും നടൻ പൃഥ്വിരാജിന്റെ ഭാര്യയുമായ സുപ്രിയ മേനോൻ്റെ ജന്മദിനം. വിലായത്ത് ബുദ്ധയുടെ ഷൂട്ടിനിടെ കാലിന്റെ ലിഗമെന്റിനു പരുക്കേറ്റ പൃഥ്വി വീട്ടിൽ വിശ്രമത്തിൽ ആയതിനാൽ ഈ വർഷം വലിയ ആഘോഷങ്ങളില്ലാതെയാണ് സുപ്രിയയുടെ ജന്മദിനം കടന്നുപോയത്.

എന്നാൽ, മമ്മയ്ക്കായി മനോഹരമായൊരു പിറന്നാൾ കേക്കു തന്നെ സമ്മാനിച്ചിരിക്കുകയാണ് മകൾ അലംകൃതയും പൃഥ്വിയും ചേർന്ന്. മനോഹരമായ, ഫ്ളോറൽ ഡിസൈനിലുള്ള ഈ കേക്ക് ഡിസൈൻ ചെയ്തിരിക്കുന്നത് കൊച്ചിയിലെ The Sugar Sifter ആണ്.

"ആശംസകൾ അറിയിച്ച എല്ലാവർക്കും നന്ദി. നിങ്ങളുടെ സ്‌നേഹമുള്ള വാക്കുകൾ പ്രോത്സാഹജനകമാണ്. ഞാൻ എന്റെ കുടുംബത്തോടൊപ്പം ശാന്തമായൊരു ജന്മദിനം ആഘോഷിച്ചു. എന്റെ അച്ഛനില്ലാത്ത കഴിഞ്ഞ ഒന്നര വർഷം വളരെ ബുദ്ധിമുട്ടുള്ളതായിരുന്നു. ഇന്ന് പ്രത്യേകിച്ച് അദ്ദേഹം സമീപത്തില്ലാത്തതിനാൽ ഞാനൽപ്പം ബുദ്ധിമുട്ടി. അദ്ദേഹം വിട പറഞ്ഞതിനു ശേഷമുള്ള എന്റെ രണ്ടാമത്തെ ജന്മദിനമാണിത്. ഒരാൾക്കൂട്ടത്തിനിടയിൽ വച്ച് തന്റെ മാതാപിതാക്കളെ നഷ്ടപ്പെട്ട, അവരെ കണ്ടെത്താനാവാതെ വിഷമിക്കുന്ന ഒരു കുട്ടിയെ പോലെ എനിക്കെന്നെ തോന്നുന്നു. എന്റെ ദുഃഖത്തെ നന്നായി നേരിടാനും വേദനയിലൂടെ പുഞ്ചിരിക്കാൻ പഠിക്കാനും വരും വർഷങ്ങളിൽ കഴിയുമെന്ന് ഞാൻ കരുതുന്നു," സുപ്രിയ കുറിച്ചു. പൃഥ്വി സുഖം പ്രാപിച്ചുവരുന്നുവെന്നും കുറിപ്പിൽ സുപ്രിയ പറയുന്നു.

മലയാള സിനിമയിലെ 'പവര്‍ഫുള്‍ കപ്പിള്‍' ആണ് പൃഥ്വിരാജും സുപ്രിയ മേനോനും. പൃഥ്വി അഭിനയത്തിലും സംവിധാനത്തിലും തിളങ്ങുമ്പോള്‍ നിര്‍മ്മാണരംഗത്ത് സജീവമാണ് സുപ്രിയ. പൃഥ്വിരാജ് പ്രൊഡക്ഷന്റെ അമരക്കാരിയാണ് സുപ്രിയ.

2011 എപ്രില്‍ 25നായിരുന്നു പൃഥ്വിരാജിന്റെയും മാധ്യമ പ്രവര്‍ത്തകയായ സുപ്രിയയുടെയും വിവാഹം. പാലക്കാട് വച്ച് വളരെ ലളിതമായ ചടങ്ങുകളോടെയാണ് വിവാഹം നടന്നത്. 2014ന് മകൾ അലംകൃത ജനിച്ചു. മകളുടെ ചിത്രങ്ങൾ സോഷ്യൽ മീഡിയയിൽ ഷെയർ ചെയ്യാൻ താത്പര്യപ്പെടാത്ത അമ്മയാണ് സുപ്രിയ. മകളുടെ സ്വകാര്യതയെ ബാധിക്കുമെന്ന് കരുതിയാണ് അങ്ങനെ ചെയ്യാത്തതെന്നാണ് സുപ്രിയ പറയുന്നത്.