എന്റെ ദൈവമേ എന്തൊരഴകെന്ന് നിക്ക്; ഭർത്താവിനെ വരെ​ ഫ്ളാറ്റാക്കിയ പ്രിയങ്കയുടെ ദേവി ലുക്ക്, ചിത്രങ്ങൾ

കഴിഞ്ഞ രാത്രി ഹൈദരാബാദിൽ വച്ച് നടന്ന എസ്.എസ്. രാജമൗലിയുടെ 'വാരണാസി'യുടെ ടൈറ്റിൽ റിലീസ് ചടങ്ങിൽ ഏവരുടെയും ശ്രദ്ധ കവർന്നൊരാൾ പ്രിയങ്ക ചോപ്രയായിരുന്നു.

ചിത്രത്തിൽ 'മന്ദാകിനി' എന്ന കഥാപാത്രത്തെയാണ് പ്രിയങ്ക അവതരിപ്പിക്കുന്നത്.

'വാരണാസി'യുടെ ടൈറ്റിൽ റിലീസിന് പ്രിയങ്ക എത്തിയത് ദേസി ഗേൾ ലുക്കിലാണ്.

അനാമിക ഖന്നയുടെ കസ്റ്റം-ഡിസൈൻ ചെയ്ത ഐവറി ലെഹംഗ അണിഞ്ഞാണ് പ്രിയങ്ക പരിപാടിയിൽ പങ്കെടുത്തത്. താരത്തിൻ്റെ ചിത്രങ്ങളും വീഡിയോയും സോഷ്യൽ മീഡിയയിൽ വൈറലാണ്.

പ്രിയങ്കയുടെ ഭർത്താവും ഗായകനുമായി നിക് ജോനാസും ഭാര്യയുടെ ലുക്കിന് പ്രശംസയുമായി എത്തി. "ഓ മൈ ഗോഡ് എന്ന് പറയുമ്പോൾ എല്ലാവർക്കും വേണ്ടി ഞാൻ സംസാരിക്കുന്നതായി തോന്നുന്നു," എന്നാണ് നിക്കിന്റെ കമന്റ്.

അമി പട്ടേലാണ് പ്രിയങ്കയുടെ സ്റ്റൈലിസ്റ്റ്. ലേസ് എംബ്രോയ്ഡറി വർക്കുകൾ ചെയ്ത ലെഹംഗയിൽ തന്നെ ഗോൾഡൻ ബ്രോക്കേഡ് വർക്കുകൾ ചെയ്തിരിക്കുന്നു. അവയ്ക്ക് ഇണങ്ങും വിധം സ്വർണ്ണ വളകൾ, വലിയ നെക്ലേസ്, അതിന് ചേരുന്ന മാങ് ടിക്ക, കമ്മലുകൾ എന്നിവ ധരിച്ചിട്ടുണ്ട് .

സ്വർണ്ണ നിറത്തിലുള്ള ചന്ദ്രക്കലയുടെ ആകൃതിയിലുള്ള ആഭരണങ്ങൾ കൊണ്ട് അലങ്കരിച്ച അയഞ്ഞ ഫിഷ്‌ടെയിൽ ബ്രെയ്‌ഡ് ഈ ലുക്കിന് ഒരു രാജകീയ പ്രഭയാണ് നൽകിയിരിക്കുന്നത്. ബ്ലഷ്, ന്യൂഡ് ഗ്ലോസി ലിപ്സ് എന്നിവയോടുകൂടിയ മൃദുവായ ഡ്യൂയി മേക്കപ്പാണ് തിരഞ്ഞെടുത്തിരിക്കുന്നത്.

“എൻ്റെ ഉള്ളിലെ ദേവിയെ പുറത്തുകൊണ്ടുവരുന്നു," എന്നാണ് ചിത്രങ്ങൾ പങ്കിട്ട് പ്രിയങ്ക കുറിച്ചത്.

'ദി സ്കൈ ഈസ് പിങ്ക്' (2019), 'ദി വൈറ്റ് ടൈഗർ' (2021) എന്നീ റിലീസുകൾക്ക് ശേഷമെത്തുന്ന പ്രിയങ്കയുടെ ചിത്രമാണ് 'വാരണാസി'. 2027-ൽ ചിത്രം റിലീസിനെത്തുമെന്നാണ് റിപ്പോർട്ട്. മഹേഷ് ബാബു, പൃഥ്വിരാജ് സുകുമാരൻ തുടങ്ങിയ പ്രമുഖ താരങ്ങളുടെ ശക്തമായ ഒരു നിര ഇതിൽ അണിനിരക്കുന്നുണ്ട്.

പ്രിയങ്ക ചോപ്രയുടെ ക്യാരക്ടർ പോസ്റ്റർ അവതരിപ്പിക്കുമ്പോൾ, "ആഗോള തലത്തിൽ ഇന്ത്യൻ സിനിമയെ പുനർനിർവചിച്ച വനിത. തിരികെ സ്വാഗതം, ദേസി ഗേൾ!" എന്നാണ് അഭിസംബോധന ചെയ്തത്.