അണ്ണനും തമ്പിയും ന്യൂയോർക്കിൽ; ചിത്രങ്ങൾ

പൃഥ്വിരാജ് സംവിധാനം ചെയ്യുന്ന എമ്പുരാൻ എന്ന ചിത്രത്തിന്റെ ഷൂട്ടിംഗ് ന്യൂയോർക്കിൽ പുരോഗമിക്കുകയാണ്.

നടന്‍ ഇന്ദ്രജിത്തും ചിത്രത്തിന്റെ ലൊക്കേഷനിലുണ്ട്. മാര്‍ച്ച് ആദ്യ ആഴ്ച തന്നെ ന്യൂയോർക്കിലെ ഷൂട്ട് പൂര്‍ത്തിയാക്കി ഇന്ദ്രജിത്ത് നാട്ടിലേക്ക് മടങ്ങിവരുമെന്നാണ് റിപ്പോര്‍ട്ടുകള്‍.

ഷൂട്ടിനിടവേളയിൽ ചേട്ടനൊപ്പം പോസ് ചെയ്യുന്ന അനിയന്റെ ചിത്രങ്ങളാണ് ഇപ്പോൾ ശ്രദ്ധ നേടുന്നത്. ഇന്ദ്രജിത്ത് തന്നെയാണ് ചിത്രങ്ങൾ പങ്കുവച്ചിരിക്കുന്നത്. സുപ്രിയ മേനോനും ചിത്രങ്ങളിൽ ഉണ്ട്.

"ഡയറക്ടർ സാറിനൊപ്പം മോഷ്ടിച്ചെടുത്ത നിമിഷം," എന്നാണ് പൃഥ്വിയ്ക്കൊപ്പമുള്ള ചിത്രം പങ്കുവച്ച് സുപ്രിയ കുറിച്ചത്.

പൃഥ്വിരാജിന്റെ സംവിധാനത്തിൽ മോഹൻലാൽ നായകനാവുന്ന എമ്പുരാൻ, വൻ ഹിറ്റായ ലൂസിഫറിന്റെ രണ്ടാം ഭാഗമാണ്.

മുരളി ഗോപിയാണ് എമ്പുരാന്റെയും തിരക്കഥ ഒരുക്കുന്നത്.

മലയാള സിനിമയിലെ ഏറ്റവും കൂടുതൽ മുതൽ മുടക്കുള്ള ചിത്രങ്ങളിൽ ഒന്നാവും എമ്പുരാൻ. മലയാളം, തമിഴ്, തെലുങ്ക്, കന്നട, ഹിന്ദി ഭാഷകളിലായി ഒരുങ്ങുന്ന പാൻ ഇന്ത്യൻ ചിത്രമാണിത്.

ദേശീയതലത്തിൽ തന്നെ ശ്രദ്ധേയമായ ലൈക്ക പ്രൊഡക്ഷൻസും ആശിർവാദ് സിനിമാസിനൊപ്പം എമ്പുരാന്റെ നിർമ്മാണത്തിൽ പങ്കാളികളാകുന്നുണ്ട്.