രാജു ഇപ്പോൾ വിശ്രമത്തിലാണ്; പൃഥ്വിരാജിന്റെ ആരോഗ്യ സ്ഥിതിയെ കുറിച്ച് പൂർണിമ

'വിലായത്ത് ബുദ്ധ' സിനിമയുടെ ഷൂട്ടിനിടെയാണ് നടൻ പൃഥ്വിരാജിന് പരിക്കേറ്റത്.
കാലിന്റെ ലിഗമെന്റിനു പരിക്കേറ്റ താരത്തെ കീ ഹോൾ സർജറിയ്ക്ക് വിധേയനാക്കിയിരുന്നു. പൂർണ ആരോഗ്യം വീണ്ടെടുക്കാൻ രണ്ടു മാസത്തോളം വിശ്രമം നിർദ്ദേശിച്ചിരിക്കുകയാണ് ഡോക്ടർമാർ. പൃഥ്വിരാജിനോട് അടുത്ത് നിൽക്കുന്നവരാരും തന്നെ താരത്തിന്റെ ആരോഗ്യസ്ഥിതിയെ കുറിച്ച് ഇതുവരെ പ്രതികരിച്ചിരുന്നില്ല. താരത്തിന്റെ സഹോദരന്റെ ഭാര്യയും നടിയുമായ പൂർണിമ ഇതിനെ കുറിച്ച് മാധ്യമങ്ങളോട് സംസാരിച്ചിരുന്നു.

"ഇപ്പോൾ വിശ്രമത്തിലാണ്. അറിയാലോ ഫിസിയോ തെറാപ്പിയൊക്കെ ചെയ്ത് ശരിയാകാൻ കുറച്ച് സമയമെടുക്കും. ഷൂട്ടിങ്ങിന്റെ സമയത്തുണ്ടായ അപകടമാണ്. ഇപ്പോൾ ചികിത്സയിലാണ് വേറെ പേടിക്കാനൊന്നുമില്ല. നിങ്ങളുടെ എല്ലാവരുടെയും പ്രാർത്ഥനകൾ കൊണ്ട് സർജറിയെല്ലാം നല്ല രീതിയിൽ നടന്നു," പൂർണിമ പറഞ്ഞു. ഒരു ഉദ്ഘാടന വേദിയിലെത്തിയ പൂർണിമയോട് താരത്തിന്റെ ആരോഗ്യസ്ഥിതിയെ കുറിച്ച് മാധ്യമങ്ങൾ ചോദിക്കുകയായിരുന്നു.

തന്റെ ആരോഗ്യസ്ഥിതി വിശദീകരിച്ചുകൊണ്ട് ആശുപത്രിയിൽ നിന്നും പൃഥ്വിരാജും കുറിപ്പ് പങ്കുവച്ചിരുന്നു "വിലയത്ത് ബുദ്ധയുടെ ഒരു ആക്ഷൻ സീക്വൻസ് ചിത്രീകരിക്കുന്നതിനിടെ ഒരു അപകടം സംഭവിച്ചു. ഭാഗ്യവശാൽ ഞാൻ വിദഗ്ധരുടെ കൈകളിലാണ്, ഒരു കീ ഹോൾ സർജറി നടത്തി, ഇപ്പോൾ ഞാൻ വീണ്ടെടുക്കുകയാണ്. കുറച്ച് മാസത്തേക്ക് വിശ്രമവും ഫിസിയോതെറാപ്പിയുമാണ് മുന്നിലുള്ളത്. ആ സമയം ക്രിയാത്മകമായി ഉപയോഗിക്കാൻ ഞാൻ പരമാവധി ശ്രമിക്കും. പൂർണ്ണമായി സുഖം പ്രാപിക്കാനും എത്രയും വേഗം ജോലിയിലേക്ക് തിരികെ വരാനും ഈ വേദനയിൽ നിന്ന് പോരാടുമെന്ന് ഞാൻ വാഗ്ദാനം ചെയ്യുന്നു. ഉത്കണ്ഠയും സ്നേഹവും പ്രകടിപ്പിച്ച എല്ലാവർക്കും നന്ദി," ഫേസ്ബുക്ക് കുറിപ്പിൽ പൃഥ്വിരാജ് പറഞ്ഞതിങ്ങനെയാണ്.

ജയൻ നമ്പ്യാരുടെ സംവിധാനത്തിൽ ഒരുങ്ങുന്ന 'വിലായത്ത് ബുദ്ധ' എന്ന ചിത്രത്തിന്റെ ഷൂട്ടിങ്ങിനിടെയായിരുന്നു പൃഥ്വിയ്ക്ക് പരിക്കേറ്റത്. മറയൂരിൽ നടന്ന ഷൂട്ടിങ്ങിനിടെയാണ് അപകടം. ബസ് സ്റ്റാൻഡിൽ കെഎസ്ആർടിസി ബസ്സിനകത്തുള്ള സംഘട്ടനം ചിത്രീകരിച്ചുകൊണ്ടിരിക്കെയായിരുന്നു അപകടം സംഭവിച്ചത്. തൊട്ടടുത്ത സ്വകാര്യ ആശുപത്രിയിൽ എത്തിച്ചതിനുശേഷം വിദഗ്ധ ചികിത്സയ്ക്കായി കൊച്ചിയിലേക്കു കൊണ്ടുപോവുകയായിരുന്നു.