പെരുന്തച്ചൻ ഓർമകളിലൂടെ; വൈറലായി ഒരു റിക്രിയേഷൻ സീരീസ്

എംടി വാസുദേവൻ നായർ തിരക്കഥയൊരുക്കി അജയൻ സംവിധാനം ചെയ്ത് 1990ൽ പുറത്തിറങ്ങിയ പെരുന്തച്ചൻ മലയാളികളുടെ എക്കാലത്തെയും പ്രിയപ്പെട്ട ക്ലാസിക് ചിത്രങ്ങളിൽ ഒന്നാണ്.

എത്രകാലം കഴിഞ്ഞാലും മലയാളികൾക്ക് മറക്കാനാവാത്ത ആ ചിത്രത്തിന്റെ ഓർമകളിലേക്ക് വീണ്ടും കൂട്ടികൊണ്ടുപോവുകയാണ് സംവിധായകന്‍ കൃഷ്‌ണേന്ദു കലേഷ്.

പഴയ സിനിമകളുടെ ബ്ലാക് ആന്‍ഡ് വൈറ്റ് ഫ്രെയ്മുകള്‍ എഐ ഉപയോഗിച്ചും കളറിലേക്ക് മാറ്റിയും എൻലാർജ് ചെയ്തുമൊക്കെ പലപ്പോഴും കാഴ്ചക്കാരെ അത്ഭുതപ്പെടുത്താറുണ്ട് കൃഷ്ണേന്ദു കലേഷ്.

ഇപ്പോഴിതാ, പെരുന്തച്ചനിലെ വിഷ്വലുകളെ കൂടുതൽ മിഴിവോടെ അവതരിപ്പിക്കുകയാണ് കൃഷ്ണേന്ദു. "എം ടിയുടെ രചനയിൽ അജയൻ സംവിധാനം ചെയ്ത "പെരുന്തച്ചൻ (1990)", സന്തോഷ് ശിവന്റെ ഛായാഗ്രഹണം. 35mm ഫിലിമിൽ ഷൂട്ട് ചെയ്ത ചിത്രത്തിന്റെ ഏതാനും ഫ്രയിമുകളെ 65mm 1.43:1 റേഷ്യോ IMAX ലാർജ് ഫോർമാറ്റിലേക്ക് റിക്രിയേറ്റ് ചെയ്യാനുള്ള ശ്രമം, " എന്ന അടിക്കുറിപ്പോടെയാണ് കൃഷ്ണേന്ദു ചിത്രങ്ങൾ ഷെയർ ചെയ്തത്.

പറയിപെറ്റ പന്തിരുകുലത്തിലെ അംഗമായ പെരുന്തച്ചനും, മകനും തമ്മിലുള്ള അന്തര്‍സംഘര്‍ഷങ്ങളെ പ്രമേയമാക്കിയ ചിത്രമായിരുന്നു പെരുന്തച്ചൻ. മികച്ച നടനുള്ള സംസ്ഥാന പുരസ്‌കാരങ്ങളടക്കം നിരവധി അവാര്‍ഡുകള്‍ ചിത്രത്തിനു ലഭിച്ചിരുന്നു.

തിലകൻ, നെടുമുടി വേണു, പ്രശാന്ത്, മോനിഷ, മനോജ് കെ ജയന്‍ എന്നിവർക്കൊപ്പം വിനയപ്രസാദും ചിത്രത്തിൽ അഭിനയിച്ചിരുന്നു.

പെരുന്തച്ചൻ എന്ന സിനിമയെ ഒരു വിഷ്വൽ വിസ്മയമാക്കി മാറ്റുന്നതിൽ ഛായാഗ്രാഹകൻ സന്തോഷ് ശിവന്റെ പങ്ക് വളരെ വലുതാണ്. പ്രകൃതിദത്തമായ വെളിച്ചത്തെയും നിഴലിനെയും ഇത്രത്തോളം മനോഹരമായി ഉപയോഗിച്ച മറ്റൊരു ചിത്രം മലയാളത്തിൽ കുറവാണ്. കൃഷ്‌ണേന്ദു കലേഷിന്റെ പുതിയ റിക്രിയേഷൻ സീരീസ്, സന്തോഷ് ശിവൻ 35mm ഫിലിമിൽ ഒപ്പിയെടുത്ത ആ ദൃശ്യഭംഗിയെ ഐമാക്സ് (IMAX) ഫോർമാറ്റിന്റെ പ്രൗഢിയോടെ വീണ്ടും കാണിച്ചുതരുന്നു എന്നതാണ് ഇതിന്റെ സവിശേഷത.

സിനിമയുടെ ഒറിജിനൽ ഫ്രെയിമുകളെ എഐ (AI) സാങ്കേതികവിദ്യയുടെ സഹായത്തോടെ എൻലാർജ് ചെയ്തിട്ടും, ചിത്രത്തിന്റെ ആത്മാവ് നഷ്ടപ്പെടാതെ കാത്തുസൂക്ഷിക്കാൻ കൃഷ്ണേന്ദുവിന് സാധിച്ചിട്ടുണ്ട്. പഴയ ക്ലാസിക്കുകളെ പുതിയ തലമുറയ്ക്ക് മുന്നിൽ അത്യാധുനിക ദൃശ്യമികവോടെ അവതരിപ്പിക്കാൻ ഇത്തരം പരീക്ഷണങ്ങൾ സഹായിക്കുമെന്നാണ് ആരാധകരുടെ വിലയിരുത്തൽ.