രതീഷ് ബാലകൃഷ്ണ പൊതുവാളിന്റെ സംവിധാനത്തിൽ ഒരുങ്ങിയ ചിത്രമാണ് ‘ന്നാ താൻ കേസ് ക്കൊട്.’ ചിത്രത്തിലെ പ്രധാന കഥാപാത്രം കുഞ്ചാക്കോ ബോബനായിരുന്നെങ്കിലും മറ്റെല്ലാ കഥാപാത്രങ്ങളും ഒന്നിനൊന്ന് മികച്ചതായി നിന്നു. അതിൽ തന്നെ സുമലത ടീച്ചറുടെയും സുരേഷിന്റെയും പ്രണയമാണ് പ്രേക്ഷകരെ ഒരുപാട് പൊട്ടിച്ചിരിപ്പിച്ചത്. ആയിരം കണ്ണുമായി എന്ന ഗാനം പാടി ഇരുവരും വളരെ പെട്ടെന്നു തന്നെ പ്രേക്ഷകരുടെ മനസ്സിലിടം നേടി.
കാസ്റ്റിങ്ങ് ഡയറക്ടറായ രാജേഷ് മാധവനും അധ്യാപികയും നർത്തകിയുമായ ചിത്ര നായരുമാണ് ഈ കഥാപാത്രങ്ങൾ മികവുറ്റതാകിയത്. ഇപ്പോഴിതാ ഇരുവരും ഒന്നിച്ചുള്ള ഒരു നൃത്ത വീഡിയോയാണ് സോഷ്യൽ മീഡിയയിൽ വൈറലാകുന്നത്. വളരെ വ്യത്യസ്തമായ വസത്രങ്ങളണിഞ്ഞ് പാട്ടിനൊത്ത് നൃത്തം ചെയ്യുകയാണ് ഇരുവരും. രാജേഷ് മാധവൻ തന്നെയാണ് ഈ വീഡിയോ സോഷ്യൽ മീഡിയയിലൂടെ പങ്കുവച്ചത്. ‘ഇറ്റ്സ് ഒഫീഷ്യൽ’ എന്നാണ് രാജേഷ് വീഡിയോയ്‌ക്കൊപ്പം കുറിച്ചത്. അനവധി പേർ വീഡിയോയ്ക്ക് താഴെ ആശംസകളറിയിച്ചിട്ടുണ്ട്.
‘സേവ് ദി ഡേറ്റ്’ വീഡിയോ എന്ന തരത്തിലാണ് ഈ ദൃശ്യങ്ങൾ. ഒരു മിനുട്ട് ദൈർഘ്യമുള്ള വീഡിയോയ്ക്ക് അവസാനം മെയ് 28 എന്ന തീയതിയും കാണിക്കുന്നുണ്ട്. എന്താണ് ആ തീയതിയുടെ പ്രത്യേകത എന്നത് വ്യക്തമാക്കിയിട്ടില്ല.
സുരേഷിന്റെയും സുമലത ടീച്ചറുടെയും പ്രണയകഥ മാത്രമെടുത്ത് രതീഷ് പൊതുവാൾ പുതിയൊരു സിനിമ ഒരുക്കുകയാണെന്ന വാർത്ത കുറച്ചു നാളുകൾക്ക് മുൻപ് പുറത്തു വന്നിരുന്നു. ഇതിനെ ഉറപ്പിക്കും വിധത്തിൽ രതീഷ് പൊതുവാളും തന്റെ സോഷ്യൽ മീഡിയയിലൂടെ ഈ വീഡിയോ പങ്കുവച്ചിട്ടുണ്ട്. ‘ന്നാ താൻ കേസ് കൊട്’ ചിത്രത്തിലെ നായകനായ കുഞ്ചാക്കോ ബോബനും ഇരുവർക്കും ആശംസകളറിയിച്ച് വീഡിയോ ഷെയർ ചെയ്തു.
