#MeToo: ഹാര്‍വി വെയ്ന്‍സ്റ്റെയ്‌നെതിരായ കേസുകളില്‍ ഒന്ന് ഒഴിവാക്കി

ലൈംഗികാതിക്രമ കേസുകളില്‍ ജയിലില്‍ കഴിയുന്ന ഹോളിവുഡ് നിര്‍മ്മാതാവ് ഹാര്‍വി വെയ്ന്‍സ്‌റ്റെയിനെതിരായ ആറുകേസുകളില്‍ ഒന്ന് മാന്‍ഹട്ടന്‍ ഡിസ്ട്രിക്ട് അറ്റോര്‍ണിയുടെ ഓഫീസ് ഒഴിവാക്കി. പരാതിക്കാരിക്കൊപ്പമുള്ള സാക്ഷിയുടെ മൊഴിയില്‍ വൈരുദ്ധ്യമുണ്ടെന്നും തെളിവുകളുടെ അഭാവമുണ്ടെന്നും ചൂണ്ടിക്കാണിച്ചാണ് കേസ് ഒഴിവാക്കിയത്.

ലൂസിയ ഇവാന്‍സ് നല്‍കിയ പരാതിയുടെ അടിസ്ഥാനത്തില്‍ രജിസ്റ്റര്‍ ചെയ്ത കേസായിരുന്നു ഇത്. 2004ലാണ് കേസിന് ആധാരമായ സംഭവം നടക്കുന്നതെന്ന് ഇവാന്‍സ് പറയുന്നു. ഹാര്‍വി വെയ്ന്‍സ്റ്റെന്‍ തന്നെ ലൈംഗികബന്ധത്തിന് നിര്‍ബന്ധിച്ചുവെന്നാണ് പരാതി. ആ സമയത്ത് ഇവാന്‍സ് സിനിമാ മോഹവുമായി നടക്കുന്ന ഒരു വിദ്യാര്‍ത്ഥിയായിരുന്നു.

ഇവാന്‍സിന്റെ ആരോപണങ്ങളുടെ അടിസ്ഥാനത്തിലാണ് വെയ്ന്‍സ്റ്റെയ്‌നെതിരെ ആദ്യം കുറ്റം ചുമത്തിയത്. ബലാത്സംഗം, ലൈംഗികമായി ദുരൂപയോഗം ചെയ്യല്‍ തുടങ്ങിയ കുറ്റങ്ങളാണ് വെയ്ന്‍സ്റ്റെയ്‌നെതിരെ ചുമത്തിയിരിക്കുന്നത്. പരസ്പര സമ്മതത്തോടെയാണ് നടിമാരെ ലൈംഗികമായി ഉപയോഗിച്ചതെന്നായിരുന്നു ഹാര്‍വി മുന്‍പ് പറഞ്ഞത്.

ആജ്ഞലീന ജോളി, കേറ്റ് ബെക്കിന്‍സെയില്‍, ലിസെറ്റ് ആന്റണി ആസിയ അര്‍ജെ തുടങ്ങി നൂറിലധികം പ്രമുഖരായിരുന്നു ലോകമാകെ ഏറ്റെടത്ത മീ ടു കാമ്പയിനിലൂടെ വെയ്ന്‍സ്റ്റെയ്‌നെതിരെ ലൈംഗികാതിക്രമ ആരോപണങ്ങള്‍ ഉന്നയിച്ചത്.