എന്റെ മുഖമാണ് ഒരാൾക്ക്, മനസ്സ് മറ്റേയാൾക്കും; മക്കളെക്കുറിച്ച് വിഘ്‌നേശ് ശിവൻ

ഇരട്ടക്കുട്ടികളായ ഉയിരിന്റെയും ഉലകത്തിന്റെയും പിറന്നാൾ ആഘോഷമാക്കുകയാണ് നയൻതാരയും വിഘ്നേഷ് ശിവനും. ഇരുവരും സമൂഹമാധ്യമങ്ങളിൽ ഷെയർ ചെയ്ത പിറന്നാൾ ചിത്രങ്ങളാണ് ഇപ്പോൾ ശ്രദ്ധ നേടുന്നത്. മലേഷ്യയിലാണ് മക്കളുടെ ജന്മദിനം താരദമ്പതികൾ ആഘോഷിച്ചത്.

'എൻ മുഖം കൊണ്ട എൻ ഉയിർ… എൻ ഗുണം കൊണ്ട … എൻ ഉലഗ് (ഈ വരികളും ഞങ്ങളുടെ ചിത്രങ്ങളും ഒരുമിച്ച് പോസ്റ്റുചെയ്യാൻ വളരെക്കാലമായി കാത്തിരിക്കുന്നു. എന്റെ പ്രിയപ്പെട്ട ആൺകുട്ടികൾക്ക് ജന്മദിനാശംസകൾ. ഞങ്ങളുടെ ജീവിതത്തിലേക്ക് വന്നതിനും സന്തോഷം നൽകുന്നതിനും നന്ദി. നിങ്ങൾ പോസിറ്റിവിറ്റിയും അനുഗ്രഹങ്ങളും കൊണ്ടു വന്നു, ഈ 1 വർഷം മുഴുവനും ജീവിതകാലം മുഴുവൻ വിലമതിക്കാനുള്ള നിമിഷങ്ങളാൽ നിറഞ്ഞിരിക്കുന്നു! നിങ്ങളാണ് ഞങ്ങളുടെ ലോകവും ഞങ്ങളുടെ അനുഗ്രഹീത ജീവിതവും,' ചിത്രങ്ങൾ ഷെയർ ചെയ്ത് വിക്കിയും നയനും കുറിച്ചതിങ്ങനെ.

'എൻ മുഖം കൊണ്ട എൻ ഉയിർ… എൻ ഗുണം കൊണ്ട … എൻ ഉലഗ്,' എന്നത് 'ജയിലറി'നു വേണ്ടി വിഘ്നേഷ് എഴുതിയ വരികളാണ്. അച്ഛൻ-മക്കൾ സ്നേഹം വർണിക്കുകയാണ് ഈ പാട്ടിൽ.

തമിഴകത്തെ പവർ കപ്പിളാണ് നയൻതാരയും വിഘ്നേഷ് ശിവനും. ഏഴു വര്‍ഷത്തെ പ്രണയത്തിനു ശേഷം 2022 ജൂണ്‍ 9 നാണ് വിഘ്‌നേഷ് നയന്‍താരയുടെ കഴുത്തില്‍ താലി ചാര്‍ത്തിയത്. 2022 ജൂണിൽ മഹാബലിപുരത്ത് വച്ചായിരുന്നു വിവാഹം. 2022 ഒക്ടോബറിൽ, വാടക ഗർഭധാരണത്തിലൂടെ തന്റെ ഇരട്ട ആൺകുഞ്ഞുങ്ങളെ സ്വീകരിച്ചതായി വിഘ്നേഷ് പ്രഖ്യാപിച്ചു.

ഉയിർ- രുദ്രോനീൽ എൻ ശിവൻ, ഉലക് – ദൈവിക് എൻ ശിവൻ എന്നിങ്ങനെയാണ് കുഞ്ഞുങ്ങളുടെ പേരുകൾ . ‘എൻ’ എന്ന അക്ഷരം ലോകത്തെ ഏറ്റവും നല്ല അമ്മയെ സൂചിപ്പിക്കുന്നു എന്നാണ് വിഘ്നേഷ് പറഞ്ഞത്. നയൻതാരയുടെ ആദ്യ അക്ഷരമായ എൻ ആണ് പേരുകൾക്കൊപ്പം ചേർത്തിരിക്കുന്നത്.

കുടുംബജീവിതത്തിൽ കൂടൂതൽ അദ്ധ്യായങ്ങൾ തുറക്കുമ്പോഴും തൻെറ കരിയറിലും മികച്ച മുന്നേറ്റങ്ങളുമായി കുതിക്കുകയാണ് നയൻതാര. അറ്റ്ലി സംവിധാനം ചെയ്യുന്ന ഷാരൂഖ് ഖാൻ ചിത്രം 'ജവാനി'ലൂടെ ബോളിവുഡിലും അരങ്ങേറ്റം കുറിച്ചിരിക്കുകയാണ് താരം.