മൂന്ന് പുരുഷന്മാർ, ആറു സ്ത്രീകൾ, ഒരു 'റൗഡി'; നയൻ‌താര ഇൻസ്റ്റയിൽ ഫോളോ ചെയ്യുന്നവർ

സോഷ്യൽ മീഡിയയിൽ അത്ര സജീവമല്ലാതിരുന്ന തെന്നിന്ത്യൻ താരം നയൻതാര വ്യാഴാഴ്ചയാണ് ഇൻസ്റ്റഗ്രാമിൽ തന്റെ വരവറിയിച്ചത്. മക്കളായ ഉലകത്തിനെയും ഉയിരിനെയും ഇരുകയ്യുകളിലുമായി എടുത്ത് കൂളിംഗ് ഗ്ലാസ്സും അണിഞ്ഞ് മാസ്സ് ലുക്കിൽ നടന്നുവരുന്ന തന്റെ വീഡിയോയ്ക്ക് 'നാന്‍ വന്തിട്ടേന്ന് സൊല്ല്' എന്നായിരുന്നു നയൻതാര നൽകിയ അടിക്കുറിപ്പ്. മക്കൾക്കൊപ്പമുള്ള ചിത്രവും ജവാന്റെ ട്രെയിലറുമൊക്കെ തൊട്ടു പിന്നാലെ ഇൻസ്റ്റയിൽ പങ്കുവയ്ക്കാനും നയൻ മറന്നില്ല.

എന്തായാലും തലൈവിയുടെ ഇൻസ്റ്റഗ്രാമിലെ അരങ്ങേറ്റം ആഘോഷമാക്കിയിരിക്കുകയാണ് ആരാധകരും. 1.4 മില്യൺ ഫോളോവേഴ്സിനെയാണ് ഒറ്റ ദിവസം കൊണ്ട് നയൻതാര ഇൻസ്റ്റയിൽ സ്വന്തമാക്കിയത്. ജവാൻ റിലീസിനു മുന്നോടിയായാണ് ഇൻസ്റ്റഗ്രാമിൽ താരം സജീവമായിരിക്കുന്നത്.

അതേസമയം, ഇൻസ്റ്റയിൽ നയൻതാര ഫോളോ ചെയ്യുന്ന താരങ്ങൾ ആരൊക്കെയെന്നറിയേണ്ടേ? മൂന്ന് പുരുഷന്മാരെയും ആറു സ്ത്രീകളെയും ഒരു 'റൗഡി'യേയുമടക്കം പത്തു പേരെയാണ് താരം ഫോളോ ചെയ്യുന്നത്. ഭർത്താവും സംവിധായകനുമായ വിഘ്നേഷ് ശിവൻ, ബോളിവുഡ് താരം ഷാരൂഖ് ഖാൻ, സംഗീത സംവിധായകൻ അനിരുദ്ധ്, മിഷേൽ ഒബാമ, നടിമാരായ സാമന്ത റൂത്ത് പ്രഭു, പ്രിയങ്ക ചോപ്ര എന്നിവരെ കൂടാതെ മൂന്നു ഹോളിവുഡ് താരങ്ങളെയും നയൻതാര ഫോളോ ചെയ്യുന്നുണ്ട്. അമേരിക്കൻ ഗായികയായ ബിയോൺസെ, അമേരിക്കൻ നടിമാരായ ജെന്നിഫർ ലോപ്പസ്, ജെന്നിഫർ ആനിസ്റ്റൺ എന്നിവരാണ് നയൻതാര ഫോളോ ചെയ്യുന്ന മറ്റു താരങ്ങൾ. ഒപ്പം തന്റെയും വിഘ്നേഷിന്റെയും നിർമ്മാണകമ്പനിയായ റൗഡി പിക്‌ച്ചേഴ്സിന്റെ ഔദ്യോഗിക ഇൻസ്റ്റ പേജും നയൻതാര ഫോളോ ചെയ്യുന്നുണ്ട്.

ഷാരൂഖ് ഖാൻ ചിത്രമായ ജവാനിലൂടെ ബോളിവുഡിലും അരങ്ങേറ്റം കുറിക്കുകയാണ് നയൻതാര. ചിത്രം സെപ്റ്റംബർ ഏഴിന് തിയേറ്ററുകളിലെത്തും. അറ്റ്‍ലി സംവിധാനം ചെയ്യുന്ന ചിത്രത്തിൽ ഷാരൂഖിനും നയൻതാരയ്ക്കുമൊപ്പം വിജയ് സേതുപതിയും അഭിനയിക്കുന്നുണ്ട്. ദീപിക പദുകോണ്‍ ഗസ്റ്റ് റോളില്‍ എത്തുന്നു.

റെഡ് ചില്ലീസ് എന്റർടൈന്മെന്റിന്റെ ബാനറിൽ ഗൗരി ഖാൻ നിർമിക്കുന്ന ചിത്രം ഷാരൂഖിന്റെ കരിയറിലെ തന്നെ ഏറ്റവും ചിലവേറിയ ചിത്രമാണ്. അനിരുദ്ധ് രവിചന്ദറാണ് ചിത്രത്തിന്റെ സംഗീതം ഒരുക്കിയിരിക്കുന്നത്.