നാന്‍ വന്തിട്ടേന്ന് സൊല്ല്; മക്കള്‍ക്കൊപ്പം ഇന്‍സ്റ്റഗ്രാമില്‍ അവതരിച്ച് നയന്‍സ്

സോഷ്യൽ മീഡിയയിൽ അത്ര സജീവമല്ല തെന്നിന്ത്യൻ സൂപ്പർസ്റ്റാർ നയൻതാര. നയൻസിന്റെ ചിത്രങ്ങളും വിശേഷങ്ങളുമെല്ലാം ഭർത്താവും സംവിധായകനുമായ വിഘ്നേഷ് ശിവന്റെ സോഷ്യൽ മീഡിയ ഹാൻഡിലുകളിലൂടെയാണ് പ്രേക്ഷകരിലേക്ക് എത്തിയിരുന്നത്. എന്നാൽ ഇപ്പോഴിതാ, ഇൻസ്റ്റഗ്രാമിൽ അക്കൗണ്ട് ആരംഭിച്ചിരിക്കുകയാണ് നയൻതാര.

തന്റെ ഹിന്ദി അരങ്ങേറ്റ ചിത്രമായ 'ജവാന്‍റെ' ട്രെയ്‌ലറിനൊപ്പമാണ് നയന്‍‌താരയുടെ ഇന്‍സ്റ്റഗ്രാം അരങ്ങേറ്റം.

മക്കളെയും കയ്യിലെടുത്ത് മാസ്സ് ലുക്കിൽ നടന്നുവരുന്ന നയൻതാരയെ ആണ് വീഡിയോയിൽ കാണാനാവുക. 'നാന്‍ വന്തിട്ടേന്ന് സൊല്ല്' എന്നാണ് വീഡിയോയ്ക്ക് നയൻ കമന്റ് ചെയ്തിരിക്കുന്നത്.

മക്കളുടെ മുഖം മറച്ചുകൊണ്ടുള്ള ചിത്രങ്ങളാണ് പലപ്പോഴും വിഘ്നേഷ് സമൂഹമാധ്യമങ്ങളിൽ പങ്കുവയ്ക്കാറുള്ളത്. നയൻതാര പോസ്റ്റ് ചെയ്ത വീഡിയോയിൽ മക്കളായ ഉയിരിന്റെയും ഉലകത്തിന്റെയും മുഖം വ്യക്തമായി കാണാം.

ഒക്‌ടോബർ 9നാണ് നയൻതാരയും വിഘ്‌നേഷും തങ്ങളുടെ ഇരട്ടകുട്ടികളായ ഉയിരിനെയും ഉലകത്തെയും സമൂഹമാധ്യമങ്ങളിലൂടെ പരിചയപ്പെടുത്തിയത്.

ഏഴു വര്‍ഷത്തെ പ്രണയത്തിനു ശേഷം ജൂണ്‍ 9 നാണ് വിഘ്‌നേഷ് നയന്‍താരയുടെ കഴുത്തില്‍ താലി ചാര്‍ത്തിയത്. കുടുംബജീവിതത്തിൽ കൂടൂതൽ അദ്ധ്യായങ്ങൾ തുറക്കുമ്പോഴും തൻെറ കരിയറിലും മികച്ച മുന്നേറ്റങ്ങൾക്കായി ഒരുങ്ങുകയാണ് നയൻതാര. അൽഫോൺസ് പുത്രൻെറ സംവിധാനത്തിൽ മലയാള ചിത്രം 'ഗോൾഡ്', അശ്വിൻ ശരവണൻെറ സംവിധാനത്തിൽ ഒരുങ്ങുന്ന 'കണക്റ്റ്' എന്നിവയാണ് ഏറ്റവും ഒടുവിൽ തിയേറ്ററുകളിലെത്തിയ നയൻതാര ചിത്രങ്ങൾ.

ഷാരൂഖ് ഖാൻ ചിത്രമായ ജവാനിലൂടെ ബോളിവുഡിലും അരങ്ങേറ്റം കുറിക്കുകയാണ് നയൻതാര. ചിത്രം സെപ്റ്റംബർ ഏഴിന് തിയേറ്ററുകളിലെത്തും. അറ്റ്‍ലി സംവിധാനം ചെയ്യുന്ന ചിത്രത്തിൽ ഷാരൂഖിനും നയൻതാരയ്ക്കുമൊപ്പം വിജയ് സേതുപതിയും അഭിനയിക്കുന്നുണ്ട്. ദീപിക പദുകോണ്‍ ഗസ്റ്റ് റോളില്‍ എത്തുന്നു.

റെഡ് ചില്ലീസ് എന്റർടൈന്മെന്റിന്റെ ബാനറിൽ ഗൗരി ഖാൻ നിർമിക്കുന്ന ചിത്രം ഷാരൂഖിന്റെ കരിയറിലെ തന്നെ ഏറ്റവും ചിലവേറിയ ചിത്രമാണ്. അനിരുദ്ധ് രവിചന്ദറാണ് ചിത്രത്തിന്റെ സംഗീതം ഒരുക്കിയിരിക്കുന്നത്.