Nalla Nilavulla Rathri OTT: നല്ല നിലാവുള്ള രാത്രി ഒടിടിയിൽ

Nalla Nilavulla Rathri OTT:സാന്ദ്ര തോമസ് പ്രൊഡക്‌ഷന്‍സിന്‍റെ ബാനറില്‍ സാന്ദ്ര തോമസും വില്‍സണ്‍ തോമസും ചേർന്നു നിർമിച്ച് നവാഗതനായ മർഫി ദേവസ്സി സംവിധാനം ചെയ്ത ‘നല്ല നിലാവുള്ള രാത്രി’ഒടിടിയിലെത്തി. ചെമ്പൻ വിനോദ് ജോസ്, ബാബുരാജ്, ജിനു ജോസഫ്, ബിനു പാപ്പു, റോണി ഡേവിഡ് രാജ്, ഗണപതി, നിതിൻ ജോർജ്, സജിൻ ചെറുകയിൽ തുടങ്ങി വലിയൊരു താരനിര തന്നെ അണിനിരന്ന ചിത്രമാണ് ‘നല്ല നിലാവുള്ള രാത്രി.

കോളേജ് കാലം മുതലുള്ള നാലഞ്ച് സുഹൃത്തുക്കൾ ചേർന്ന് ഓർഗാനിക് ഫാമിംഗ് മേഖലയിൽ ബിസിനസ് തുടങ്ങുന്നു. അവർക്കിടയിൽ ചില ആശയ കുഴപ്പങ്ങളും അഭിപ്രായ വ്യത്യാസങ്ങളുമുണ്ട്. ഇവരുടെ ബിസിനസ് വലുതാകുന്നതിന്റെ ഭാഗമായി മറ്റൊരു സുഹൃത്തിന്റെ നേതൃത്വത്തിൽ ഇവർ ഷിമോഗയിലെ ഒരു എസ്റ്റേറ്റ് ബംഗ്ലാവിൽ എത്തുന്നു. അവർ എത്തിയ നല്ല നിലാവുള്ള രാത്രി അവർ നേരിടേണ്ടി വന്ന ഒട്ടും പ്രതീക്ഷിക്കാത്ത ചില സംഭവവികാസങ്ങളിലൂടെ കഥ മുന്നോട്ട് നീങ്ങുന്നു. മനുഷ്യർക്കുള്ളിലെ അസൂയ, പക, ആർത്തി, മാത്സര്യം, നിസ്സഹായത, നന്മ തുടങ്ങി പല അടരുകളിലൂടെ കഥ മുന്നോട്ട് പോകുന്നു. തുടർന്ന് നടക്കുന്ന വിചിത്രമായ സംഭവങ്ങളിലൂടെയാണ് ചിത്രത്തിന്റെ കഥ വികസിക്കുന്നത്.

"വളരെ വിശദവും സൂക്ഷ്മവുമായ കഥാപാത്രങ്ങളുടെ അവതരണം, ഒരുപാട് അടരുകളിലൂടെ കടന്നു പോകുന്ന കഥയുടെ ഗതി വിഗതികൾ, കാന്തല്ലൂർ മുതൽ ഷിമോഗ വരെ നീളുന്ന ദുരൂഹത, ത്രില്ലർ സിനിമകളെ അടയാളപ്പെടുത്താവുന്ന ഭൂമിക നൽകുന്ന സാദ്ധ്യതകൾ… മർഫി ദേവസിയുടെ ‘നല്ല നിലാവുള്ള രാത്രി’ തുടക്കത്തിൽ ഒരു ത്രില്ലറിന്റെ സ്വഭാവത്തിലേക്ക് നല്ല ഒതുക്കത്തോടെ വന്ന സിനിമയായിരുന്നു. പിന്നീട് മലയാളത്തിൽ അത്ര സുപരിചിതമല്ലാത്ത സ്‌ളാഷർ സിനിമയുടെയും (slasher movies) കുറച്ചൊക്കെ സർവൈവൽ ത്രില്ലറിന്റെയും സ്വഭാവത്തിലേക്ക് സിനിമ മാറുന്നു. ഇതോടെ അത് വരെ തുടർന്ന താളം കൈമോശം വരികയും സ്‌ളാഷർ സിനിമയുടെ സ്വഭാവത്തിലേക്ക് എത്താതിരിക്കുകയും ചെയ്യുന്നു. നല്ല പ്രതീക്ഷ തന്നു തുടങ്ങി പിന്നീട് എവിടെയും എത്താതെ അവസാനിച്ച സിനിമകളുടെ കൂട്ടത്തിലേക്ക് ‘നല്ല നിലാവുള്ള രാത്രി’യും ചേരുന്നു," എന്നാണ് ഇന്ത്യൻ എക്സ്‌പ്രസ് റിവ്യൂവിൽ അപർണ പ്രശാന്തി ചിത്രത്തെ വിലയിരുത്തിയത്.

സംവിധായകൻ മർഫി ദേവസ്സിയും പ്രഫുൽ സുരേഷും ചേർന്നാണ് ചിത്രത്തിന്റെ തിരക്കഥയും സംഭാഷണവും ഒരുക്കിയത്. സാന്ദ്ര തോമസ് പ്രൊഡക്ഷന്‍സിന്‍റെ ആദ്യ ചിത്രം കൂടിയാണ് ‘നല്ല നിലാവുള്ള രാത്രി’. അജയ് ഡേവിഡ് കാച്ചപ്പിള്ളിയാണ് ചിത്രത്തിന്റെ ഛായാഗ്രഹണം. എഡിറ്റിംഗ്- ശ്യാം ശശിധരൻ, സംഗീത സംവിധാനം- കൈലാസ് മേനോൻ, ആക്ഷന്‍ കൊറിയോഗ്രഫി- രാജശേഖരൻ, കലാസംവിധാനം- ത്യാഗു തവനൂർ എന്നിവർ നിർവ്വഹിച്ചിരിക്കുന്നു.

ആമസോൺ പ്രൈമിലാണ് ചിത്രം സ്ട്രീമിംഗ് ആരംഭിച്ചിരിക്കുന്നത്. ഓണത്തോട് അനുബന്ധിച്ചാണ് ചിത്രം ഡിജിറ്റൽ സ്ട്രീമിംഗ് ആരംഭിച്ചത്.