പ്രണയം നിങ്ങളെ മികച്ച വ്യക്തിയാക്കും; ധനുഷുമായുള്ള പ്രണയ ഗോസിപ്പുകൾക്കിടയിൽ മൃണാൾ ഠാക്കൂർ

തമിഴ് താരം ധനുഷുമായി പ്രണയത്തിലാണെന്ന വാർത്തകൾ പ്രചരിക്കുന്നതിനിടയിൽ, പ്രണയത്തെക്കുറിച്ചുള്ള തന്റെ കാഴ്ചപ്പാടുകൾ പങ്കുവെച്ച് നടി മൃണാൾ താക്കൂർ. പ്രണയം ഒരു "മനോഹരമായ വികാരമാണെന്നും" അത് ഒരാളെ "മികച്ച വ്യക്തിയാക്കി മാറ്റുമെന്നും" മൃണാൾ പറയുന്നു.

തന്റെ പുതിയ മ്യൂസിക് വീഡിയോ ആയ "ഭീഗി ഭീഗി"യുടെ പ്രചാരണത്തിരക്കിലാണ് മൃണാൾ ഇപ്പോൾ. 'ഫിലിമിഗ്യാന്' നൽകിയ അഭിമുഖത്തിൽ പ്രണയത്തെക്കുറിച്ചുള്ള ചോദ്യത്തിന് താരം മറുപടി നൽകിയത് ഇങ്ങനെ: "പ്രണയം വളരെ മനോഹരമായ ഒരു വികാരമാണ്. ഈ ഭൂമിയിലുള്ള എല്ലാവർക്കും അത് സംഭവിക്കണം എന്നാണ് ഞാൻ കരുതുന്നത്. പ്രണയം നിങ്ങളെ മികച്ചൊരു മനുഷ്യനാക്കി മാറ്റും. അത് നിങ്ങളുടെ ഉള്ളിലെ മുറിവേറ്റ കുട്ടിയെ സുഖപ്പെടുത്തുന്ന പ്രക്രിയ പോലെയാണ്. ലോകത്തിലെ ഏറ്റവും മനോഹരമായ ഒന്നാണത്. എല്ലാവർക്കും ജീവിതത്തിൽ പ്രണയം ലഭിക്കട്ടെ എന്ന് ഞാൻ ആഗ്രഹിക്കുന്നു."

പ്രണയത്തിലാകുമ്പോൾ സ്ത്രീകൾ കൂടുതൽ വിട്ടുവീഴ്ചകൾ ചെയ്യുകയും സ്നേഹം നൽകുകയും ചെയ്യുമോ എന്ന ചോദ്യത്തിനോട് മൃണാൾ വിയോജിച്ചു. "അങ്ങനെ നിർബന്ധമില്ല. പ്രണയിക്കുന്ന ആരും സ്നേഹം നൽകുന്നവരായിരിക്കും. സ്നേഹം നൽകുന്നതിനൊപ്പം അത് സ്വീകരിക്കാനും സാധിക്കണം. പ്രണയത്തിന്റെ നിർവചനങ്ങൾ മാറിക്കൊണ്ടിരിക്കുകയാണ്. പ്രണയത്തിലാകുമ്പോൾ ലിംഗഭേദമില്ലാതെ തന്നെ പങ്കാളിക്കായി പല കാര്യങ്ങളും ചെയ്യും. അവിടെ നിങ്ങൾ പൂർണ്ണമായും കീഴടങ്ങുകയാണ്," മൃണാൾ വ്യക്തമാക്കി.

എ.ആർ. റഹ്മാൻ സംഗീതം നൽകിയ "ഭീഗി ഭീഗി" എന്ന മ്യൂസിക് വീഡിയോയിൽ ദുൽഖർ സൽമാനൊപ്പമാണ് മൃണാൾ അഭിനയിച്ചിരിക്കുന്നത്.

സിദ്ധാന്ത് ചതുർവേദിക്കൊപ്പം അഭിനയിക്കുന്ന 'ദോ ദീവാനേ ഷെഹർ മേം' ആണ് മൃണാളിന്റെ അടുത്ത ചിത്രം. സീ സ്റ്റുഡിയോസും ഭൻസാലി പ്രൊഡക്ഷൻസും ചേർന്ന് നിർമ്മിക്കുന്ന ഈ ചിത്രം 2026 ഫെബ്രുവരി 20-ന് തിയേറ്ററുകളിലെത്തും.