ബജറ്റ് 44 ലക്ഷം; ആ മോഹൻലാൽ- പ്രിയദർശൻ ചിത്രം അന്ന് നേടിയത് 4 കോടി

മോഹൻലാൽ- പ്രിയദർശൻ കൂട്ടുക്കെട്ടിൽ നിന്നും പിറന്ന മലയാളികൾക്ക് മറക്കാനാവാത്ത ഒരു സിനിമയാണ് 'ചിത്രം'. ദുരന്തപര്യവസാനിയായ ഒരു ക്ലൈമാക്സ് ആയിരുന്നിട്ടും ആ ചിത്രം ഒരു വർഷത്തിലേറെ തിയേറ്ററുകളിൽ ഓടി.

'പൂച്ചയ്ക്കൊരു മൂക്കുത്തി', 'ഓടരുതമ്മാവാ ആളറിയാം', 'ബോയിംഗ് ബോയിംഗ്', 'മഴ പെയ്യുന്നു മദ്ദളം കൊട്ടുന്നു' തുടങ്ങിയ മുഴുനീള കോമഡി ചിത്രങ്ങളിലൂടെ തിളങ്ങിനിൽക്കുമ്പോഴാണ് 1986-ൽ പ്രിയദർശൻ 'താളവട്ടം' എന്ന പരീക്ഷണചിത്രം ഒരുക്കുന്നത്. ജാക്ക് നിക്കോൾസന്റെ 'വൺ ഫ്ലൂ ഓവർ ദ കുക്കൂസ് നെസ്റ്റ്' എന്ന ചിത്രത്തിന്റെ സ്വാധീനമുണ്ടായിരുന്ന താളവട്ടം, പ്രേക്ഷകരെ ചിരിപ്പിക്കുകയും പ്രണയിപ്പിക്കുകയും ചെയ്ത ശേഷം അപ്രതീക്ഷിതമായ വൈകാരിക ആഘാതം നൽകിയാണ് അവസാനിച്ചത്. ഈ ശൈലി വിജയിച്ചതോടെ, കൂടുതൽ കരുത്തുറ്റ ഒരു തിരക്കഥയുമായി പ്രിയദർശൻ വീണ്ടും എത്തി. അതായിരുന്നു 'ചിത്രം'.

ബജറ്റും ബോക്സ് ഓഫീസ് കളക്ഷനും

ഓൺമനോരമയുടെ കണക്കുകൾ പ്രകാരം, വെറും 44 ലക്ഷം രൂപ ബജറ്റിൽ നിർമ്മിച്ച ചിത്രം 1988-ലെ ക്രിസ്മസ് കാലത്താണ് പുറത്തിറങ്ങിയത്. ചിത്രം അക്കാലത്ത് നേടിയത് റെക്കോർഡ് തുകയായ 4 കോടി രൂപയാണ്. ഒരു തിയേറ്ററിൽ തുടർച്ചയായി 366 ദിവസം പ്രദർശിപ്പിക്കപ്പെട്ട ഈ സിനിമ, സിദ്ദിഖ്-ലാൽ കൂട്ടുകെട്ടിന്റെ 'ഗോഡ്ഫാദർ' (1991) വരുന്നത് വരെ മലയാളത്തിലെ ഏറ്റവും കൂടുതൽ കാലം ഓടിയ സിനിമയെന്ന റെക്കോർഡിനും അവകാശിയായിരുന്നു.

സാധാരണ വാണിജ്യ സിനിമകളുടെ ഫോർമുലകളല്ല 'ചിത്രം' പിന്തുടർന്നത്. തന്റെ കാമുകൻ തന്നെ വഞ്ചിച്ചു എന്നറിഞ്ഞാൽ പിതാവിന്റെ (പൂർണം വിശ്വനാഥൻ) ഹൃദയം തകരുമെന്ന് ഭയന്ന്, അമ്മാവന്റെ (നെടുമുടി വേണു) സഹായത്തോടെ രഞ്ജിനി അവതരിപ്പിച്ച കഥാപാത്രം ഒരു വാടക ഭർത്താവിനെ (മോഹൻലാൽ) കണ്ടെത്തുന്നു. തമാശകളിലൂടെ മുന്നോട്ട് പോകുന്ന സിനിമ, മോഹൻലാലും രഞ്ജിനിയും പ്രണയത്തിലാകുന്നതോടെ ഗൗരവകരമായ തലത്തിലേക്ക് മാറുന്നു.

തന്റെ കുഞ്ഞിന്റെ ശസ്ത്രക്രിയയ്ക്ക് പണം കണ്ടെത്താനാണ് മോഹൻലാൽ ഈ നാടകത്തിന് സമ്മതിച്ചതെന്നും, അദ്ദേഹം യഥാർത്ഥത്തിൽ വധശിക്ഷയ്ക്ക് വിധിക്കപ്പെട്ട ഒരു തടവുകാരനാണെന്നുമുള്ള സത്യം വെളിപ്പെടുന്നതോടെ സിനിമ വികാരനിർഭരമായ ക്ലൈമാക്സിലേക്ക് നീങ്ങുന്നു. ഒടുവിൽ വധശിക്ഷ ഏറ്റുവാങ്ങാൻ മോഹൻലാൽ പോലീസിനൊപ്പം മടങ്ങുന്നതും, അദ്ദേഹത്തിന്റെ കുഞ്ഞിനെ തന്റെ സ്വന്തമായി വളർത്താൻ രഞ്ജിനി തീരുമാനിക്കുന്നതുമാണ് സിനിമയുടെ ക്ലൈമാക്സ്.

റിലീസ് ചെയ്ത് നാല് പതിറ്റാണ്ടോളം ആവുമ്പോഴും മലയാളികൾ ഇന്നും ചിത്രം ആവർത്തിച്ചു കാണുന്നു. മാസ്സ് ഡയലോഗുകളോ ഹീറോയിസമോ ഇല്ലാതിരുന്നിട്ടും പ്രിയദർശന്റെ സംവിധാന മികവും മോഹൻലാലിന്റെ അത്യുജ്ജ്വലമായ പ്രകടനവുമാണ് സിനിമയെ അനശ്വരമാക്കിയത്. കണ്ണൂർ രാജന്റെ സംഗീതവും ജോൺസന്റെ പശ്ചാത്തല സംഗീതവും എം.ജി. ശ്രീകുമാറിന്റെ ആലാപനവും ചിത്രത്തിന് വലിയ മുതൽക്കൂട്ടായി.