വട്ടപ്പൊട്ടിൽ എന്തൊരഴക്; ഈ മഞ്ജു ഭാവങ്ങൾക്കെന്തു ഭംഗിയെന്ന് ആരാധകർ

ചുവന്ന വട്ടപ്പൊട്ടും സിമ്പിൾ ഡിസൈൻ സാരിയും അണിഞ്ഞ് ഒരു പകൽ കിനാവിന്റെ സൗന്ദര്യത്തോടെ ഓട്ടോയിൽ വന്നിറങ്ങി ശ്യാമപ്രസാദിനു മുന്നിലേക്ക് നടന്നടുക്കുന്ന മഞ്ജുവിന്റെ ചിത്രങ്ങളാണ് ഇപ്പോൾ സമൂഹമാധ്യമങ്ങളിൽ വൈറലാവുന്നത്.

മഞ്ജു വാര്യരെയും ശ്യാമ പ്രസാദിനെയും പ്രധാന കഥാപാത്രങ്ങളാക്കി രഞ്ജിത്ത് സംവിധാനം ചെയ്ത 'ആരോ' എന്ന ഹ്രസ്വചിത്രമാണ് ഇപ്പോൾ സമൂഹമാധ്യമങ്ങളുടെ ചർച്ച.

'ആരോ'യിലെ മഞ്ജുവിന്റെ ലുക്കാണ് ആരാധകർ ഏറ്റെടുത്തിരിക്കുന്നത്.​ ഏറെ നാളുകൾക്ക് ശേഷമാണ് ഇത്രയും സുന്ദരിയായി മഞ്ജുവിനെ സ്ക്രീനിൽ കാണുന്നത് എന്നാണ് ആരാധകരുടെ പക്ഷം.

"47-ാം വയസ്സിലും എന്നാ ​ഗ്ലാമറാ. ഒറ്റക്കാഴ്ചയിൽ തന്നെ മനസ്സു കവരുന്നു," എന്നിങ്ങനെ പോവുന്നു കമന്റുകൾ.

കണ്ണെഴുതി പൊട്ടുംതൊട്ട് സിനിമയിലെ ഭദ്രയ്ക്കു ശേഷം മഞ്ജുവിനെ ചുവന്ന വട്ടപ്പൊട്ടിലും ലാസ്യഭംഗിയിലും കാണുന്നത് ഇപ്പോഴാണെന്ന് ഒരു വിഭാഗം ആളുകൾ വിലയിരുത്തുന്നു.

മഞ്ജുവിനെയും ശ്യാമപ്രസാദിനെയും കൂടാതെ അസീസ് നെടുമങ്ങാടും ചിത്രത്തിൽ വന്നുപോവുന്നുണ്ട്.

മമ്മൂട്ടി കമ്പനിയാണ് ആരോ എന്ന ഈ ഷോട്ട് ഫിലിം നിർമ്മിച്ചിരിക്കുന്നത്.

ഇതിനോടകം ഏഴോളം സിനിമകൾ നിർമ്മിച്ച മമ്മൂട്ടി കമ്പനി ആദ്യമായാണ്‌ ഒരു ഹ്രസ്വചിത്രം നിർമിച്ചിരിക്കുന്നത്. ക്യാപിറ്റോൾ തീയേറ്ററുമായി സഹകരിച്ചാണ് മമ്മൂട്ടി കമ്പനി ഈ ചിത്രം നിർമ്മിച്ചത്.

സംവിധായകൻ രഞ്ജിത് ഒരിടവേളക്ക് ശേഷം ഒരുക്കുന്ന ചിത്രമെന്ന പ്രത്യേകതയും ഇതിനുണ്ട്.

മമ്മൂട്ടി കമ്പനിയുടെ യൂട്യൂബ് ചാനലിലൂടെയാണ് ഈ ഹ്രസ്വചിത്രം റിലീസ് ചെയ്തിരിക്കുന്നത്.

ദേശീയ, അന്തർദേശീയ ചലച്ചിത്രോത്സവങ്ങളിലും ഈ ഹ്രസ്വ ചിത്രം പ്രദർശിപ്പിക്കും.

കഥ, സംഭാഷണം വി. ആർ. സുധീഷ്, കവിത കൽപ്പറ്റ നാരായണൻ, ഛായാഗ്രാഹകൻ പ്രശാന്ത് രവീന്ദ്രൻ, പശ്ചാത്തലസംഗീതം ബിജിപാൽ, കലാസംവിധായകൻ സന്തോഷ് രാമൻ, എഡിറ്റർ രതിൻ രാധാകൃഷ്ണൻ എന്നിവർ നിർവ്വഹിച്ചിരിക്കുന്നു.

ഏതായാലും, മഞ്ജുവിന്റെ ലുക്കും ഈ ഹ്രസ്വചിത്രവും ഇതിനകം തന്നെ സോഷ്യൽ മീഡിയയുടെ ചർച്ചയായി കഴിഞ്ഞു.