മലയാളികളുടെ പ്രിയപ്പെട്ട നടിയാണ് മഞ്ജു വാര്യർ. ഒരിടവേളയ്ക്ക് ശേഷം അഭിനയത്തിലേക്ക് തിരിച്ചെത്തിയ മഞ്ജു വാര്യർ മലയാളത്തിനു പുറമെ തമിഴിലും അരങ്ങേറ്റം കുറിച്ചു കഴിഞ്ഞു. ധനുഷ് ചിത്രം അസുരൻ, അജിത് ചിത്രം തുനിവ് എന്നിവയിലെല്ലാം ശ്രദ്ധേയമായ കഥാപാത്രങ്ങളെയാണ് മഞ്ജു അവതരിപ്പിച്ചത്. മലയാളത്തിലും കൈനിറയെ ചിത്രങ്ങളുമായി തിരക്കിലാണ് താരം. ആയിഷ, വെള്ളരിപട്ടണം എന്നിവയാണ് അടുത്തിടെ തിയേറ്ററുകളിലെത്തിയ മഞ്ജുവിന്റെ ചിത്രങ്ങൾ.
സോഷ്യൽ മീഡിയയിലും ഏറെ സജീവമാണ് മഞ്ജു ഇപ്പോൾ. സമൂഹമാധ്യമങ്ങളിൽ മഞ്ജു ഷെയർ ചെയ്യുന്ന യാത്രാ വിശേഷങ്ങളും ഫോട്ടോഷൂട്ടുകളുമൊക്കെ ഏറെ ശ്രദ്ധ നേടാറുണ്ട്. സ്റ്റൈലിഷ് ലുക്കിലുള്ള ഏതാനും ചിത്രങ്ങളാണ് മഞ്ജു ഇപ്പോൾ ഷെയർ ചെയ്തിരിക്കുന്നത്.
സിനിമകളിലെ മഞ്ജുവിനെ മാത്രമല്ല, ജീവിതത്തിലെ മഞ്ജുവിനെയും മലയാളികൾക്ക് ഏറെയിഷ്ടമാണ്. സ്ക്രീനിനു പുറത്തെ മഞ്ജുവിന്റെ വിശേഷങ്ങളറിയാനും ചിത്രങ്ങൾ കാണാനുമൊക്കെ ആരാധകർക്ക് താൽപ്പര്യമേറെയാണ്. മഞ്ജു വാര്യരോളം മലയാളി സ്നേഹിക്കുന്ന മറ്റൊരു അഭിനേത്രിയുണ്ടോ എന്ന് സംശയമാണ്. സ്വന്തം വീട്ടിലെയൊരാൾ എന്ന രീതിയിലാണ് പലരും മഞ്ജുവിനെ നോക്കി കാണുന്നത്. അത്രയേറെ പ്രിയങ്കരിയാണ് മലയാളികൾക്ക് മഞ്ജു.പൊതുവെ സൂപ്പർസ്റ്റാർ പട്ടം നായകൻമാർക്ക് മാത്രം കൽപ്പിച്ചു കൊടുക്കാറുള്ള സിനിമാലോകത്ത് മഞ്ജുവും സൂപ്പർസ്റ്റാർ ആയി മാറുകയായിരുന്നു.
