ഉള്ളിലെ അഗ്നിയെ എങ്ങനെ കണ്ടെത്തണമെന്ന് കാട്ടിത്തന്നതിന് നന്ദി; അജിത്തിനോട് മഞ്ജു വാര്യർ

തമിഴ് സൂപ്പർ താരം അജിത്ത് കുമാറിനോടുള്ള നന്ദിയും ആദരവും പ്രകടിപ്പിച്ചു കൊണ്ട് മലയാളത്തിന്റെ പ്രിയതാരം മഞ്ജു വാര്യർ പങ്കുവെച്ച പോസ്റ്റ് ശ്രദ്ധ നേടുന്നു.

തന്റെ ഉള്ളിലെ ആവേശം കണ്ടെത്താൻ വഴികാട്ടിയായതിന് അജിത്തിന് നന്ദി പറയുകയാണ് മഞ്ജു വാര്യർ പോസ്റ്റിൽ. ഓരോരുത്തരുടെയും ആത്മാവിനെ ജ്വലിപ്പിക്കുന്ന കാര്യങ്ങൾ എങ്ങനെ തേടിപ്പിടിക്കണം എന്ന് അജിത്ത് കാണിച്ചുതരുന്നുവെന്നും മഞ്ജു കുറിച്ചു.

മുൻപ് അജിത്തിനൊപ്പം നടത്തിയ ബൈക്ക് ട്രിപ്പുകളുടെ ചിത്രങ്ങളും ഏറെ വൈറലായിരുന്നു. തമിഴ് താരം അജിത്തിനൊപ്പമുള്ള ലഡാക്ക് യാത്രയാണ് മഞ്ജുവിന്റെ ജീവിതത്തിൽ പുതിയൊരു വഴിത്തിരിവായത്.

അടുത്തിടെ ബി.എം.ഡബ്ല്യു (BMW R1250 GS) അഡ്വഞ്ചർ ബൈക്കിൽ മഞ്ജു ധനുഷ് കോടിയിലേക്ക് നടത്തിയ യാത്രയും ഏറെ ശ്രദ്ധ നേടിയിരുന്നു.

അജിത്ത് കുമാർ റേസിംഗിന്റെ ഭാഗമായി നടന്ന റേസിംഗ് പിറ്റിലെ ആവേശകരമായ നിമിഷങ്ങൾക്ക് സാക്ഷിയാകാൻ എത്തിയപ്പോൾ പകർത്തിയ ചിത്രങ്ങളാണ് മഞ്ജു വാര്യർ സോഷ്യൽ മീഡിയയിൽ പങ്കിട്ടിരിക്കുന്നത്.

റേസിംഗ് ട്രാക്കിലെ വേഗതയും ത്രില്ലും ഇത്രയും അടുത്തുനിന്ന് നേരിട്ട് അനുഭവിക്കാൻ കഴിഞ്ഞത് വലിയൊരു ഭാഗ്യമാണെന്നും മഞ്ജുവാര്യർ കുറിച്ചു.

അജിത്തിനൊപ്പമുള്ള ചിത്രങ്ങൾ ഇതിനോടകം തന്നെ ആരാധകർ ഏറ്റെടുത്തു കഴിഞ്ഞു.