ചാക്കോച്ചനൊപ്പം വേദിയിൽ ചുവടുവച്ച് മമ്മൂട്ടി; വീഡിയോ

സോഷ്യൽ മീഡിയയിൽ വളരെയധികം സജീവമാണ് കുഞ്ചാക്കോ ബോബൻ. ജീവിതത്തിലെ മനോഹരമായ നിമിഷങ്ങളെല്ലാം ചാക്കോച്ചൻ തന്റെ പ്രൊഫൈലിലൂടെ പങ്കുവയ്ക്കാറുണ്ട്. ഇപ്പോഴിതാ തന്റെ കരിയറിലെ തന്നെ ഏറ്റവും സ്വപ്നസമാനമായ ഒരു നിമിഷമെന്ന് കുറിച്ച് താരം ഷെയർ ചെയ്ത വീഡിയോയാണ് ശ്രദ്ധ നേടുന്നത്.

'ന്നാ താൻ കേസ് കൊട്' എന്ന ചിത്രത്തിലെ പ്രകടനത്തിന് മലയാളികളുടെ പ്രിയ നടൻ മമ്മൂട്ടിയുടെ കയ്യിൽ നിന്ന് പുരസ്കാരം ഏറ്റുവാങ്ങുകയാണ് ചാക്കോച്ചൻ. ചിത്രത്തിനൊപ്പം ഒരു കുറിപ്പും താരം പങ്കുവച്ചിട്ടുണ്ട്.

"സന്തോഷത്തിന്റെയും ആരാധനയുടെയും ഏറ്റവും ഉന്നതങ്ങളിലാണിപ്പോൾ ഞാൻ. മികച്ച നടനിൽ നിന്ന് തന്നെ മികച്ച നടനുള്ള പുരസ്കാരം ഏറ്റുവാങ്ങാൻ എനിക്ക് സാധിച്ചു. നിങ്ങൾ കഠിനാധ്വാനം ചെയ്താൽ സ്വപ്നങ്ങൾ നിങ്ങൾക്ക് അരികിലേക്ക് എത്തും. ഞാൻ എന്ന നടന്റെ ജീവിതം മാറ്റിമറിച്ച അദ്ദേഹത്തിന്റെ തന്നെ ഗാനത്തിന് പ്രതിഭയ്‌ക്കൊപ്പം തന്നെ നൃത്തം ചെയ്യാൻ കഴിഞ്ഞു," ചാക്കോച്ചൻ കുറിച്ചു. മാഞ്ചസ്റ്ററിൽ സംഘടിപ്പിച്ച ആനന്ദ് ടിവി അവാർഡ്സിൽ പങ്കെടുക്കാൻ എത്തിയതാണ് താരങ്ങൾ.

'ദേവദൂതർ പാടി' എന്ന ഗാനത്തിന് ചാക്കോച്ചനൊപ്പം ചെറുതായി ചുവട് വയ്ക്കുന്ന മമ്മൂട്ടിയെ വീഡിയോയിൽ കാണാം. മമ്മൂട്ടി ചിത്രം 'കാതോട് കാതോര'ത്തിലെ ഗാനം റീമേക്ക് ചെയ്താണ് 'ന്നാ താൻ കേസ് കൊട്' എന്ന ചിത്രത്തിൽ ഉപയോഗിച്ചത്.

എല്ലാ തവണത്തെയും പോലെ ചടങ്ങിനെത്തിയ മമ്മൂട്ടിയുടെ ലുക്കും സോഷ്യൽ മീഡിയയിൽ വൈറലാവുകയാണ്. പിങ്ക് നിറത്തിലുള്ള കുർത്ത അണിഞ്ഞാണ് താരം എത്തിയത്. ടൊവിനോയും മമ്മൂട്ടിയ്‌ക്കൊപ്പമുള്ള ചിത്രങ്ങൾ പങ്കുവച്ചിട്ടുണ്ട്. ടൊവിനോയുടെ തോളിൽ കൈ വച്ചു നിന്ന് മമ്മൂട്ടി പുഞ്ചിരിക്കുന്ന ചിത്രങ്ങളാണ് ശ്രദ്ധ നേടുന്നത്.