52 വർഷം പഴക്കമുണ്ട് ഈ ചിത്രത്തിന്; മഹാരാജാസിന്റെ സ്വന്തം മമ്മൂട്ടി, ത്രോബാക്ക് ചിത്രങ്ങളിലൂടെ

മലയാളത്തിന്റെ പ്രിയനടൻ മമ്മൂട്ടിയുടെ 74-ാം ജന്മദിനമാണ് ഇന്ന്. ഈ പിറന്നാൾ താരത്തിന്റെ ആരാധകരെ സംബന്ധിച്ചും അൽപ്പം സ്പെഷലാണ്. ആരോഗ്യപ്രശ്നങ്ങള്‍ കാരണം സിനിമയിൽ നിന്ന് കുറച്ചു നാളുകളായി വിട്ടു നിൽക്കുന്ന മമ്മൂട്ടി രോഗവിമുക്തി നേടി ആരോഗ്യത്തോടെ തിരിച്ചുവരവിന്റെ പാതയിലാണ് എന്നതു തന്നെ കാരണം.

മമ്മൂട്ടിയുടെ പിറന്നാൾ ആഘോഷമാക്കാനുള്ള ഒരുക്കത്തിലാണ് ആരാധകരും സിനിമാലോകവും.

മഹാരാജാസിന്റെ സ്വന്തം മമ്മൂട്ടിയെ മഹാരാജാസ് കോളേജ് ഓൾഡ് സ്റ്റുഡന്റ്സ് അസോസിയേഷൻ സംഘടനയ്ക്കും മറക്കാനാവില്ല. അപൂർവ്വങ്ങളായ മഹാരാജാസ് ചിത്രങ്ങൾക്കൊപ്പം മഹാ നടന് മഹാരാജകീയ പിറന്നാൾ മംഗളങ്ങൾ നേരുകയാണ് മഹാരാജാസ് കോളേജുകാർ.

ഈ ചിത്രത്തിന് 52 വർഷം പഴക്കമുണ്ട്. 1973 ൽ മഹാരാജാസ് കോളേജ് ആർട്ട്സ് ക്ലബ് ഉദ്ഘാടനത്തിന് കോഴി എന്ന കഥാപ്രസംഗം അവതരിപ്പിക്കപ്പെട്ടപ്പോൾ. മമ്മൂട്ടി, അബ്ദുൾ കാദർ, ചന്ദ്രമോഹൻ, മുഹമ്മദ് അഷറഫ്, ജോസഫ് ചാലി എന്നിവരെ ചിത്രത്തിൽ കാണാം.

മമ്മൂട്ടിയുടെ മഹാരാജാസ് ഓർമകളിൽ നിന്നുള്ള ചിത്രങ്ങൾ പങ്കിടുകയാണ് മഹാരാജാസ് കോളേജ് ഓൾഡ് സ്റ്റുഡന്റ്സ് അസോസിയേഷൻ

മഹാരാജാസ് കോളെജിലെ പൂർവ വിദ്യാർത്ഥിയായ മമ്മൂട്ടിയുടെ ജീവിതവും അടുത്തിടെ സിലബസിൽ ഉൾപ്പെടുത്തിയിരുന്നു.

ചരിത്ര വിദ്യാർത്ഥികളുടെ രണ്ടാം വര്‍ഷത്തിലെ പുതിയ പേപ്പറായ മലയാള സിനിമയുടെ ചരിത്രം എന്ന പാഠഭാഗത്തിലാണ് മമ്മൂട്ടിയെ കുറിച്ച് പഠിക്കാനുള്ളത്.

മമ്മൂട്ടിയെ മാത്രമല്ല, ഇന്ത്യന്‍ ഭരണഘടന നിര്‍മ്മാണ സഭയിലെ വനിതാ അംഗമായിരുന്ന ദാക്ഷായണി വേലായുധന്റെ ജീവിതവും പാഠഭാഗത്തിൽ ഉൾപ്പെടുത്തിയിട്ടുണ്ട്. ചരിത്ര വിദ്യാര്‍ത്ഥികളുടെ ഒന്നാം വര്‍ഷ മൈനര്‍ പേപ്പറിലെ കൊച്ചിയുടെ പ്രാദേശിക ചരിത്രത്തിലാണ് ദാക്ഷായണി വേലായുധനെക്കുറിച്ച് പഠിക്കാനുള്ളത്.

മഹാരാജാസിലെ കലാലയ ജീവിതം വളരെ അഭിമാനത്തോടെ ഓർക്കാറുള്ള താരമാണ് മമ്മൂട്ടി. പല പൊതുവേദികളിലും തന്റെ കോളെജ് കാലഘട്ടത്തെ കുറിച്ചുള്ള ഓർമകൾ മമ്മൂട്ടി പങ്കുവയ്‌ക്കാറുണ്ട്.

മഹാരാജാസ് കോളെജിൽ നിന്നു ലഭിച്ച സൗഹൃദങ്ങളെ കുറിച്ചും സിനിമയിലെത്താന്‍ നടത്തിയ പരിശ്രമങ്ങളെ കുറിച്ചുമൊക്കെ പലപ്പോഴും മമ്മൂട്ടി വാചാലനാവാറുണ്ട്.

മഹാരാജാസ് പൂർവ്വ വിദ്യാർത്ഥി സംഗമത്തിൽ മമ്മൂട്ടി

മഹാരാജാസിൽ മമ്മൂട്ടി

മഹാരാജാസ് സുഹൃത്തുക്കൾക്കൊപ്പം മമ്മൂട്ടി