നടി മലൈക അറോറയുടെ പിതാവ് അനിൽ മേഹ്ത്ത ആത്മഹത്യ ചെയ്തു

മുംബൈ: നടി മലൈക അറോറയുടെ പിതാവ് അനിൽ മേഹ്ത്ത കെട്ടിടത്തിൽ നിന്ന് വീണു മരിച്ചു. മുംബൈയിലെ ബാന്ദ്രയിലെ താമസിക്കുന്ന കെട്ടിടത്തിന്റെ ആറാം നീലയിൽ നിന്നാണ് വീണത്. മരണം ആത്മഹത്യയെന്നാണ് പൊലീസിന്റെ പ്രാഥമിക നിഗമനം. സംഭവത്തിൽ അന്വേഷണം നടക്കുകയാണെന്ന് പൊലീസ് അറിയിച്ചു.

ബുധനാഴ്ച രാവിലെ 10.30 ഓടെയാണ് സംഭവം. മൃതദേഹം പോസ്റ്റ്‌മോർട്ടത്തിന് അയച്ചിരിക്കുകയാണ്. പഞ്ചാബ് സ്വദേശിയാണ് 62 കാരനായ അനിൽ മേഹ്ത്ത. കുറച്ചു കാലമായി അനില്‍ വിഷാദത്തിലായിരുന്നെന്ന് സ്ഥിരീകരിക്കാത്ത റിപ്പോര്‍ട്ടുകളുണ്ട്. മലയാളിയായ ജോയ്‌സ് പോളികാര്‍പ്പ് ആണ് ഭാര്യ. ചലച്ചിത്ര താരങ്ങളായ മലൈക അറോറ, അമൃത അറോറ എന്നിവരാണ് മക്കൾ.

സംഭവ സമയത്ത് മലൈക പൂനെയിലായിരുന്നു. പിതാവിൻ്റെ മരണം അറിഞ്ഞ് ബാന്ദ്രയിലെ മാതാപിതാക്കളുടെ വസതിയിലെത്തിയതായാണ് റിപ്പോർട്ട്. അതേസമയം, അനില്‍ എല്ലാ ദിവസവും ബാല്‍ക്കണിയിലിരുന്ന് പത്രം വായിക്കാറുണ്ടായിരുന്നെന്നും, ഇന്നു രാവിലെ ലിവിങ് റൂമിൽ ചെരുപ്പ് കണ്ടതിനെ തുടർന്ന് ബാൽക്കണിയിൽ പോയി നോക്കിയെന്നും ജോയ്സ് പൊലീസിന് മൊഴി നൽകി. അവിടെ അദ്ദേഹത്തെ കണ്ടില്ലെന്നും, വാച്ച്മാന്റെ നിലവിളി കേട്ടാണ് സംഭവം അറിഞ്ഞതെന്നും ജോയ്സ് പൊലീസിനോട് പറഞ്ഞു. 

ശ്രദ്ധിക്കു

ആത്മഹത്യ ഒന്നിനും പരിഹാരമല്ല. മാനസികാരോഗ്യ വിദഗ്ധരുടെ സഹായത്തിനായി വിളിക്കൂ:Pratheeksha: 0484 2448830; Roshni: 040 790 4646, Aasra: 022 2754 6669 and Sanjivini: 011-24311918